पाल्पामा सामुदायिक विद्यालयका कर्मचारी आन्दोलित
पाल्पा — सेवा सुविधा बढाउन माग गर्दै पाल्पाका सामुदायिक विद्यालयका कर्मचारीहरू आन्दोलनमा उत्रिएका छन् । विद्यालयको ताला चाबी बुझाई सम्पूर्ण विद्यालय कर्मचारीहरुले आइतबार शिक्षा विकास तथा समन्वय एकाई पाल्पामा धर्ना दिन आएका हुन् ।
आन्दोलन परिचालन समितिका संयोजक युवराज पौडेलले सामुदायिक विद्यालयमा न्यून बेतनमा काम गर्नु परेको बताए । अहिले सरकारले विद्यालय कर्मचारीका लागि १३ हजार रुपैयाँ पठाउने गर्छ । कतिपय स्थानीय पालिकाले केही रकम थप गरेर दिने गरेको छ । कर्मचारीहरुको पूर्ण सेवा सुविधासहित पेसागत स्थायित्वको विषयमा सरकारले चासो नदिएको उनको आरोप छ ।
बजेट परिमार्जन गरेर जतिसक्दो छिटो सेवा सुविधा वृद्धि गर्न माग राखेको जिल्ला अध्यक्ष श्रीधरप्रसाद पाण्डेयले बताए । २६ गतेसम्म जिल्ला शिक्षा विकास तथा समन्वय इकाइमा धर्ना दिने कार्यक्रम छ ।
जेठ २७ गतेदेखि असार १ गतेसम्म काठमाडौंस्थित भद्रकालीमा रिले अनशन बस्ने नेपाल विद्यालय कर्मचारी परिषद्ले जनाएको छ । असार २ गतेदेखि माग सम्बोधन नहुन्जेल सम्पूर्ण सामुदायिक विद्यालयहरु बन्द गर्ने चेतावनी उनीहरुको छ ।
प्रकाशित : जेष्ठ २१, २०८० १६:५८