गाउँकै स्वास्थ्य चौकीमै डाक्टर देखेपछि अचम्म !

पटक–पटक जिल्ला अस्पताल बिजुवार पुग्दा डाक्टर छैनन् भन्ने सुनेका उनले गाउँको स्वास्थ्य चौकीमा एमबीबीएस डाक्टर देख्दा झट्ट पत्याएनन् । तर, उनले देखेको र सुनेको सत्य थियो । ऐरावती गाउँपालिकाले पुरनठाँटी स्वास्थ्य चौकीमा गएको डेढ वर्षदेखि एमबीबीएस डाक्टरको व्यवस्था गरेको छ ।

‘स्वास्थ्य चौकीमा डाक्टर देख्दा पहिले त पत्यार लागेन,’ उनले भने, ‘छोरीको उपचार गरेपछि विश्वास लाग्यो ।’ स्वास्थ्य चौकीमा भिडियो र सादा एक्सरे सेवा पनि प्रदान गरिंदै आएको स्वास्थ्यकर्मी बताउँछन् । ईसीजी र ल्याव सेवा पनि सञ्चालन हुँदा यस क्षेत्रका नागरिकलाई जिल्ला अस्पताल धाउनुपर्ने बाध्यता हटेको स्वास्थ्यकर्मी सुनिता केसीले बताइन् ।

‘गाउँपालिकाले आफैं डाक्टरको व्यवस्था गरेको हो,’ उनले भनिन् । गाउँपालिकाले एक्सरे, भिडियो एक्सरेसहितको सेवा विस्तार गर्न सहजीकरणसहित सहयोग गरेको हो ।

सुपथ मूल्ययमै भिडियो एक्सरे सेवा स्वास्थ्य चौकीमै पाउँदा गर्भवती महिला बढी लाभान्वित भएको स्थानीय मुना रावतले बताइन् । ‘जिल्ला अस्पतालमा भिडियो एक्सरे सेवा बन्द भएको महिनौं भयो भन्ने सुनेका छौं,’ उनले भनिन्, ‘यता त स्वास्थ्य चौकीमै भिडियो एक्सरे हुन्छ ।’ सानातिना रोग लाग्दा पनि उपचार नपाएर मर्ने दिन अब गएजस्तो लागेको उनले सुनाइन् ।