पाल्पा उद्योग वाणिज्य संघको अध्यक्षमा भट्टराई निर्वाचित- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

पाल्पा उद्योग वाणिज्य संघको अध्यक्षमा भट्टराई निर्वाचित

माधव अर्याल

पाल्पा — पाल्पा उद्योग वाणिज्य संघको सोमबार सम्पन्न निर्वाचनबाट अध्यक्षमा शैलेन्द्र भट्टराई निर्वाचित भएका छन् । निर्वाचनमा भट्टराईले ६ सय ४१ मत प्राप्त गर्दा निकटतम प्रतिद्वन्द्वी राजिव श्रेष्ठले २ सय १ मत पाए । ४ सय ४० फराकिलो मतान्तरमा निकटतम प्रतिस्पर्धीलाई पराजित गरेका हुन् । कुल १ हजार ५५ सदस्य रहेको पाल्पा उद्योग वाणिज्य संघमा ८ सय ४५ मत खसको थियो । तीन मत बदर भएको निर्वाचन अधिकृत टंकप्रसाद भट्टराईले बताए ।

अध्यक्ष पदमा निर्वाचित भट्टराई यसअघि सदस्य, महासचिव, उपाध्यक्षमा बसेर काम गरेको अनुभव छ । उनी १५ वर्षदेखि निरन्तर उद्योग, वाणिज्य संघमा कार्यरत हुन् । प्रतिस्पर्धी श्रेष्ठ निवर्तमान कोषाध्यक्ष हुन् । संघको उद्योग उपाध्यक्ष पदमा भएको निर्वाचनबाट उत्तम कुमार बज्राचार्यले १ सय ७ पाए । निकटतम् प्रतिस्पर्धी रमेशराज बज्राचार्य ४० मत पाए । संघको वाणिज्य उपाध्यक्षमा भीमबहादुर श्रेष्ठ निर्विरोध भएका हुन् ।

सोमबार भएको क्षेत्र नम्बर ११ को निर्वाचनबाट सदस्यमा कमल पाण्डे र लक्ष्मण बस्याल विजयी भए । यस क्षेत्रमा पाण्डेले ३३ र बस्यालले ३२ मत पाए । प्रतिस्पर्धी हलिम दिन मियाले २५ मत प्राप्त गरे । यहाँ ५ मत बदर भयो ।

संघको अध्यक्ष, उद्योग उपाध्यक्ष, क्षेत्र ११ को सदस्यमा सहमति हुन नसकेपछि निर्वाचन भएको हो । अन्य सबै पदमा निर्विरोध भए ।

यी दुवै कांग्रेस निकट व्यवसायी हुन् । विगतका निर्वाचनमा जस्तो प्यानल बनाएर चुनावी मैदानमा नआए पनि दुवै उम्मेदवारले आ–आफ्नै किसिमले चुनावी प्रचार भने गरेका थिए । अध्यक्षमा निर्वाचित भट्टराई पि.एस. गल्ला भण्डारका सञ्चालक हुन् भने पराजित भएका श्रेष्ठ हरिमान अमरमान इलोक्ट्रोनिक्स सेन्टरका सञ्चालक हुन् । भट्टराईलाई संघका केही पूर्व अध्यक्षहरुको समर्थन रहेको थियो भने श्रेष्ठलाई नयाँ पुस्तका व्यवसायीहरुको समर्थन थियो ।

यस्तै, क्षेत्र २ को सदस्यमा संजयकुमार श्रेष्ठ, क्षेत्र ३ को एक सिटमा खुमप्रसाद पोखरेल, क्षेत्र ४ को दुई पदमा नारायण पछाई, मञ्जु रेग्मी, क्षेत्र ५ को सदस्य दुई सिटमा विनायक महर्जन, किशोरदर्शन बज्राचार्य निर्विरोध भएका हुन् । क्षेत्र ६ मा दुुई सिटका लागि लक्ष्मणप्रसाद रेग्मी, अमनप्रसाद श्रेष्ठ, क्षेत्र ७ को दुई सिटमा सविन मल्ल, महेश शर्मा आचार्य निर्विरोध भए ।

क्षेत्र ८ मा दुई सिटका लागि रञ्जनाकुमारी थापा अर्याल, प्रज्वलराज शाक्य, क्षेत्र ९ को एक सिटमा समिरमान सिंह, क्षेत्र १० को दुुई सिटमा विदुर घिमिरे, सुरेश गोदार निर्विरोध भए । क्षेत्र १२ को दुई सिटमा दीपक घिमिरे, मुक्तिराम जिसी र क्षेत्र १३ को एक सिटमा समता मिँया निर्विरोध भएका छन् । एसोसिएट सदस्यमा तिनाउ, दोभानका विष्णुप्रसाद पाण्डे निर्विरोध भएका छन् ।

