बुटवल — बुटवलको तिनाउ नदीमा पौडी खेल्ने क्रममा डुबेर एक बालकको मृत्यु भएको छ । बुटवल उपमहानगरपालिका–११ मझुवा बस्ने बाग्लुङ घर भएका विष्णु विकका छोरा ९ वर्षीय प्रिन्स विकको मृत्यु भएको हो ।
उनी आइतबार दिउँसो बुटवल–६ सुन्दरनगरस्थित तिनाउ नदीमा पौडी खेल्न गएका थिए ।
साथीसहित पौडी खेल्न गएका उनको डुबेर मृत्यु भएको जिल्ला प्रहरी कार्यालय रुपन्देहीले जनाएको छ ।
तनहुँ — पृथ्वीराजमार्गअन्तर्गत तनहुँको विमलनगरदेखि घाँसीकुवा सडकखण्ड थप १९ दिनका लागि बन्द गरिने भएको छ । सडक विस्तारका लागि सडक चौडा बनाउन भित्तो काट्ने काम भइरहेकाले उक्त सडकखण्ड रातिको समयमा ४ घण्टा बन्द गरिने सहायक प्रमुख जिल्ला अधिकारी काशीराम गैरेले जानकारी दिए ।
मुग्लिन–पोखरा सडक विस्तार आयोजनाको पूर्वी खण्डअन्तर्गत विमलनगरदेखि घाँसीकुवा खण्डमा मर्मतका लागि चैत १२ देखि ३० गतेसम्म रातिको समयमा ४ घण्टा राजमार्ग बन्द गरिने भएको छ ।
‘पूर्वी खण्डको यस सडकखण्डमा भित्तो कटानको काम अझै बाँकी रहेको र रातिको समयमा यातायातको चाप पनि कम हुने हुँदा अत्यावश्यक बाहेक अन्य सवारी आवगमन बन्द गरी काम गर्न लागिएको हो,’ प्रजिअ गैरेले भने ।
यसअघि २ पटक समय थप गरिए पनि भित्तो कटान कार्य नसकिएकाले समय थपिएको उनले बताए । जिल्ला प्रशासन कार्यालयले पहिलो पटक फागुन १८ देखि २७ गतेसम्म र दोस्रो पटक सोही खण्ड फागुन २८ देखि चैत १२ गतेसम्म राति १२ देखि बिहान ४ बजेसम्म बन्द गरी सडकको भित्तो काट्ने काम गरिने जानकारी गराएको थियो ।
उक्त समयसम्म अत्यावश्यक सवारी साधानबाहेक सवारी साधन पूर्णरूपमा बन्द गरी काम गर्ने जिल्ला सुरक्षा समिति बैठकले निर्णय गरेको कार्यालयले जनाएको छ ।
प्रकाशित : चैत्र १२, २०७९ १९:५०
