२५.१२°C काठमाडौं
काठमाडौंमा वायुको गुणस्तर: १३०

४.८६ किलोमिटर सडक स्तरोन्नतिका लागि विश्व बैंकको ५९ करोड सहयोग

सन्जु पौडेल

तिलोत्तमा — विश्व बैंकको सहयोगमा रुपन्देहीको तिलोत्तमा नगरपालिकामा निर्माणाधीन सडकको स्तरोन्नति हुने भएको छ । तिलोत्तमा ९ मंगलापुरदेखि कान्छी बजार जोड्ने सडकका लागि विश्व बैंकले सघाएको हो । उक्त सडकखण्डको बिहीबार एक कार्यक्रमका बीच शिलान्यास गरिएको छ । 

४.८६ किलोमिटर सडक स्तरोन्नतिका लागि विश्व बैंकको ५९ करोड सहयोग

४.८६ किलोमिटर लम्बाइको सडकको विश्व बैंकका कन्ट्री म्यानेजर फारिस हाडाड जेभों, र तिलोत्तमा नगरपालिकाका प्रमुख उपप्रमुखले शिलान्यास गरेका हुन् । सो कार्यक्रममा बोल्दै विश्व बैकका कन्ट्री म्यानेजर फारिस हाडाड जेभोंले नेपालका १० स्थानीय तहलाई कार्यक्रम दिएकोमध्ये तिलोत्तमा नगरपालिकाले काम सुरु गरेकोप्रति खुसी व्यक्त गरे । उनले कृषि उत्पादन र बजारीकरणका लागि सहजता होस् भन्ने उद्देश्यले ऋण सहयोग गरेको बताए ।

नगरपालिकाका प्रमुख रामकृष्ण खाँणले निर्माणाधीन सडक समयमा नै सम्पन्न हुने गरी काम भइरहेको बताए । यो सडकले त्यस क्षेत्रका व्यक्तिलाई आर्थिक उपार्जनमा जोड्ने बताए । कृषिलाई आर्थिक विकाससँग जोडेर बाटो बनाउन विश्व बैंकले सहयोग गरेको छ,’ उनले भने, ‘निर्माण सम्पन्न हुनका लागि स्थानीयको समेत सहयोगको आवश्यकता छ । उनले बजारका सहरी सडकजस्तै सडक बन्ने बताउँदै कृषि उत्पादन, बजारीकरण, आवतजावत, अन्तर्राष्ट्रिय विमानस्थल तथा सिमानाका पुग्न सहजता र आन्तरिक पर्यटक भित्र्याउनका लागि निकै महत्त्वपूर्ण सावित हुने बताए । खाँणले अहिले सडकको लम्बाई ४.८६ किलोमिटर रहे पनि अझै १.२ किलोमिटर थप्ने पहल गरेको बताए ।

कार्यक्रममा बोल्दै तिलोत्तमा नगरपालिकाका उपप्रमुख जागेश्वरीदेवी चौधरीले निर्माणाधीन सडकले तिलोत्तमा ७ देखि ९ का स्थानीयलाई निकै फाइदा पुग्ने बताइन् । उनले निर्माण कम्पनीलाई समयमा काम सम्पन्न गर्न आग्रह गरिन् ।

तिलोत्तमा नगरपालिका प्रमुख प्रशासकीय अधिकृत नारायण अर्यालले सडकको २०७९ भदौ २३ गतेदेखि सम्झौता सुरु भएको बताए । उनले अहिलेसम्म १४ प्रतिशत काम सम्पन्न भइसकेको बताए । उनले साइट क्लियरेन्स तटबन्ध भर्ने, ढुङ्गा चिन्नेलगायत काम भइरहेको बताए ।

नेपाल अर्बन गभरमेन्स एन्ड इन्फास्ट्रक्चर प्रोजेक्टअन्तर्गत निर्माणाधीन सडक २०८१ भदौ २२ गते सम्पन्न गर्ने गरी ५९ करोड ३ लाख ८ हजार ८ सय ९० रुपैयाँमा शर्मा सगुन जेभी बुटवलले ठेक्का पाएको नगरपालिकाका इन्जिनियर प्रदीप बलले जानकारी दिए । उनका अनुसार सडकको चौडाई १३ मिटरसम्म हुनेछ । नालीमाथि २.७५ मिटर फुटपाथ हुनेछ । १२ वटा बक्स र १५ वटा पाइपका कल्भर्टहरू निर्माण हुनेछन् ।

नेपाल अर्बन गभरमेन्स एन्ड इन्फास्टक्चर प्रोजेक्टका निर्देशक रवीन्द्र बोहराले सडक निर्माणमा गुणस्तरीय सामाग्रीहरूको प्रयोग गर्दै आएको बताउँदै यसको नियमित निरीक्षण र अनुगमन आवश्यक रहेकोमा जोड दिए ।

प्रकाशित : चैत्र १६, २०७९ १९:४६
प्रतिक्रिया
पठाउनुहोस्
जनताको राय

सहकारी ठग्नेलाई कारबाहीको दबाब दिन प्रमुख विपक्षी दल कांग्रेसले गरेको सडक आन्दोलन घोषणालाई कसरी लिनुभएको छ ?