नगरपालिकामा तालाबन्दी- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

नगरपालिकामा तालाबन्दी

राजबहादुर शाही

मुगु — छायानाथ रारा नगरपालिकामा  ६ दिनदेखि जारी तालाबन्दीका कारण प्रशासनिक र विकास निर्माणका कामकाज ठप्प भएका छन् । घन्टौं हिंडेर सरकारी सेवा लिन आएका सेवाग्राही तालाबन्दीका कारण रित्तो हात फर्कन बाध्य छन् । 

नगरप्रमुख हरिजंग शाहीले आफूहरूसँग सहकार्य नगरी एकलौटी ढंगले काम गर्न खोजेको भन्दै उपप्रमुख सुन्तला रोकायासहित कार्यपालिकाका सदस्यले तालाबन्दी गरेका हुन् । नेकपाका जनप्रतिनिधिले आइतबारदेखि गरेको तालाबन्दीका कारण कामकाज ठप्प भएको हो । नगरमा कार्यरत कर्मचारी दिनभर घाम तापेर बस्ने र कार्यालय समय सकिएपछि घर फर्कने गरेका छन् । तालाबन्दीका कारण कर्मचारीले हाजिरसमेत गर्न पाएका छैनन् ।


आन्दोलनरत जनप्रतिनिधिले आफूहरूले राखेका ६ बुँदे माग पूरा नभएसम्म तालाबन्दी जारी रहने जनाए । नगर उपप्रमुख सुन्तला रोकायाले माग पूरा नभएसम्म र नगरप्रमुखले आफ्नो व्यवहार नसच्याएसम्म आन्दोलन जारी रहने बताइन् । उनीहरूले प्रदेशसभाको ऐनविपरीत ९ महिनासम्म नगरसभाको बैठक नबोलाएको, चार महिनासम्म नगर कार्यपालिकाको बैठक नबसेको, स्वेच्छाचारी ढंगबाट नगरका कामकाज सञ्चालन गर्न खोजेको लगायतका आरोप लगाएका छन् । नियमित चौमासिक प्रगति समीक्षासमेत नगरिएको उपप्रमुख रोकायाले बताइन् ।


नगरपालिकामा बहुमत र अल्पमतको लडाइँका कारण विकास निर्माणका कामले गति लिन नसकेको स्थानीयको भनाइ छ । नगर कार्यपालिकामा नेकपा पक्षका १६ र कांग्रेस पक्षका ८ सदस्य छन् । त्यस्तै नगरसभामा नेकपामा ३७ र कांग्रेसतर्फका ३५ जनप्रतिनिधि छन् ।


बहुमतको कदर हुनुपर्ने नेकपापक्षीय र नगरप्रमुखको निर्देशनमा अन्य जनप्रतिनिधि चल्नुपर्ने कांग्रेसपक्षीय जनप्रतिनिधिको दाबी छ । ‘बहुमत र अल्पमतको लडाइँ होइन, नगरप्रमुखको कार्यशैलीप्रति विरोध हो,’ वडाध्यक्ष डम्बर रावलले भने, ‘माग पूरा नहुँदासम्म तालाबन्दी जारी रहनेछ ।’


तालाबन्दीको बेवास्ता गर्दै नगरप्रमुख शाही मंगलबार जिल्लाबाहिर गएपछि आन्दोलनरत जनप्रतिनिधि आक्रोशित बनेका छन् । नेकपापक्षीय जनप्रतिनिधिले चैत ६ गते नगरप्रमुखको कार्यशैलीप्रति विरोध जनाउँदै २६ बुँदे प्रेस विज्ञप्ति सार्वजनिक गरेका थिए । नगरपालिकामा अहिलेसम्म चालु आर्थिक वर्षका कुनै पनि योजनाका काम अगाडि बढ्न सकेका छैनन् ।


आन्दोलनमा उत्रिएका जनप्रतिनिधिसँग सहमतिको प्रयास भइरहेको नगरपालिकाका निमित्त नगरप्रमुख पशुराम नेपालीले बताए । उनले नगरप्रमुख कामविशेषले जिल्लाबाहिर गएकाले केही समस्या भएको जनाए । ‘म सकेसम्म सहमति गरेर ताला खोल्ने प्रयासमा छु, अन्य विमति नगरप्रमुख फर्किएपछि राख्न आन्दोलनरत पक्षलाई आग्रह गरेको छु,’ उनले भने, ‘तालाबन्दीका कारण सेवा प्रवाह र विकास निर्माणका काममा समस्या भइरहेको छ ।’

