कान्तिपुर वेबसाईट
AdvertisementAdvertisement
२०.१२°C काठमाडौं
काठमाडौंमा वायुको गुणस्तर: १६४

सहिद मार्गको निर्माण ५ खण्डमा

तीन वर्षभित्र कालोपत्र गर्ने लक्ष्य, कार्यक्षेत्रमै आयोजना कार्यालय स्थापना
काशीराम डाँगी

रोल्पा — डेढ दशकदेखि निर्माणाधीन रोल्पा–रुकुमको मेरुदण्ड मानिएको सहिद मार्गको निर्माण अघि बढ्ने भएको छ । सहिद मार्ग आयोजना कार्यालयले सडक क्षेत्रमै कार्यालय स्थापना गरेर निर्माणमा तीव्रता दिने गरी काम सुरु गरेको हो । यसअघि लिबाङमै कार्यालय हुँदा निर्माणले गति लिन सकेको थिएन । अहिले होलेरी–नुवागाउँ सडक खण्डको दहवनमा कार्यालय सारिएको छ ।

सहिद मार्गको निर्माण ५ खण्डमा

सहिद मार्ग आयोजना कार्यालयका प्रमुख इन्जिनियर पवन भट्टराईले कार्य क्षेत्रमै कार्यालय सारेर कामलाई तीव्रता दिन लागिएको बताए । शान्ति प्रक्रियापछिका सरकारले माओवादी सशस्त्र द्वन्द्व सकिएपछिको यस क्षेत्रकै ठूलो योजनाका रुपमा सहिद मार्ग आयोजनालाई अघि बढाएको छ । तर, निर्माण कार्यमा ढिलाइले स्थानीय निराश छन् । सहिद मार्ग निर्माण पूरा भएमा रोल्पा–रुकुमका दर्जनौं गाउँमा बाह्रै महिना यातायातका साधन गुड्ने छन् । सडक यातायातका माध्यमबाट तत्कालीन सशस्त्र द्वन्द्वका बेला पुग्न नसकेको विकास योजना दुर्गमसम्म पुर्‍याउने सरकारको लक्ष्य अनुसार उक्त आयोजना सञ्चालनमा ल्याइएको हो । पुष्पकमल दाहाल पहिलो पटक प्रधानमन्त्री भएका बेला उनकै पहलमा आयोजना थालिएको थियो । दाहाल २०६४ मा रोल्पाबाटै विजयी भएर प्रधानमन्त्री बनेका थिए ।

दाहाल नेतृत्वको सरकारले यस योजनालाई प्राथमिकतामा पारेको थियो । तर, आवश्यकता अनुसारको बजेट अभावले सडक निर्माण रोकिंदै आएको थियो । माओवादीले थालेको सशस्त्र द्वन्द्वका बेलामा ज्यान गुमाएका व्यक्तिहरूको स्मृतिमा उक्त सडकको नामकरण गरिएको हो । त्यस अवधिमा रोल्पा, रुकुम र आसपासमा २ हजार भन्दा बढी मानिसले ज्यान गुमाएका थिए । दाङको घोराहीदेखि रोल्पाका अधिकांश गाउँ हुँदै रुकुम पूर्वको पुथाउत्तरगंगासम्म लैजाने उक्त सडकलाई खण्ड–खण्ड पारेर कालोपत्र गर्ने योजना चलिरहेको छ । तीन जिल्ला जोड्ने तत्कालीन राप्तीको मुख्य मेरुदण्ड मानिएको उक्त सहिद मार्ग २ सय २० किलोमिटर लामो छ । सडकले दाङको घोराही उपमहानगरसँग रोल्पाका ५ वटा र रुकुम पूर्वका २ वटा गाउँपालिका जोड्छ ।

