तिलोत्तमा — रुपन्देहीको बुटवल उपमहानगरपालिकाले किसानलाई कृषि सामग्री प्रदान गरेको छ । बुटवल–१४ मा मकै खेती गर्दै आएका किसानलाई उपमहानगरपालिकाले सहुलियतमा कृषि सामग्री उपलब्ध गराएको हो ।

बुटवल–१४ मोतीगन्जमा शनिबार आयोजित कार्यक्रममा बुटवल उपमहानगरपालिकाका प्रमुख खेलराज पाण्डेयले मोतीगन्ज मकै पकेट सञ्चालन समन्वय समितिलाई ती कृषि उपकरण तथा सामग्री हस्तान्तरण गरेका हुन् ।

प्रधानमन्क्री कृषि आधुनिकीकरण कार्यक्रमअन्तर्गत बुटवल उपमहानगरको ५० र किसानको ५० प्रतिशत लागत सहभागितामा पावर टिलर, मकै रोप्ने मेसिन, मकै छोडाउने मेसिन, मकै पिस्ने मेसिन, त्रिपाल, जैविक मल लगायत सामग्री प्रदान गरिएको हो । सो अवसरमा उपमहानगर प्रमुख पाण्डेयले तिनाउ पश्चिमका वडालाई कृषि उत्पादनमा अब्बल बनाउन उपमहानगरपालिकाले काम गरिरहेको बताए । किसानलाई लाभ हुने गरी गरिने खेतीमा सहयोग गर्ने उल्लेख गर्दै पाण्डेयले कृषि उत्पादनलाई बजारीकरण गर्न बुटवल उपमहानगरपालिकाले प्राथमिकतामा राखेको बताए ।

उपमहानगरपालिकाले मकै पकेट सञ्चालन समन्वय समितिलाई मकै बिक्रीका लागि सटर उपलब्ध गराउने तयारीमा रहेको पाण्डेले जानकारी दिए । उपमहानगर कृषि विकास शाखा प्रमुख सन्तोष जीसीले मकै पकेट विकास कार्यक्रममा आबद्ध किसानलाई मल, बीउ, कृषि यन्त्र आदिमा ५० प्रतिशत अनुदान दिएको बताए । मोतीगन्ज मकै पकेट सञ्चालन समन्वय समिति अध्यक्ष मुरारी खनालले पकेट क्षेत्रमा रामपुर ६, ८ र १० गरी ३ जातको हाइब्रिड र रामपुर कम्पोजिट नामको उन्नत जातका मकै खेती हुँदै आएको बताए ।