सुरु भयो शैक्षिक सत्र

जयबहादुर रोकाया

हुम्ला — फागुनबाट नयाँ शैक्षिक सत्र सुरु हुने हुम्लामा हिमपातका कारण चैत पहिलो सातादेखि विद्यालय खुलेका छन्  । माघ र फागुनमा पटकपटक भएको भारी हिमपातका कारण विद्यालय भवन हिउँले पुरिएका थिए  ।

तापक्रम बढेर विद्यालयमा जमेको हिउँ पग्लिएपछि पठनपाठन सुचारु भएको हो । हिउँ पग्लेर विद्यालय आउजाउ गर्न सहज भएपछि जिल्लाका सबै विद्यालय सञ्चालनमा आएको शिक्षा विकास तथा समन्वय एकाइ प्रमुख वर्ष फडेराले बताए ।

जिल्लाका सबै विद्यालयले फागुन २३ गतेसम्म विद्यार्थी भर्ना अभियान सञ्चालन गरेका थिए । २४ गतेपछि पढाइ सुरु गर्ने तालिका बनाए पनि हिमपातका कारण चैतबाट नियमित पढाइ हुन थालेको हो । विद्यालय सञ्चालनमा आए पनि दोस्रो सातादेखि भने पढाइ प्रभावित हुने भएको छ । फागुन ८ गतेदेखि एसईईको परीक्षा हुने भएकाले परीक्षा नसकिएसम्म पढाइ प्रभावित हुने भएको हो ।


हिमालपारिको बस्ती भनेर चिनिने लिमीका दुई आधारभूत विद्यालय भने वैशाखपछि मात्रै सञ्चालनमा आउनेछन् । लिमी आउजाउ गर्ने बाटो हिमपातका कारण बन्द भएकाले बर्सेनि हिउँ पग्लेर बाटो खुलेपछि मात्रै विद्यालय सञ्चालनमा आउने गरेका छन् । लिमी जिल्लाको सबैभन्दा बढी हिमपात हुने बस्ती हो । नाम्खा गाउॅपालिकाको लिमीका तीन बस्तीमा एक/एक विद्यालय भए पनि तिल गाउॅमा रहेको विद्यालय भने गत वर्ष नै बन्द भइसकेको छ ।

एकाइ प्रमुख फडेराले तिल गाउॅमा विद्यार्थी नै नभएकाले विद्यालय बन्द गरिएको जनाए । विद्यालय बन्द भएपछि दरबन्दीका शिक्षकलाई गाउँपालिकाअर्न्तगतका अन्य विद्यालयमा सरुवा गरिएको थियो । लिमीको हल्जी र जाङ गाउँमा दुई विद्यालय सञ्चालनमा छन् । यी दुबै विद्यालयले पाॅच कक्षासम्म अध्यापन गर्न पाउने अनुमति लिएका छन् । विद्यालयमा दुई/दुई शिक्षकको दरबन्दी छ ।


विद्यालय सञ्चालनमा आए पनि चंखेली र सर्केगाड गाउँपालिकामा रहेका विद्यालयमा भने पाठ्यपुस्तक पुगेका छैनन् । यी गाउँपालिकामा रहेका विद्यालयका लागि पुस्तक उपलब्ध गराउने जिम्मा लिएका एजेन्टले हिमपातका कारण ढुवानी गर्न नसकेको जनाउँदै आएका छन् । गाउँपालिकामा मुगुको गमगढी भएर पुस्तक ढुवानी हुने गरेका छन् । हिमपातका कारण बन्द भएको मुगुको नाग्मा–गमगढी सडक दुई दिनअघि मात्र सुचारु भएको छ ।

प्रकाशित : चैत्र ६, २०७५ १४:३७
प्रतिक्रिया
पठाउनुहोस्

अवैध मदिरा नियन्त्रण

भीमबहादुर सिंह

जाजरकोट — प्रहरीले अवैध घरेलु मदिराको उत्पादन तथा बिक्री नियन्त्रण गर्न अभियान थालेको छ  । प्रहरीले सिलवन्दी मदिराको पनि निर्धारित समयबाहेक जथाभावी बिक्री गर्न नपाइने अभियान चलाएको छ  ।

खलंगालगायत बजारमा रहेका होटल तथा खाजापसलमा बेलुकी ८ बजे भन्दा पछाडिको समयमा मदिरा बिक्री वितरण नगर्न उर्दी जारी गरेको छ । मदिराको कारण सामाजिक अपराधका घटना बढ्न थालेपछि प्रहरीले यस्तो अभियान थालेको हो ।

अभियानको क्रममा प्रहरीले एक साताको अवधिमा सात सय लिटर मदिरा नष्ट गरेको छ । भेरी नगरपालिका ३ र ४ बाट उक्त मदिरा बरामद भएको प्रहरी निरीक्षक लोकबहादुर विष्टले बताए । मदिरा बनाउने कच्चा पदार्थ (जाँड) ५ सय लिटर, जाँड बनाउने औषधि २० किलो र तयारी मदिरा दुई सय लिटर बरामद गरेर सोमबार नष्ट गरेको प्रहरी निरीक्षक विष्टले जानकारी दिए । मदिरा उत्पादनमा प्रयोग हुने दुई दर्जन भाँडाबर्तन पनि बरामद गरेको निरीक्षक विष्टले जनाए । प्रहरीको आँखा छलेर खलंगा बजारमा छ्याप्छ्याप्ती अवैध मदिरा उत्पादन र बिक्री वितरण हुने गरेको उनको भनाइ छ ।


मदिरासेवनबाट घरेलु हिंसा, महिला हिंसा, बलात्कार, चोरी, कुटपिट, हत्यालगायत आपराधिक घटना हुन थालेपछि प्रहरी, स्थानीय आमा समूह र सामुदायिक प्रहरीले घरेलु मदिराको उत्पादन तथा बिक्रीमा पूर्ण रोक लगाएका छन् । गृह मन्त्रालयको मदिरा नियन्त्रणसम्बन्धी परिपत्रअनुसार घरेलु मदिराको उत्पादन र बिक्री वितरणमा निगरानी बढाएको प्रहरीले जनाएको छ । प्रहरीका अनुसार अभियान जिल्लाभर लागू गरिएको छ ।

मदिरा नियन्त्रणले सामाजिक अपराधका घटना न्यूनीकरण हुँदै जाने प्रहरी नायव उपरीक्षक श्याम खत्रीले बताए । विभिन्न गाउँ/टोलमा उत्पादित कम मूल्यको अवैध मदिरा सेवनबाट स्थानीय पर्वमा कुटपिट र हिंसाका घटना हुने गरेको खत्रीको भनाइ छ । ‘यस्ता घटनाको मुख्य कारण घरेलु मदिरा भएको ठहर गरी नियन्त्रणको अभियान थालेका हौं,’ खत्रीले भने।

प्रकाशित : चैत्र ६, २०७५ १४:३६
पूरा पढ्नुहोस्
प्रतिक्रिया
पठाउनुहोस्