सहिद मार्गअन्तर्गत दारबोट–घर्तीगाउँ सडक खण्डको करिब ३० किलोमिटर सडकमा यसै आर्थिक वर्षभित्र कालोपत्र गर्ने योजना छ । सहिद मार्ग कार्यालयले त्यसका लागि धमाधम काम भइरहेको जनाएको छ । सहिद मार्ग आयोजना कार्यालयका अनुसार कालोपत्र गर्न ठेक्का भइसकेको छ । कम्तीमा दुई लाइन सडक कालोपत्र गरिसक्ने योजना सहिद मार्ग कार्यालय प्रमुख इन्जिनियर भट्टराईले बताए । उनका अनुसार सरकारले उक्त सडक चाँडै निर्माण गरिसक्ने नीति अघि सारे अनुसार सडक चौडा बनाउने, नाला बनाउने र कालोपत्रका लागि पूर्वाधार तयार पार्ने काम धमाधम भइरहेको छ । सहिद मार्गले प्रभाव पार्ने गाउँपालिकाका जनप्रतिनिधिले पनि सहिद मार्गको कार्य छिटो सम्पन्न गर्नका लागि सहयोग गर्दै आएका छन् । रोल्पाको मध्य भागमा रहेको माडी गाउँपालिकाका अध्यक्ष अमरसिंह घर्तीमगरले सहिद मार्ग गुणस्तरीय बनाउन सहयोग गर्नुपर्ने बताए । उनले पार्टी अध्यक्ष पुष्पकमल दाहाल पुनः प्रधानमन्त्री भएका बेला भेटेरै ध्यानाकर्षण गराएको बताए । ‘हामीले यो आयोजना छिटो सम्पन्न गराउन प्रधानमन्त्रीसँग भेटेरै ध्यानाकर्षण गराएका छौं,’ उनले भने, ‘अब तीव्र गतिमै काम अघि बढ्नेछ ।’

सहिद मार्गलाई २०८३ सालसम्ममा कालोपत्र गरिसक्ने लक्ष्य अनुसार कम्तीमा ५ खण्डमा विभाजित गरेर काम गर्ने योजना बनाइएको इन्जिनियर भट्टराईले बताए । घोराही–होलेरीको पुनः कालोपत्र गरेपछि होलेरीदेखि दारबोटसम्म अर्को वर्षमा कालोपत्र गरिनेछ । दुई वर्षभित्रमा दोरबोटदेखि घर्तीगाउँसम्म र त्यसै अनुसार घर्तीगाउँदेखि दुईखोलीसम्म, दुईखोलीदेखि थबाङसम्म कालोपत्र गर्ने योजना वर्षैपिच्छे सम्पन्न गर्दै जाने योजना छ । थबाङदेखि रुकुम पूर्वको महत, खाबाङ, क्राँक्री, तकसेरा हुँदै हुकाम मैकोटसम्म करिब चार वर्षभित्र सडकको सबै भाग कालोपत्र गर्ने योजना छ । सहिद मार्गले रोल्पाका रोल्पा नगरपालिकासहित रुन्टीगढी, त्रिवेणी, माडी, परिवर्तन र थबाङ गाउँपालिकालाई जोड्छ । यस्तै रुकुम पूर्वको भूमे गाउँपालिकाको महत गाउँदेखि काँक्री हुँदै पुथा उत्तरगंगा गाउँपालिकाको तकसेरा, हुकाम, मैकोट लगायतका गाउँ जोड्छ ।

रुकुम पूर्वको पुथाउत्तरगंगामा पर्ने हुकामदेखि मैकोट गाउँसम्मको अन्तिम स्थानमा ट्र्याक खन्न बाँकी रहेको करिब १२ किलोमिटर सडक खुलाउने योजना चालू आार्थिक वर्षमा अघि बढाइएको छ । त्यसका लागि विस्तृत परियोजना प्रतिवेदन (डीपीआर) तयार भइसकेको छ । सडकअन्तर्गत बनाउनु पर्ने अधिकांश पुल निर्माण गरिसकिएको छ । रुकुम पूर्वको उत्तरगंगा खोलामा भने पुल बनाउन बाँकी छ ।

सहिद मार्ग निर्माणमा हाल चारवटा ठेकेदार कम्पनीले काम गरिरहेका छन् । सहिद मार्ग निर्माणमा हालसम्म करिब २ अर्ब २५ करोड बजेट खर्च भइसकेको छ । इन्जिनियर भट्टराईका अनुसार यो रकम कुल लागतको २२ प्रतिशत मात्रै हो । कालोपत्रसमेत गरी सडकको निर्माण लागत करिब १२ अर्ब पुग्ने अनुमान छ । अहिलेसम्म १७ वटाभन्दा बढी सडक पुल बनाइएका छन् । सडक निर्माणमा सरकारले वर्षमा करिब ५० करोड बजेट छुट्याउने गरेको छ ।

प्रकाशित : चैत्र ६, २०७९ ११:१४
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?