प्रकाशित : चैत्र १६, २०७५ ०८:५४
प्रतिक्रिया
पठाउनुहोस्

एक शिक्षकको भरमा विद्यालय

विप्लव महर्जन

सल्यान — त्रिवेणी गाउँपालिकास्थित कालिका प्रावि मुलाबारीमा पाँच कक्षाको पढाइ दुई कोठामा सञ्चालन हुने गरेको छ । विद्यालयमा शिक्षक शोभाजंग केसीमात्र कार्यरत छन् । उनले कक्षा १ देखि ३ सम्मलाई एउटा कोठा तथा कक्षा ४ र ५ का विद्यार्थीलाई अर्को कोठामा राखेर चार वर्षदेखि सामूहिक रूपमा पढाउँदै आएक छन् । 

सामूहिक रूपमा पढाउँदै सल्यानको लक्ष्मी आधारभूत विद्यालयकी शिक्षिका । यो विद्यालय पनि एक शिक्षकको भरमा चलेको छ । तस्बिर : विप्लव/कान्तिपुर

शिक्षक अभावले लामो समयदेखि विद्यालयले पठनपाठनको समस्या भोग्दै आइरहेको छ । शिक्षक केसी प्रशासनिक कामकाजले बाहिर जाँदा पठनपाठन बन्द हुने गरेको छ । विद्यालयमा कक्षा १ देखि ५ सम्म पठनपाठन भइरहेको छ । निजी तथा राहत दरबन्दीका कुनै पनि शिक्षक नभएपछि पठनपाठनमा समस्या भएको हो ।

विद्यालयमा ८३ विद्यार्थी भर्ना भए पनि पठनपाठन प्रभावकारी नहुँदा ४२ मात्र नियमित उपस्थित हुने गरेका छन् । एकमात्र दरबन्दी भएकाले उनले प्रधानाध्यापकको कामसमेत गर्दै आइरहेको बताए । केसी गाउँबाहिर गएको बेला बालबालिका दिनभरि विद्यालयको चौरमा खेलेर घर फर्कने गरेका छन् ।

विद्यालयमा कम्तीमा तीन जना शिक्षक आवश्यक भएको भन्दै पटकपटक विभिन्न निकायको ध्यानाकर्षण गराए पनि बेवास्ता हुँदै आइरहेको प्रधानाध्यापक केसीको गुनासो छ । ‘कहिले एउटा कक्षा र कहिले अर्को कक्षा गर्दा एकछिन पनि फुर्सद पाइँदैन,’ उनले भने, ‘एउटा कक्षाका विद्यार्थीलाई लेख्न लगाएर अर्को कक्षामा पढाउन जाने गरेकी छु ।’ विद्यालयमा एक्लै कार्यरत भएकाले पठनपाठन प्रभावकारी नभएको उनले गुनासो गरे । स्थानीय तह गठनपछि पनि पटकपटक शिक्षकको माग गरे पनि बेवास्ता भएको उनी बताउँछन् ।

सामूहिक रूपमा पठनपाठन गराउँदा शिक्षण प्रभावकारी नभएको उनको दुःखेसो छ । साबिक जिल्ला शिक्षा कार्यालयले विद्यालयमा २०७० सालमा एक शिक्षिकालाई काजमा पठाएको थियो । एक वर्ष नबित्दै उनको काज फिर्ता भएपछि फेरि समस्या भएको विद्यालयले जनाएको छ । २०६१ सालमा स्थापना भएको विद्यालयमा २०७३ सम्म एक सय १८ जना विद्यार्थी अध्ययनरत थिए । शिक्षककै अभावका कारण अहिले ३० विद्यार्थी नजिकैको निजी विद्यालयमा गएका छन् ।

विद्यालय व्यवस्थापन समितिकी अध्यक्ष दुर्गीकुमारी रोकाले दरबन्दीका लागि विभिन्न निकायमा दर्जनौंपटक पुगे पनि बेवास्ता भएपछि पठनपाठनमा समस्या भएको बताइन् । विद्यालयको भरपर्दो आर्थिक स्रोत नहुँदा निजी स्रोतमा शिक्षक राख्न नसकिएको उनले गुनासो गरिन् । ‘अहिले गाउँपालिकामा शिक्षकको व्यवस्था गर्न माग गरिएको छ,’ उनले भनिन्, ‘आश्वासन त पाइएको छ,
तर शिक्षकको व्यवस्था कहिले हुने हो भन्नेबारे जनप्रतिनिधिले समेत स्पष्ट जवाफ दिंदैनन् ।’

प्रकाशित : चैत्र १६, २०७५ ०८:५३
पूरा पढ्नुहोस्
प्रतिक्रिया
पठाउनुहोस्
×