१७.१२°C काठमाडौं
काठमाडौंमा वायुको गुणस्तर: १५७

बाँकेमा अपांग बाल अस्पताल पुनःस्थापना केन्द्र स्थापना 

रुपा गहतराज

नेपालगन्ज — बाँकेको कोहलपुर नगरपालिका–१५ अकलघरुवास्थित नगर स्वास्थ्य प्रवर्द्धन केन्द्र र अपांग बाल अस्पताल पुनःस्थापना केन्द्रको शनिबार उद्घाटन गरिएको छ । नगर स्वास्थ्य प्रवर्द्धन केन्द्र र अपांग बाल अस्पताल पुनःस्थापना केन्द्रको शनिबार उद्घाटन गर्दै नेपाली कांग्रेसका महामन्त्री एवम् पूर्वस्वास्थ्यमन्त्री गगनकुमार थापाले स्वास्थ्य र शिक्षालाई पूर्णरुपमा निःशुल्क गरिनु पर्ने बताए ।

बाँकेमा अपांग बाल अस्पताल पुनःस्थापना केन्द्र स्थापना 

उनले कोहलपुर नगरपालिकाले सुरु गरेको नगर स्वास्थ्य प्रवर्द्धन केन्द्रको सेवालाई प्रभावकारी बनाउन सुझाव दिए ।

‘म स्वास्थ्यमन्त्री हुँदा नगर स्वास्थ्य प्रवर्द्धन केन्द्रको अवधारणा अघि सारेको हुँ,’ उनले भने, ‘यसका तीन वटा लक्ष्य छन् । नगर स्वास्थ्य प्रवर्द्धन केन्द्रको अवधारण भनेकै केन्द्र घरघरमा पुगेर जनताको स्वास्थ्य अवस्थाबारे जानकारी लिने, रोग लाग्नुभन्दा पहिल्यै अपनाउन सकिने सजगताबारे जानकारी प्रवाह गर्ने र उपचार पहुँचको दायरामा ल्याउने हो।’

विपन्न समुदायका र त्यसमा पनि अपांगता भएका बालबालिकाहरुको पहिचान गरी उनीहरुलाई उपचार गरेर समाजमा पुनःस्थापना गर्नु निकै ठूलो काम भएको भन्दै थापाले कोहलपुरमा केन्द्र संचालनपछि लुम्बिनी, कर्णाली र सुदूरपश्चिम प्रदेशका अपांगता भएका बालबालिकाहरुलाई उपचारमा निकै सहयोग पुगेको बताए ।

लुम्बिनी प्रदेशसभा सदस्य सञ्जुकुमारी चौधरीले थारु समुदायमा जनस्वास्थ्य समस्याको रुपमा रहेको सिकलसेल र थालेसेमियाका बिरामीको उपचारलाई निःशुल्क गरिनुपर्ने बताइन् । यस्तै लुम्बिनी प्रदेशसभा सदस्य बसन्ती अधिकारीले पनि स्वास्थ्य सेवालाई गुणस्तरीय बनाउन आवश्यक रहेको बताइन् ।

कोहलपुर नगरपालिकाका नगर प्रमुख पूर्णप्रसाद आचार्यले कोहलपुर गरपालिकाले स्वास्थ्य र शिक्षालाई पहिलो प्राथमिकतामा राखेर काम गरिरहेको बताए ।

कार्यक्रममा कांग्रेस बाँकेका सभापति नारायणप्रसाद गौडेल, अपांग बाल अस्पताल तथा पुनःस्थापना केन्द्रका निर्देशक डा.विवेक बाँस्कोटा, कोहलपुर नगरपालिकाका प्रमुख प्रशासकीय अधिकृत टीकाराम ढकाल, कोहलपुर नगरपालिका–१५ का वडाध्यक्ष दिपेन्द्र चौधरी, अपांग बाल अस्पताल तथा पुनःस्थापना केन्द्रका सूचना अधिकृत बिनिता खड्का लगायतले बोलेका थिए ।

कार्यक्रममा प्रवर्द्धन केन्द्र र अस्पताललाई जग्गा दान गर्ने जग्गादाता स्वर्गीय पुन्सी थारुको अर्धकदको सालिकसमेत पूर्वमन्त्री थापाले अनावरण गरेका थिए । स्वर्गीय थारुले १० कठ्ठा जग्गा दान गरेका छन् ।

प्रकाशित : चैत्र १८, २०७९ १९:११
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?