फुटपाथ अतिक्रमण हटाउन सिद्धार्थनगरमा प्रहरी परिचालन

पहिलो पटकका लागि नगर प्रहरी दैनिक खटिएर सडक फुटपाथ अतिक्रमण नगर्न आग्रह गरिएको छ ।‘फुटपाथ अतिक्रमण गरेकाहरुलाई पहिलो पटकका लागि सचेत गराउँदैछौं,’ नगरपालिकाका नगर प्रहरी प्रमुख मनोज मल्लले भने, ‘अटेर गरेको अवस्थामा अतिक्रमण गरेर राखिएको साम्रगी नियन्त्रणमा लिने गरेका छौं ।’

नियन्त्रणमा लिएको साम्रगी व्यवसायीले लिन आएमा सम्बन्धित व्यवसायको कागजी विवरणसमेत क्रसचेक गर्ने गरेको उनले बताए । सिद्धार्थनगर नगरपालिकाका प्रमुख प्रशासकीय अधिकृत नवराज पौड्यालले कागजपत्रमा कैफियत देखिएको अवस्थामा कानुनबमोजिम कारबाही प्रक्रियामा लगिने बताए ।

व्यवसायसम्बन्धी सबै कागजपत्र दुरुस्त भएको अवस्थामा अतिक्रमणपछि नियन्त्रणमा लिइएको साम्रगी सचेत गराएर फिर्ता दिने गरिएको उनको भनाइ छ । उनकाअनुसार फुटपाथ अतिक्रमण हटाउने अभियानमा तीन दिनमा करिब ६० हजार रुपैयाँ राजस्वसमेत संकलन भएको छ ।