हुम्लाको परीक्षा केन्द्र सुर्खेत

कान्तिपुर संवाददाता

हुम्ला — शिक्षक सेवा आयोगले सबै तहका शिक्षकको पदपूर्तिका लागि परीक्षा केन्द्र सुर्खेतमा तोकेपछि यहाँका परीक्षार्थीलाई सास्ती हुने भएको छ ।

सडक यातायातको सुविधा नभएकाले जहाजमार्फत आउजाउमा समस्या हुने परीक्षार्थीको गुनासो छ । उनीहरूले परीक्षा केन्द्र जिल्लामै राख्न माग गरेका छन् ।

जिल्लाबाट ६ सय ७१ परीक्षार्थीले शिक्षक सेवा आयोगको परीक्षामा प्रतिस्पर्धा गर्दैछन् । शिक्षा विकास तथा समन्वय इकाईका अनुसार जिल्लाबाट मावितर्फ ४१, निमावि तहमा ८१ र प्राथामिक तहको शिक्षकका लागि पाँच सय ४९ जनाले फाराम भरेका छन् ।

साबिक कर्णाली अञ्चलका ५ र दैलेखबाट फाराम भरेका परीक्षार्थीको केन्द्र सुर्खेत तोकिएको छ । विगतमा निमावि र मावि तहको शिक्षकका लागि सुर्खेत र प्राथमिक तहका लागि जिल्लामै केन्द्र तोकिएको थियो । निजामती सेवातर्फको खरिदार पदका लागि जिल्लामै परीक्षा हुने गरेको छ ।

हवाईमार्गबाट परीक्षा दिन जाँदा एकजना परीक्षार्थीले कम्तीमा ५० हजार खर्च गर्नुपर्ने बाध्यता रहेको स्थानीय पूर्णबहादुर शाहीले बताए । उनले जिल्लाबाहिर गएर परीक्षा दिन आर्थिक र भौतिक रूपले समस्या भएको जनाए । ‘महँगोमा प्लेन चढेर जानै समस्या भयो,’ उनले भने, परिक्षार्थीको संख्या ठूलो रहेकाले टिकट पाउन समेत समस्या हुने देखिन्छ ।’

परिक्षार्थीले जिल्लामै परीक्षा केन्द्र राख्न माग गर्दै दुई दिनअघि शिक्षा मन्त्री, शिक्षक सेवा आयोग, जिल्लाबाट प्रतिनिधित्व गर्ने सांसद लगायतलाई ज्ञापनपत्र बुझाएका थिए ।
‘आयोगले जिल्लामै सेवा गर्न फाराम भरेका सयौं परिक्षार्थीको बाध्यता बुझेन,’ शाहीले भने, ‘परीक्षाकै लागि महँगो प्लेन चढेर जानुपर्ने बाध्यता भयो ।’

उनले खाना र बसाइमा समेत महँगो रकम खर्च हुने भएकाले परीक्षा बाहिर राखिनु अव्यावहारिक भएको बताए । स्थानीय श्यामजोर ऐडीले परिक्षा दिन सुर्खेत जाँदा र बस्दा ५० हजार रुपैयाँले समेत नपुग्ने बताए । परीक्षा दिन जाने अधिकांशले ठूलो रकम जुटाउन नसक्ने अवस्था रहेको उनले बताए ।

खर्च जुटाए पनि हवाई टिकट नपाउने समस्या हुने उनको भनाइ छ । परिक्षार्थीलाई परिक्षाको तयारीका साथै हवाई टिकट समस्याले तनाब हुन थालेको ऐडीले जनाए ।

हुम्लाबाट फाराम भरेका सबै तहका परिक्षार्थीका लागि जिल्लामै परिक्षा केन्द्र तोक्न सांसद रंगमति शाहीले प्रतिनिधि सभामा माग गरेकी थिइन् ।

उनले शिक्षामन्त्री लगायतका अधिकारीसँग भेटेर यसबारे ध्यानाकर्षण गराएको बताइन् । ‘निमावि र मावि तहको नभए पनि प्राथामिक तहको परीक्षा केन्द्र जिल्लामै राख्न सकिन्थ्यो,’ उनले भनिन्, ‘बाहिर केन्द्र राखिँदा प्रतियोगी परीक्षाबाट वञ्चित हुने अवस्था आयो ।’ दुर्गम क्षेत्रका परीक्षार्थीलाई असुविधा हुने भए पनि परीक्षाको मर्यादा कायम गर्न परीक्षा
केन्द्र बाहिर राखिएको आयोगका प्रशासकीय प्रमुख डा. तुलसी थपलियाले बताए ।

प्रकाशित : भाद्र २२, २०७५ १०:२२
प्रतिक्रिया
पठाउनुहोस्

स्यार्पुमा अर्को विद्युत् आयोजनाको तयारी

दुई मेगावाट विद्युत् उत्पादनको अनुमानसहित सम्भाव्यता अध्ययन गर्न लागिएको हो
कान्तिपुर संवाददाता

