पाल्पा,प्यूठान — बिहेमा भोज खाएपछि पाल्पाको चिर्तुङधारा घोरबन्दा र प्यूठानको प्यूठान नगरपालिकास्थित गुरुङगाउँका ८५ बढी बिरामी परेका छन् । पाल्पामा एकै गाउँका ४० बढी बिरामी परेका छन् । पाल्पामा जन्ती आएर फर्किएका प्यूठानका ४५ भन्दा बढी बिरामी परेका हुन् । 

मंसिर १७ गते शनिबार बगनासकाली गाउँपालिका–१, चिर्तुङधारा घोरबन्दास्थित दानबहादुर गाहाको छोरीको बिहेमा भोज खाएकाहरू बिरामी परेको स्थानीयले बताए ।

पाल्पाको चिर्तुङधारामा बिरामी परेकाहरू आइतबार र सोमबार तानसेनस्थित मिसन अस्पतालमा उपचार गराएका छन् । मिसन अस्पतालका अनुसार २२ जना बिरामी उपचारका लागि आएका थिए । त्यसमध्ये चार जनालाई भर्ना लिएर उपचार गर्नु परेको छ ।

अस्पतालका व्यवस्थापक जीवन भट्टराईका अनुसार सबै बिरामी खतरामुक्त भएपछि घर पठाइएका हुन् । चिर्तुङधारा घोरबन्दाका बिरामी टेकबहादुर गाहाका अनुसार ज्वरो आउने, पखाला लाग्ने, टाउको दुख्ने, वाकवाकी लाग्ने, वान्ता हुने समस्या भएको छ । आइतबार खप्न सकिन्छ कि भन्ने भए पनि सोमबार भने सबै बिरामी अस्पताल पुगेको स्थानीयले बताए ।

स्थानीय मुक्ति बस्यालका अनुसार घरमा गएर भोज खाने प्राय: सबै बिरामी परेका छन् । ‘कतिपय घरमै सहेर, खटाएर पनि बसेको भन्ने सुनेको छु,’ उनले भने, ‘सहनै नसक्ने भएपछि मात्र बिरामी अस्पताल गएका हुन् ।’ के कारणले ‘फुड पोइजन’ भयो भन्ने अनुमानसमेत गर्न सकेका छैनन् । यहाँ प्यूठान नगरपालिका–६, गुरुङगाउँबाट जन्ती आएका थिए ।

बिरामी भएकाहरूका अनुसार घरमा ल्याएको बटुकमा कुनै समस्या देखिएन । भोजमा पाडा (राँगो) को मासु, पुलाउ, बटुक, अचार थियो । कतिपयले पानी धमिलो देखिएको र पानीकै कारण पनि हुन सक्ने आशंका गरेका छन् । जन्ती आएका प्यूठानका एकै गाउँका ४५ जना बिरामी परेका छन् ।

प्यूठान नगरपालिका–६, गुरुङगाउँका ४५ जना बिरामी परेका हुन् । जन्ती गए घर फर्किएसँगै ४५ जनमा बान्ता आउने, पखाला लाग्ने गरेको वडाअध्यक्ष नरेन्द्र पुन मगरले जानकारी दिए । प्यूठान नगरपालिका–६, गुरूङगाउँबाट पाल्पाको चिर्तुङधाराको घोरबन्दा जन्ती गएका ४८ जनामध्ये ४५ जनाले खाना खाएको र खाना खाएका उनीहरू सबै बिरामी भएको वडाध्यक्ष पुनमगरले बताए । उनीहरूलाई उपचारका लागि जिल्ला अस्पताल बिजुवार लगिएको छ ।