‘प्रदेशलाई अधिकारसम्पन्न बनाउनुपर्छ’

रूपन्देही — लुम्बिनी प्रदेश प्रमुख अमिक शेरचनले प्रदेशलाई अधिकारसम्पन्न बनाउनुपर्ने बताएका छन् । प्रदेशको छैटौं स्थापना दिवसको अवसरमा शनिबार आयोजित कार्यक्रममा शेरचनले संविधानको पूर्ण कार्यान्वयन गर्दै प्रदेशलाई अधिकार सम्पन्न बनाउन राजनीतिक दलको जिम्मेवारी मुख्य हुने बताएका हुन् ।

‘संविधानमा कतै उल्लेख छैन, संघीय सरकारको इकाइ प्रदेश हो भनेर, हामी यो भ्रमबाट मुक्त हुनुपर्छ,’ उनले भने, ‘संघीयतालाई बलियो बनाउन संविधान पूर्ण कार्यान्वयन हुनुपर्छ ।’ संविधानमा उल्लेखित तीन तहका सरकारका साझा अधिकारको सूचीलाई कार्यान्वयन गर्न साझा कार्यक्रम बनाउन पनि उनले संघीय सरकारको ध्यानाकर्षण गराए ।

दाङको देउखुरीमा विभिन्न झाँकी र र्‍यालीसहित कार्यक्रम सम्पन्न गरिएको हो । कार्यक्रमलाई मुख्यमन्त्री लीला गिरी, प्रमुख प्रतिपक्ष दलका नेता डिल्लीबहादुर चौधरी, सभामुख तुलाराम घर्ती, उपसभामुख मेनुका खाँण केसीले सम्बोधन गर्दै अबको पाँच वर्ष जनताको हित हुने गरी कानुन निर्माण र कार्यान्वयन गर्ने प्रतिबद्धता व्यक्त गरेका थिए । कार्यक्रमका अवसरमा प्रदेशको अस्थायी राजधानी तथा पहिलो प्रदेश सभा सञ्चालन र व्यवस्थापनमा सहयोग गर्ने बुटवल उद्योग वाणिज्य संघ, नेपाल मानव सेवा आश्रम बुटवल, बुटवल महिला जेसिज र पश्चिमाञ्चल पेट्रोलियम डिलर एसोसियन बुटवललाई कृतज्ञतासहित सम्मान गरिएको थियो । प्रदेश स्थापना दिवसमा आयोजित मैत्रीपूर्ण भलिबल प्रतियोगिताका विजेता र सहभागीलाई प्रमाणपत्र पनि प्रदान गरिएको थियो । लुम्बिनी प्रदेशमा २०७४ माघ २१ मा पहिलो बैठक बसेको थियो । त्यसैलाई आधार बनाएर प्रदेश सभा सचिवालयले हरेक वर्ष माघ २१ लाई प्रदेश स्थापना दिवसका रूपमा मनाउने गरेको थियो ।