मालपोत कार्यालयको कामकाज ठप्प

जयबहादुर रोकाया

हुम्ला — जिल्ला मालपोत कार्यालयमा प्रमुख नहुँदा तीन सातादेखि कामकाज ठप्प भएको छ । प्रमुख नहुँदा कर्मचारी कामविहीन बनेका छन् । मालपोत कार्यालयमा लामो समयदेखि निमित्त प्रमुखको कामकाज चलाइरहेका लालप्रसाद ढकाल अदानचुली गाउॅपालिकामा सरुवा भएर गएपछि कामकाज प्रभावित भएको हो ।

प्रमुख नहुँदा सेवाग्राहीका सम्पूर्ण काम रोकिएका छन् । कार्यालयमा काम नभएपछि कर्मचारी हाजिर लगाएर दिनभर फुर्सदिला हुने गरेका छन् । कामका लागि कार्यालय पुगेका सेवाग्राही भने रित्तो हात फर्कन बाध्य छन् ।

अहिले निमित्त प्रमुख बनेका करार सेवाका कम्प्युटर अप्रेटर मिमसिंह नेपालीले आफ्नो दस्तखत नचल्ने भएकाले समस्या भएको गुनासो गरे । उनका अनुसार लामो समयदेखि कार्यालय प्रमुख भएर काम गरेका निमित्त प्रमुख ढकाल आदनचुली गाउॅपालिकामा गत मंसिर १ गते सरुवा भएर गएका थिए ।

ढकाललाई सम्पूर्ण काम गर्न अख्तियारी दिएकाले यसअघि कुनै काम रोकिएको थिएन । उनी रमाना लिएर गएपछि निमित्त बनेका खरिदार दिनेशप्रसाद शाह पनि सरुवा भएर चैत ७ गते अन्यत्रै गएका छन् । शाह रमाना लिएर गएपछि खरिदार कमल ओली निमित्त प्रमुख बनेका थिए ।

ओलीको समेत सरुवा भएपछि करारमा नियुक्ति पाएका नेपाली अहिले निमित्तको जिम्मेवारीमा छन् । उनले आफू निमित्त भए पनि हाजिर गरेर मात्रै बस्नुको बिकल्प नभएको बताए । अधिकार नहुँदा कामै नगरेर बस्नुपर्ने बाध्यता भएको उनले गुनासो गरे ।

कार्यालयमा दैनिक आधा दर्जन बढी सेवाग्राही आउने गरे पनि रित्तो हात फर्कने गरेको उनको भनाइ छ । ‘अख्तियारी प्राप्त प्रमुख नहुँदा जग्गा राजीनामा, रजिस्ट्रेसन, कागजातका प्रतिलिपि उतार, जग्गा रोक्का, नामसारीलगायत काम लामो समयदेखि रोकिएका छन्,’ उनले भने, ‘अन्य काम अधिकारप्राप्त निमित्तबाट हुने भए पनि नामसारी भने अधिकृतस्तरका प्रमुखबाट मात्रै हुने गरेको छ ।’

सबै काम ठप्प भएको तीन साता बिते पनि बेवास्ता भइरहेको स्थानीयको गुनासो छ । मालपोत कार्यालयबाट हुनुपर्ने काम लामो समयदेखि रोकिएको प्रमुख जिल्ला अधिकारी धोलकराज ढकालले स्वीकारे । उनले डोल्पाबाट हुम्ला सरुवा भएका अधिकृत नआएकाले समस्या भएको जानकारी दिए । डोल्पाका प्रमुख जिल्ला अधिकारीलाई सम्पर्क गर्दा बिरामी भएकाले आउन ढिलाइ भएको जानकारी पाएको उनको भनाइ छ ।

प्रकाशित : वैशाख १७, २०७६ १०:१७
ADVERTISEMENT
ADVERTISEMENT
प्रतिक्रिया
पठाउनुहोस्

२ सातादेखि खाद्यान्न ढुवानी ठप्प

जयबहादुर रोकाया

हुम्ला — जिल्लामा दुई सातायता खाद्यान्न ढुवानी ठप्प भएको छ । निजी हवाई कम्पनीले ढुवानी नगर्दा ढुवानी ठप्प भएको हो । ढुवानी नभएपछि खाद्यान्न समस्या हुँदै गएको छ ।

