लुम्बिनीका मुख्यमन्त्री गिरीले आज विश्वासको मत लिँदै

लुम्बिनीमा नेकपा माओवादी केन्द्र, राप्रपा, नागरिक उन्मुक्ति, जसपा, जनमत, लोसपा र २ स्वतन्त्र गरी ५८ प्रदेशसभा सदस्यको समर्थनमा गिरी मुख्यमन्त्री नियुक्त भएका हुन् । सरकारलाई समर्थन गरेका सबै दलले आज मुख्यमन्त्री केसीलाई विश्वासको मत दिने एमाले संसदीय दलका उपनेता एवं सरकारका प्रवक्ता चेतनारायण आचार्यले बताए ।

विश्वासको मत मात्र कार्यसूची रहेको प्रदेशसभाको चौथो बैठक आज दिउँसो १ बजे दाङको देउखुरीमा बस्दै छ । मुख्यमन्त्री गिरीले शपथ ग्रहणकै दिन तीन सदस्यीय मन्त्रिपरिषद् गठन गरेका थिए । सरकार विस्तार नहुँदा अन्य दुई मन्त्रीले पनि जिम्मेवारी पाएका छैनन् । मुख्यमन्त्री गिरीले विश्वास मत लिएपछि प्रदेशसभाका विषयगत समिति गठन गर्ने र त्यसपछि मात्र मन्त्रिपरिषद् विस्तार गर्ने तयारी गरेका छन् । सत्ता साझेदारीमा रहेका एमाले र माओवादीमा मन्त्रीका आकांक्षी बढी भएको र साना दलको संख्या पनि धेरै हुँदा भागबण्डा मिलाउन समस्या परेपछि लुम्बिनी प्रदेशको मन्त्रिमण्डल विस्तारमा समय लाग्ने भएको माओवादी केन्द्रका प्रदेश अध्यक्ष सुदर्शन बरालले बताए ।

८७ सदस्यीय लुम्बिनी प्रदेशसभामा एमालेका २९, कांग्रेसका २७, माओवादी केन्द्रका १०, राप्रपा र नागरिक उन्मुक्तिका ४/४, जसपा, जनमत र लोसपाका ३/३, स्वतन्त्र २ र नेकपा एकीकृत समाजवादी र राष्ट्रिय जनमोर्चाका १/१ सदस्य छन् । विपक्षीमा रहेका कांग्रेस, नेकपा समाजवादी र जनमोर्चासँग पनि सरकारलाई समर्थन गर्ने विषयमा छलफल भइरहेको एमाले नेता एवं प्रदेशसभा सदस्य भूमिश्वर ढकालले बताए ।