बर्दिया — नेपाल वन पैदावार उद्योगी व्यवसायी संघको अध्यक्षमा पुनः कुबेर केसी निर्वाचित भएका छन् । आठौं साधरणसभा र छैटौं अधिवेशनले केसीको नेतृत्वमा सबै निर्विरोध निर्वाचित भएका छन् ।
संघको उपाध्यक्षमा फूलपाति चौधरी, सचिव नेत्रप्रसाद शर्मा, कोषाध्यक्षमा रामचन्द्र अर्याल निर्वाचित भएका हुन् ।
यसैगरी सदस्यमा श्यामलाल थारु, सुशीला राना भाट र निरंकार यादव निर्वाचित भएको संघका सचिव शर्माले जनाए ।
धनकुटा — सहिद रामकृष्ण श्रेष्ठ स्मृति प्रतिष्ठान धनकुटाको आयोजनामा आउँदो सोमबारदेखि अन्तरपालिकास्तरीय नकआउन महिला फुटबल प्रतियोगिता हुँदैछ । मंगलबार आयोजित पत्रकार भेलामा यही माघ २३ देखि २६ गतेसम्म रामकृष्ण स्मृति महिला फुटबलको तेस्रो शृंखला सुरु हुने जानकारी दिइएको हो ।
प्रतियोगितामा जिल्लाका सात वटा पालिकाका खेलाडी सहभागी हुने भएका छन् ।
२०७६ मा पहिलो पटक प्रदेश नं.१ स्तरीय महिला फुटबल प्रतियोगिता गरिएको थियो । त्यसपछिका शृंखला आर्थिक कारण अन्तरपालिकास्तरीय प्रतियोगितामा सीमित पार्नु परेको प्रतिष्ठानका अध्यक्ष ईश्वर श्रेष्ठले जानकारी दिए । प्रतियोगिताका विजेताले ६० हजार र उपविजेताले ३० हजार रुपैयाँ नगदसहित ट्रफी प्राप्त गर्ने छन् । प्रत्येक खेलमा ओमेन अफ द म्याच र विधागत पुरस्कारमा समेत नगद पुरस्कार दिइने आयोजक समितिका सल्लाहकार तथा धनकुटा फुटबल संघका पूर्वअध्यक्ष गोविन्द राईले बताए ।
प्रतियोगिता सञ्चालनका लागि पाँच लाख ४० हजार रुपैयाँ संकलन भएको आयोजक समितिका सचिव कृष्ण भागवत श्रेष्ठले जानकारी दिए । यस्तै, ३ लाख ५० हजार अनुमानित खर्च हुने उनले जनाए ।
धनकुटा नगरपालिका वडा नं. ७ निवासी रामकृष्ण श्रेष्ठको २०३० चैत ३ गते विराटनगरमा तत्कालीन राजा वीरेन्द्रमाथि बम प्रहारको घटनामा निधन भएको थियो । श्रेष्ठलाई २०७४ साल माघ ३ गते तत्कालीन सरकारले राष्ट्रिय सहिद घोषणा गरेको थियो ।
प्रकाशित : माघ १७, २०७९ १७:३८
