रुपन्देहीबाट ११ लाख ४७ हजार बराबरको अवैध सामान बरामद  

प्रहरी प्रवक्ता एवं प्रहरी नायव उपरीक्षक श्यामु अर्यालका अनुसार सोमबार साँझ ६ बजेतिर लुम्बिनी सांस्कृतिक नगरपालिका भगवानपुरमा भारतबाट नेपालतर्फ भन्सार छली लु १ च ३५२२ नं. को गाडीमा ल्याइएको काठको ढोका ५ वटा, पेन्ट (कलर) ३ बाल्टी (५० लिटर) र टायल ४० पेटीसहित ७ लाख ७ हजार ७ सय रुपैयाँ बराबरको सामान बरामद भएको हो । बरामद गरिएको सामान आवश्यक कारबाहीका लागि मंगलबार भैरहवा भन्सार कार्यालय वेलहिया बुझाइएको छ ।

यस्तै प्रहरी टोलीले सोमबार साँझ सिद्धार्थनगर नगरपालिका आवारोडबाट ४ लाख ४० हजार रुपैयाँ बराबरको सामान बरामद गरेको छ । भारतको महाराजगन्ज घर भई हाल सिद्धार्थनगर बस्ने २४ वर्षका औरेन्ज चौहानले भन्सार छलेर लु १ ह २६४३ नम्बरको अटो रिक्सामा २४ पेटी टायल ल्याएका थिए । चौहानसहित बरामद गरिएका सामान र गाडी मंगलबार भैरहवा भन्सार कार्यालयमा पठाएको प्रहरी प्रवक्ता अर्यालले बताए ।