२७.१२°C काठमाडौं
‘चर्को घरभाडा र बैंक ब्याजले व्यवसाय पलायन बढ्यो’
बुटवल — आर्थिक मन्दीसँगै चर्को घरभाडा र बैंक ब्याजका कारण व्यवसायी पलायन हुने क्रम बढेको रुपन्देहीका व्यवसायीहरूले गुनासो गरेका छन् । स्थानीय सरकारले राजस्व संकलन बढाउने भन्दै कर उठाउने कुरालाई मात्रै प्राथमिकतामा राख्दा आर्थिक संकट झेलेका व्यवसायीहरू पसल बन्द गरेर बस्ने र बजारबाट विस्थापित हुने क्रम बढेको व्यवसायीहरूले जनाए ।
रुपन्देही व्यापार संघले शुक्रबार बुटवलमा आयोजना गरेको घरबहालसम्बन्धी अन्तरक्रियामा बोल्ने व्यवसायीहरूले पछिल्लो समयमा आएको आर्थिक संकटका कारण व्यवसाय ७० प्रतिशतले घटेको तथ्यांक प्रस्तुत गरे । उनीहरूले पछिल्लो एक सातामा बुटवल बजार क्षेत्रमा दैनिक रुपमा करिब एक सयवटा सटरहरू खाली हुने गरेको बताउँदै बजार विस्थापन हुने खतरा बढेर गएको जनाए ।
रुपन्देही व्यापार संघका अध्यक्ष कृष्णप्रसाद घिमिरेले चर्को घरभाडा र बैंक ब्याजलाई कम गर्नेतर्फ दबाब सिर्जना नगरिए धेरै व्यवसायीहरुले आत्महत्याको बाटो रोज्ने खतरा बढेको बताए ।
व्यवसायी डिल्लीराज भण्डारीले आर्थिक संकटबाट व्यवसायलाई बचाउने उपायको खोजी गर्न स्थानीय सरकारले सर्वपक्षिय छलफल गरी निष्कर्ष निकाल्नुपर्ने बताए ।
कार्यक्रममा बुटवल उपमहानगरपालिकाका उपमेयर सावित्रा अर्यालले राजस्व संकलनमा कडाइ गरिने तर आर्थिक संकटका बेलामा व्यवसायीहरूको हितविपरीत गएर काम नगर्ने प्रतिबद्धता जनाइन् ।
प्रकाशित : माघ १३, २०७९ १९:३४
