१७ वर्षपछि रेसुंगा विमानस्थलमा उडान

जहाजको अवतरणसँगै नियमित उडान भएमा रेसुंगा विमानस्थलबाट कम्तीमा ४७ मिनेटमा काठमाडौं पुगिने भएको छ । तम्घासबाट काठमाडौं पुग्न सहज भएको अवस्थामा सडक यात्राबाट कम्तीमा १२ घण्टा लाग्छ । १ सय ५६ रोपनी क्षेत्रफलमा फैलिएको विमानस्थलको ५ सय २० मिटर लम्बाइ र २० मिटर चौडाइको पक्की धावनमार्ग छ । धावनमार्ग सम्याउने काम सकेर २०७६ जेठ २५ गते धुले रनवेमै परीक्षण उडान गरिएको थियो । त्यसपछिको संरचना निर्माणमा भएको ढिलाइले नियमित उडान प्रभावित भएको थियो ।

तारा एयरका क्याप्टेनद्वय सञ्जीव श्रेष्ठ र सन्तोष शाहले प्रुभिङ उडान गरेका थिए । क्याप्टेन श्रेष्ठले रेसुंगा विमानस्थलमा उडानमा कुनै समस्या नभएको बताए । ‘हामीले परीक्षण गर्दाखेरि गुल्मीमा ल्यान्डिङ टेकअफका लागि कुनै समस्या देखिएन, यहाँको रनवे, वातावरण सबै राम्रो देखिएको छ,’ उनले भने, ‘फ्लाइट गर्न कुनै समस्या नदेखिएको, पार्किङको व्यवस्था र टावर पनि राम्रो र रनवे पनि राम्रो बनाइएको छ ।’ विमानस्थलमा दिनभर जसो नै उडान गर्न सकिने नेपाल नागरिक उड्डयन प्राधिकरणले जनाएको छ ।

तारा एअरका प्रवक्ता सुदर्शन बर्तौलाले इलाम मोडलमा नगरपालिकाले सम्झौता गरेमा उडान नियमित गर्न सकिने बताए । उनका अनुसार इलाममा ११ जना यात्रु बराबरको हवाई भाडाको सुनिश्चितता नगरपालिकाले गरेको छ । ‘इलाम मोडल अनुसार रेसुंगा नगरपालिकाले सम्झौता गर्‍यो भने हामीले नियमित उडान गर्न सक्छौं,’ उनले भने । उनका अनुसार गुल्मी–काठमाडौं उडानको हवाई भाडा तत्कालका लागि ८ देखि ९ हजार रुपैयाँसम्म पर्न जान्छ । ‘यो अहिलेको इन्धनको मूल्यको आधारमा हो,’ उनले भने, ‘इन्धनको मूल्य परिवर्तन भयो भने यसमा फरक पर्छ ।’ ‘प्रुभिङ फ्लाइट’का लागि नेपाल नागरिक उड्डयन प्राधिकरण र तारा एयरलाइन्ससँग रेसुंगा नगरपालिकाले पहल गरेको थियो । अब लिखित सम्झौता गरेर व्यावसायिक उडान गरिने रेसुंगा नगरपालिकाका प्रमुख खिलध्वज पन्थीले बताए ।

जहाजमा गुल्मी–१ बाट निर्वाचित सांसद चन्द्र भण्डारी, एमाले उपमहासचिव प्रदीप ज्ञवाली, नेकपा एकीकृत समाजवादीकी सचिव रामकुमारी झाँक्री, प्रदेशसभा सदस्य धनेन्द्रबहादुर कार्की, माओवादी केन्द्र गुल्मीका सचिव बुद्धि जीसीलगायत तारा एयर र नेपाल नागरिक उड्डयन प्राधिकरणका कर्मचारी सहित १६ जनाको टोली आएको थियो । विमानस्थलको उद्घाटन गर्दै प्रतिनिधिसभा सदस्य भण्डारीले लामो समयपछि गुल्मीवासीको सपना साकार भएको बताए । ‘आजको अवस्थासम्म ल्याई पुर्‍याउन जसरी सबैको सहयोग भयो,’ उनले भने, ‘भोलिका दिनमा पनि त्यो सहयोग अपरिहार्य छ ।’

नेकपा एमालेका उपमहासचिव एवं पूर्वमन्त्री ज्ञवालीले विमानस्थल निर्माणमा ढिलाइ हुँदा चिल उडेका फोटोहरू खिचेर ट्रोल बनाउने व्यक्तिका कारण नियमित उडानका लागि दबाब बढेको बताए । उनले गुल्मीजस्तो पहाडी भूभागका लागि विमानस्थल र हवाई सेवा कुनै लक्जरीका विषय नभएको बताए । उनले विमानस्थललाई आवश्यकताका पूर्वाधार र पर्यटन विकासको आधारसँग जोड्दै राज्यले पूर्वाधारका क्षेत्रमा गरिने लगानीलाई नाफा नोक्सानको व्यापारी आँखाले नहेर्न सुझाव दिए । ‘रेसुंगा विमानस्थलको परिकल्पना, शिलान्यास, निर्माण र सञ्चालनका हरेक क्षणमा निर्णायक भूमिका खेल्न पाउँदा गौरव लागेको छ,’ उनले भने, ‘यस क्रममा खेप्नुपरेका आक्षेप, कटाक्ष र व्यंग्यवाणका ढुंगाहरू बटुलेर जिम्मेवारी बोधको मन्दिर बनेको छ ।’ ज्ञवाली पर्यटन मन्त्री भएका बेला विमानस्थल निर्माणको काम अघि बढेको थियो ।

विमानस्थलमा जहाज अवतरण भएसँगै गुल्मेलीमा विकास र आर्थिक समृद्धिको ढोका खुल्ने आशा व्यक्त गरेका छन् । विमानस्थल सञ्चालनपछि पर्यटन क्षेत्र फस्टाउने र सुविधा बढ्ने आशा युवा व्यवसायी सुदर्शन खनालले व्यक्त गरे । ‘गुल्मीका लागि यो राम्रो अवसर हो,’ उनले भने, ‘गुल्मी अब चार जिल्लाको केन्द्र बन्न सक्छ ।’ विमानस्थलबाट छिमेकी पाल्पा, बाग्लुङ, प्यूठान र अर्घाखाँचीका जनताले पनि सहज हवाई सेवा पाउने उनले बताए ।

व्यवसायी तथा हेलिकोप्टर एसोसिएसनका महासचिव योगराज कँडेलले रेसुंगाबाट नियमित सातामा दुई उडानको सम्भावना रहेको बताए । उडानसँगै गुल्मीमा रोजगारी, व्यवसाय र आय आर्जनको सम्भावना बढ्ने उनले बताए । ‘पहिलो एयरपोर्टमा काम गर्ने कर्मचारी, आर्मी, टावर, लोकल सेक्युरिटी बढ्छ, अर्को एयरपोर्टमा उत्रेपछि बाग्लुङको वल्लो भाग, अर्घाखाँची, प्यूठान र पाल्पाको पश्चिम भागसम्म पुग्न सडकमा चहलपहल बढ्छ भने तेस्रो ट्राभल एजेन्सीसँग समन्वय गरेर पर्यटकलाई गुल्मीको रुट राख्न सकिन्छ,’ उनले भने, ‘यसका साथै ठूला होटल व्यवसायमा लगानी बढाउन सहयोग हुन्छ ।’