निजी हवाई कम्पनीका जहाज पश्चिममा नभएकाले खाद्यान्न हुन नसकेको र पुरानो मौज्दात पनि सकिन थालेकाले नेपाल खाद्य संस्थानले जनाएको छ ।

संस्थानको जिल्लास्थित कार्यालयका अनुसार सरकारले यो वर्ष १२ हजार ४ सय क्विन्टल कोटा निर्धारण गरेकोमा ११ हजार क्विन्टल ढुवानी भइसकेको छ । जिल्ला खाद्य व्यवस्था समितिले १३ हजार क्विन्टल थप माग गरेकोमा सरकारले ३ हजार क्विन्टलमात्र थपेको छ । थप कोटासहित ५ हजार ४ सय क्विन्टल ढुवानी भएको छैन ।

दुई सातायता हवाई ढुवानी ठप्प भएको शाखा प्रमुख रामबहादुर बिष्टले बताए । ढुवानी हुन बाँकी कोटा मात्रै ढुवानी हुन सके समस्या न्यूनीकरण हुने उनको भनाइ छ ।

अबको केही समयपछि मानसरोवर कैलाश तीर्थयात्रा सुरू हुन्छ । त्यतिबेला निजी हवाई कम्पनीले खाद्यान्न ढुवानी गर्नुभन्दा तीर्थयात्रीलाई ओसारपोसार गर्न प्राथामिकता दिन्छन् । त्यसैले पनि अहिल्यै जतिसक्दो छिटो खाद्यान्न ढुवानी गर्नुपर्ने बाध्यता संस्थानलाई छ । गत वर्ष समयमै ढुवानी नहुँदा दसैं–तिहारमा स्थानीयले चामल पाएका थिएनन् ।

संस्थानबाट सहुलियत मूल्यको चामल नपाउँदा स्थानीयवासी बजारको महँगो चामल उपभोग गर्न बाध्य भएका थिए । चामल किन्न नसक्नेले आटो–पिठो खाएरै दसैं–तिहार मनाउन बाध्य भएका थिए । सिमकोटमा यतिखेर चामलको मूल्य गुणस्तरअनुसार प्रतिकिलोग्राम १ सय ६० देखि २ सय ५० रुपैयाँसम्म रहेको छ ।

हुम्लामा यो वर्ष भारी हिमपातले हिउँदे बाली बिग्रेको छ । कात्तिक–मंसिरमा छरेको गहुँ, उवा हिउँले च्यापेर फस्टाउन नसकेको र हिउँ पग्लेपछि बल्ल पलाउन थालेको स्थानीय बताउँछन् । सर्केघाड गाउँपालिका, पुमाका रामचन्द्र बुढाका अनुसार पहिले चैतमै उवाले बालो हाल्थ्यो । यो वर्ष भने वैशाख आधा हुँदासमेत बालो हालेको छैन ।

संस्थानको चामल ढुवानी रोकिनु र हिउँदे बाली पनि बिग्रिनुले यो वर्ष हुम्लामा खाद्य समस्या बढ्ने स्थानीयको चिन्ता छ । संस्थानका कार्यालय प्रमुख बिष्ट संस्थानले कोटा थपे पनि निजी हवाई कम्पनीले ढुवानी नगर्दा समस्या हुने गरेको बताउँछन् । ढुवानीको लागि जति ठाउँ धाउँदा पनि समस्या समाधान नभएकोउनले बताए ।

संस्थानले सिमकोट गाउँपालिका बासिन्दालाई रासनकार्डमार्फत खाद्यान्न उपलव्ध गराउने गरेको छ । यसअघि सिमकोटका बुराउँसे, हिल्दुम र स्याम्नेका बासिन्दालाई मात्र रासन कार्डबाट चामल वितरण गर्ने गरिन्थ्यो । बैशाखदेखि पुरै गाउँपालिकाका बासिन्दालाई रासनकार्डबाट चामल वितरण थालिएको हो ।

प्रकाशित : वैशाख १५, २०७६ १०:११
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×