रुकुम पश्चिम — स्यार्पुतालबाट अर्को विद्युत् उत्पादनको तयारी गरिएको छ । बाँफिकोट गाउँपालिका–३ र ५ नम्बर वडामा फैलिएको स्यार्पुतालको पानीबाट अर्को विद्युत् उत्पादन गर्ने गरी सम्भाव्यता अध्ययनको तयारी थालिएको हो ।

स्यार्पु पावर कम्पनी लिमिटेडले स्यार्पूमा अर्को विद्युत् आयोजना निर्माणका लागि सम्भाव्यता अध्ययनको तयारी गरिरहेको हो ।

कम्पनीका अध्यक्ष धनवीर ओलीले पर्याप्त पानी रहेको स्यार्पतालबाट अर्को विद्युत् आयोजना निर्माण हुन सक्ने भएकाले त्यसको सम्भाव्यता अध्ययनको तयारीमा लागिएको बताए । ‘थप विद्युत् आयोजना निर्माणका लागि आवश्यक स्रोत र उपयुक्त वातावरण देखिएकाले त्यसको अध्ययनका लागि तयारी गरिएको छ,’ अध्यक्ष ओलीले भने, ‘सम्भाव्यता अध्ययनको प्रोसेसमा हामी लागेका छौं ।’

दुई मेगावाट विद्युत् उत्पादनको अनुमान सहित सम्भाव्यता अध्ययन गर्न लागिएको कम्पनीले जनाएको छ । ‘सबै कुरा सम्भाव्यता अध्ययत र डीपीआर पछि खुल्ला,’ ओलीले भने, ‘तर हामीले कम्तीमा पनि २ मेगावाट विद्युत् उत्पादन गर्ने गरी आयोजना निर्माण हुने अनुमान गरेका छौं ।’

सम्भाव्यता अध्ययनपछि विद्युत् आयोजना निर्माण जिल्लाकै बजेटले बनाउने योजना कम्पनीले गरेको छ । स्थानीय सरकार र सर्वसाधारणबाट सेयर संकलन गरेर आयोजना निर्माण गर्ने तयारी कम्पनीको छ ।

स्यार्पुमा अर्को विद्युत् आयोजना निर्माण गर्ने तयारी गरिएपछि जिल्लाका स्थानीय सरकारले झन्डै तीन करोडको सेयर खरिदको प्रतिबद्धता गरेका छन् । जिल्ला समन्वय समिति, आठबीसकोट, चौरजहारी र मुसीकोट नगरपालिकाले विद्युत् आयोजनामा लगानी गर्ने प्रतिबद्धता जनाएका हुन् ।

यसैगरी बाँफिकोट, सानीभेरी र त्रिवेणी गाउँपालिकाले पनि स्यार्पुमा निर्माण हुने अर्को विद्युत् आयोजनामा लगानी गर्ने लिखित प्रतिबद्धता गरेको कम्पनीले जनाएको छ ।

कम्पनीका सचिव चन्द्रबहादुर केसीका अनुसार जिल्ला समन्वय समितिले ६५ हजार र आठबीसकोट नगरपालिकाले ६० हजार कित्ता सेयर लिने लिखित प्रतिबद्धता गरेका छन् । प्रतिकित्ता एक सयका दरले समन्वय समितिले उक्त आयोजनामा ६५ लाख र आठबीसकोट नगरपालिकाले ६० लाख लगानी गर्ने निर्णय गरिसकेका छन् । यसैगरी चौरजहारी र मुसीकोट नगरपालिकाले ३०/३० लाख, बाँफिकोट, सानीभेरी र त्रिवेणी गाउँपालिकाले पनि ३०/३० लाख लगानी गर्ने निर्णय गरिसकेका छन् ।

आयोजना निर्माणको निश्चित भएपछि प्रतिबद्धता गरेकाहरूबाट लगानी आउने जनाइएको छ । आयोजना निर्माण निश्चित भएपछि सर्वसाधारणलाई पनि सेयर बिक्री गरेर सर्वसाधारणको समेत लगानी जुटाइने अध्यक्ष ओलीले बताए । आयोजना निर्माण हुन सके विद्युत्मा जिल्ला आत्मनिर्भर हुने उनको दाबी छ । स्यार्पुतालको पानीबाट अहिले एउटा विद्युत् आयोजना सञ्चालनमा छ । २०४५ सालमा जापानी सहयोग नियोग जाइकाले बनाइदिएको विद्युत् आयोजनाको उत्पादन क्षमता दुई सय ५० किलोवाट हो ।

विद्युत् आयोजना निर्माण भएको लामो समय भइसकेकाले विद्युत् उत्पादन नियमित छैन भने बेलाबेला खराबी आउने गरेकाले उपभोक्ताहरू मारमा परेका छन् । २०७२ मा उक्त आयोजनामा मुख्य मुख्य पाट्र्सहरू फेरिदिए पनि विद्युत् उत्पादन क्षमता बढ्न सकेन भने मेसिनमा खराबी आउने क्रम पनि रोकिएको छैन । केन्द्रीय प्रसारण लाइन नियमित नहुँदा पनि सर्वसाधारण अँध्यारोमै बस्न बाध्य छन् ।

प्रकाशित : भाद्र २२, २०७५ १०:२१
पूरा पढ्नुहोस्
प्रतिक्रिया
पठाउनुहोस्
×