बुटवलद्वारा जलस्रोत नीति र रात्रिकालीन बजार सञ्चालन गर्ने प्रस्ताव पारित- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

बुटवलद्वारा जलस्रोत नीति र रात्रिकालीन बजार सञ्चालन गर्ने प्रस्ताव पारित

अमृता अनमोल

काठमाडौँ — बुटवल उपमहानगरपालिकाको १२औं अधिवेशनले जलस्रोत नीति पारित गरेको छ । पुस २१ गते सुरु भएको नगरसभाले कर्मचारी दरबन्दीसम्बन्धी संगठन तथा व्यवस्थापन संरचना, स्वास्थ्य ऐनसमेत संशोधनसहित पारित गरेको छ । त्यस्तै अधिवेशनले बुटवलभित्र रात्रिकालीन बजार सञ्चालन गर्ने निर्णय गरेको छ ।

नदीजन्य पदार्थको अवैध उत्खनन तथा चोरीनिकासीमा नियन्त्रण, नागरिक बडापत्रलाई तीन भाषामा प्रकाशन गर्ने प्रस्ताव पारित गरेको नगरसभाका सचिव तथा प्रमुख प्रशासकीय अधिकृत टेकराज पन्थीले जानकारी दिए ।

यस्तै, नगरसभाले यसअघि गठन भएका समिति, उपसमिति, परिषद् र आयोगहरूको नयाँ गठन प्रक्रिया अगाडि बढाउने, बुटवलभित्रका पार्कहरूलाई नगर मातहत ल्याउन कानुन बनाउने, टोलविकास संस्थाहरूलाई व्यवस्थित गर्ने प्रस्ताव सर्वसम्मत पारित गरेको छ ।

नगरसभामा सम्बोधन गर्दै नगरसभाका अध्यक्ष तथा बुटवल उपमहानगरपालिकाका प्रमुख खेलराज पाण्डेयले बुटवललाई अगुवा सहरका रुपमा स्थापित गर्नका लागि सबै जनप्रतिनिधि र राष्ट्रसेवक कर्मचारी एकजुट भएर अगाडि बढ्ने बताए । उनले बुटवललाई ‘समानता, स्वाभिमान र अवसरसहितको बस्नयोग्य शहर’ का रुपमा स्थापित गर्दै आर्थिक केन्द्र र मानव संशाधनका दृष्टिले उच्च क्षमताको जनशक्ति उत्पादन र खपत गर्ने सहरका रुपमा स्थापित गर्ने समेत जनाए ।

प्रकाशित : माघ ११, २०७९ १८:०८
प्रतिक्रिया
पठाउनुहोस्

राष्ट्रिय योजनामा सुनचाँदीका विषय समावेश गर्न व्यवसायीको आग्रह

कान्तिपुर संवाददाता

काठमाडौँ — नेपाल सुनचाँदी व्यवसायी महासंघले राष्ट्रिय योजनामा सुनचाँदीका विषय समावेश गर्न आग्रह गरेको छ । नेपाल सुनचाँदी व्यवसायी महासंघका अध्यक्ष माणिकरत्न शाक्यको नेतृत्वमा बुधबार महासंघको प्रतिनिधीमण्डलले राष्ट्रिय योजना आयोगका उपाध्यक्ष डा. मीन बहादुर श्रेष्ठसँग भेट गरी सुनचाँदीका विषयलाई देशको पञ्चवर्षीय योजनामा समावेश गर्न आग्रह गरेको हो ।

महासंघले अघि सारेका सुनको उत्खनन, निकासी–पैठारी, ओसारपसार, कालिगढको व्यवस्थापन र तालिम लगायतका विषयलाई सम्बोधन गर्न आयोगले आफ्नो तर्फबाट सक्दो सहयोग गर्ने आयोगका उपाध्यक्ष श्रेष्ठले प्रतिवद्धता जनाएका थिए । भेटका क्रममा महासंघका अध्यक्ष शाक्यले सुनचाँदी व्यवसायमा परेको समस्या र तिनको समाधानका विषयमा आफ्नो धारणा राखेका थिए । उनले सुनको कारोबारका क्रममा नीतिको अभाव भएको उल्लेख गर्दै यसतर्फ आवश्यक पहल गर्न समेत उपाध्यक्ष श्रेष्ठलाई आग्रह गरेका थिए ।

सुुनचाँदीको विषयलाई देशको योजनामा समावेश गर्नसके यसबाट सबैलाई फाइदा हुने श्रेष्ठको भनाइ थियो । भेटका क्रममा महासंघका तर्फबाट उपाध्यक्ष दियसरत्न शाक्य, महासचिव धर्मशुन्दर वज्राचार्य, सहकोषाध्यक्ष पद्मशुन्दर शाक्य लगायको उपस्थिति थियो ।

प्रकाशित : माघ ११, २०७९ १८:०४
पूरा पढ्नुहोस्
प्रतिक्रिया
पठाउनुहोस्
×