प्रकाशित : मंसिर १३, २०७९ ०८:२०
प्रतिक्रिया
पठाउनुहोस्

प्रदेश १ : प्रतिनिधिसभा र प्रदेशसभाका १२ महिला उम्मेदवारमध्ये ३ निर्वाचित

एक महिलाको अग्रता, एकले पछ्याउँदै र ७ महिला उम्मेदवार पराजित
देवनारायण साह

मोरङ — प्रदेश १ को १४ जिल्लास्थित २८ प्रतिनिधिसभा र ५६ प्रदेशसभा निर्वाचन क्षेत्रमा उम्मेदवार भएका १२ महिलामध्ये तीन जनामात्रै निर्वाचित भएका छन् । सुनसरी-३ मा एमालेकी भगवती चौधरीको अग्रता छ भने उदयपुर-१ मा एमालेकी मञ्जुकुमारी चौधरी संघर्षरत छिन् । महिला उम्मेदवारमध्ये ७ जना पराजित भएका छन् । 


प्रतिनिधिसभा सदस्यमा तेह्रथुम-१ बाट संविधानसभा सदस्य तथा पूर्वराज्यमन्त्री सीता गुरुङ, प्रदेशसभा सदस्यमा इलाम १(१) बाट संस्कृति तथा पर्यटनमन्त्री नेकपा (एकिकृत समाजवादी) की खिनु लङवा लिम्बु र झापा १(२) बाट राप्रपाकी सबिना बजगाईं निर्वाचित भएका छन् ।

सुनसरी-३ मा चौधरीले ३६ हजार ९३६ मत ल्याएर ५ हजार ५३५ मतको अग्रता कायम राखेकी छन् । उनलाई उक्त क्षेत्रबाट सातपटक निर्वाचित भइसकेका कांग्रेसका विजयकुमार गच्छदारले ३० हजार ६०१ मत ल्याएर पछ्याइरहेका हुन् । उक्त क्षेत्रमा अब बर्जु गाउँपालिकाको वडा ४, ५ र ६ को १० हजार ६३४ मत गणना गर्न बाँकी छ ।

यस्तै, प्रतिनिधिसभा सदस्यमा एमालेकी महिला उम्मेदवार मञ्जुकुमारी चौधरीले उदयपुर-१ मा परराष्ट्रमन्त्री कांग्रेसका नारायण खड्कासँग जितका लागि संघर्षरत छिन् । खड्काले २७ हजार ४८४ मत ल्याएर १ हजार ८२५ मतको अग्रता लिइरहेको अवस्थामा मञ्जुकुमारीले २५ हजार ६९५ मत ल्याएर पछ्याइरहेकी छन् । उक्त क्षेत्रमा १३ हजार ६४६ मत गणना गर्न बाँकी छ । मतपेटिकामा प्रदेशतर्फको एक सय मतपत्र भेटिएपछि विवाद भएको छ । विवादका कारण रोकिएको मतगणना निर्वाचन अधिकृतको कार्यलयले पुन: थाल्ने तयारी गरेको छ ।

प्रतिनिधिसभातर्फ गठबन्धन दल कांग्रेसकी सुजाता कोइराला मोरङ-२ र राप्रपाकी अभिनेत्री रेखा थापा मोरङ निर्वाचन क्षेत्र नम्बर ३ मा पराजित भएकी छन् । कोइराला एमालेका ऋषिकेश पोखरेल र थापा कांग्रेसका सुनिल शर्मासँग पराजित भएकी हुन् ।

यस्तै, प्रदेशसभातर्फ निवर्तमान उपसभामुख माओवादी केन्द्रकी सरस्वती पोखरेल सुनसरी ३(१), धनकुटा १(२) मा माओवादी केन्द्रकी निवर्तमान प्रदेश सांसद कुसुमकुमारी श्रेष्ठ, संखुवासभा १(२) मा निवर्तमान प्रदेश सांसद नेकपा (एकीकृत समाजवादी) की सरिता थापा पराजित भएकी छन् । यस्तै, इलाम १(१) मा एमालेकी शोभा पराजुली र मोरङ ६(१) मा एमालेकी रीता न्यौपाने पराजित भएकी छन् ।

पहिलो प्रदेशसभामा चार जना महिला उम्मेदवारमध्ये दुई जनाले मात्रै जितेर आएका थिए । इलामबाट खिनु लङबा र उदयपुरबाट कला घले जितेर आएकी थिइन् । यसपटक पनि खिनु लङ्बा दोस्रोपटक र बजगाईं पहिलोपटक प्रदेशसभामा निर्वाचित भएका हुन् ।

९३ सदस्यीय प्रदेशसभामा न्यूनतम ३१ जन महिला प्रदेश सांसदको प्रतिनिधित्व गराउनै पर्ने संवैधानिक व्यवस्थाअनुसार समानुपातिकबाट ३७ मध्ये न्यूनतम २९ जना महिला छानिएर आउने भएको छ । अघिल्लोपटक समानुपातिबाट ३० जना महिला प्रदेश सांसद भएका थिए ।

एमालेबाट दुई निर्वाचित र समानुपातिकबाट १७ गरी १९, कांग्रेसबाट ६, माओवादी केन्द्रबाट ४, तत्कालीन संघीय समाजवादी फोरम, राप्रपा र संघीय लोकतान्त्रिक राष्ट्रिय मञ्चबाट १/१ जना समानुपातिकबाट प्रदेश सांसद भएका थिए ।

प्रकाशित : मंसिर १३, २०७९ ०८:१९
पूरा पढ्नुहोस्
प्रतिक्रिया
पठाउनुहोस्
×