दाङ — लुम्बिनी प्रदेशसभाको उपसभामुखमा राष्ट्रिय प्रजातन्त्र पार्टीकी मेनुका खाँड केसी निर्विरोध निर्वाचित भएकी छन् ।मंगलबार बसेको प्रदेशसभाको पहिलो अधिवेशनको तेस्रो बैठकमा उनी निर्वाचित भएको प्रदेशसभा सचिव दुर्लभकुमार पुन मगरले जानकारी दिए ।

अन्य दुई उम्मेदवारले उम्मेदवारी फिर्ता लिएपछि केसी निर्विरोध भएकी हुन् । उपसभामुखमा नागरिक उन्मुक्ति पार्टीकी निर्मलादेवी थारु चौधरी र नेपाली कांग्रेसका विश्वप्रेम पाठकले पनि उम्मेदवारी दिएका थिए ।

सत्ता गठनबन्धनमा कुरा नमिलेपछि उम्मेदवारी दिएकी चौधरीले अन्तत: सत्ता गठबन्धनका तर्फबाट राप्रपाकी उम्मेदवार केसीलाई समर्थन गर्ने निर्णय गरेकी थिइन् ।

अन्त्यमा कांग्रेसका पाठकले पनि उम्मेदवारी फिर्ता लिएका थिए । सांसद् इन्द्रजीत थारुले उपसभामुखमा केसीलाई निर्वाचित गरियोस् भनी प्रस्ताव गरेकोमा सांसद् चन्द्रकेश गुप्ताले समर्थन गरेपछि ज्येष्ठ सदस्य भुसालले केसीलाई निर्विरोध निर्वाचित भएको घोषणा गरेका थिए ।

सभामुखमा भने नेकपा माओवादी केन्द्रका तुलाराम घर्ती निर्विरोध निर्वाचित भइसकेका छन् । सोमबार प्रदेशसभा सचिवालयमा उम्मेदवारी दर्ता गर्ने समयसम्म सभामुखमा उनको मात्र उम्मेदवारी दर्ता भएपछि घर्ती निर्विरोध निर्वाचित भएका हुन् ।