एमयूमा आन्दोलन चर्कियो, साढे २ महिनादेखि तालाबन्दी

ज्योति कटुवाल

वीरेन्द्रनगर, सुर्खेत — मध्यपश्चिमाञ्चल विश्वविद्यालय (एमयू) मा संयुक्त विद्यार्थी आन्दोलन संघर्ष समिति र प्रजातन्त्रवादी प्राध्यापक संघले झन् आन्दोलन चर्काएका छन् । आन्दोलनरत विद्यार्थीले प्रशासनमा साढे दुई महिनादेखि लागेको ताला अझै खुलेको छैन ।




बिहीबार रजिष्ट्रार डा. महेन्द्रबहादुर मल्ललाई निलम्बनको प्रक्रिया थालिएपछि विद्यार्थीले आन्दोलन चक्राएका हुन्।उनीहरुले आइतबारदेखि विश्वविद्यालयको पठनपाठन पनि ठप्प पार्ने घोषणा गरेका छन्।

उपकुलपति प्रा.डा. उपेन्द्र कोइरालाले विधि मिचेर कार्यकारी परिषद बैठक गरेको भन्दै असोज ८ गतेखि विश्वविद्यालय केन्द्रीय कार्यालय र डीन कार्यालयमा ताला लगाइएको छ। ‘दुई तिहाइ राजनीतिक दम्भका आधारमा ठाडो हस्तक्षेप गरी विधि विधान मिचेर रजिष्ट्रारलाई निलम्बन गरिएको छ,’ संघद्वारा जारी विज्ञप्तिमा भनिएको छ, ‘विश्वविद्यालय स्थापनाका अभियन्ता र विश्वविद्यालयको विकासमा जनतादेखि सरकारसम्म जोडिएका व्यक्तिलाई राजनीतिक खोल ओढेर बर्खास्त गर्न खोज्नुले हामीलाई आक्रोशित बनाएको छ।’

शुक्रबार स्ववियुसहित संयुक्त विद्यार्थी संघर्ष समितिले पनि प्रदर्शन गरेको छ। स्ववियु अध्यक्ष झक्कबहादुर शाहीले उपकुलपतिले समस्या समाधान गर्नुको साटो झन् बल्झाउन खोजेपछि आन्दोलन कडा गर्नु परेको बताए।

प्रकाशित : मंसिर २१, २०७५ १८:१२
प्रतिक्रिया
पठाउनुहोस्

सिड्नीमा नेपाली विद्यार्थीको मृत्यु

नारायण खड्का

अस्ट्रेलिया — उच्च शिक्षा अध्ययनका लागि दुई महिनाअघि अस्ट्रेलिया आएका एक नेपाली विद्यार्थीको मृत्यु भएको छ ।मोरङको मधुमल्ला घर भई आइटी विषयमा डिप्लोमा अध्ययन गर्न सिड्नी आएका मीलन तामाङको उपचारका क्रममा मृत्यु भएको हो ।

नेपालबाट प्लस टु सकेर सिड्नीमा रहेको 'हाम्रो कलेज'मा अध्ययन गर्न आएका उनी जम्मा २० वर्षका थिए ।

उनीसँगै बस्ने साथी प्रकाश अधिकारीले दिएको जानकारीअनुसार बुधबार आफ्नै घरमा पढिरहेको समयमा ढलेका उनलाई उपचारका लागि एम्बुलेन्समार्फत अस्पताल लगिएको थियो । अस्पतालमा चिकित्सकहरुले उनलाई बिहीबार मृत घोषणा गरेका थिए । अधिकारीले चिकित्सकहरुको भनाइ उद्धृत गर्दै उनको मृत्युको कारण 'ब्रेन हेमरेज' भएको जानकारी दिए ।

उनको शव नेपाल पठाउने पहल सुरु गरिएको छ । हाम्रो कलेजका निर्देशक दीपक खनालले मृतक तामाङ अध्ययनका लागि आउँदा तिरेको सबै शुल्क फिर्ता गरिदिने जानकारी दिँदै उनको शव नेपाल पठाउन सक्दो पहल भइरहेको बताए ।

शव नेपाल पठाउन सिड्नी तामाङ सोसाईटीले सहयोग संकलन सुरु गरेको भने आप्रवासी नेपालीहरुको संगठन एनआरएनले समेत सहयोग गर्न आग्रह गरेको छ ।

प्रकाशित : मंसिर २१, २०७५ १७:५६
पूरा पढ्नुहोस्
प्रतिक्रिया
पठाउनुहोस्