नेपालगन्जमा स्वास्थ्यजन्य फोहोर व्यवस्थापन केन्द्र सञ्चालन- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

नेपालगन्जमा स्वास्थ्यजन्य फोहोर व्यवस्थापन केन्द्र सञ्चालन

रुपा गहतराज

नेपालगन्ज — नेपालगन्जमा एकीकृत स्वास्थ्यजन्य फोहोरमैला व्यवस्थापन केन्द्र सञ्चालनमा आएको छ । नेपालगन्ज उपमहानगरपालिकाले सोमबारदेखि एकीकृत स्वास्थ्यजन्य फोहोरमैला व्यवस्थापन केन्द्र सञ्चालनमा ल्याएको हो । एक कार्यक्रमबीच सोमबार उक्त केन्द्रको उद्घाटन गरियो ।

एकीकृत स्वास्थ्यजन्य फोहोरमैला व्यवस्थापन केन्दको उद्घाटन गर्दै नगरप्रमुख प्रशान्त विष्टले अन्य फोहोरको तुलनामा स्वास्थ्यजन्य फोहोर सबैभन्दा बढी दुषित र संक्रामक हुने भएकाले यसको व्यवस्थापनलाई मुख्य प्राथमिकतामा राख्दै तदारुकता साथ काम गरेर सञ्चालनमा ल्याइएको बताए ।

नेपालगन्ज उपमहानगरपालिका वडा नम्बर २३ हिरमिनियास्थित ल्याण्डफिल साइट परिसरमा अस्पतालबाट निस्कने फोहोरमैला व्यवस्थापन गर्ने उद्देश्यका साथ एकीकृत स्वास्थ्यजन्य फोहोरमैला व्यवस्थापन केन्द्र सञ्चालनमा ल्याइएको वातावरण इन्जिनियर प्रकाश डिसीले बताए ।

फोहोरमैला व्यवस्थापन केन्द्र सञ्चालनका लागि जीआइजेडले २ वटा अटो क्लेब मेसिन र एउटा बेलर मेसिन सहयोग गरेको हो। नेपालगन्ज उपमहानगरपालिकाले संरचना निर्माण गरेको हो । संरचना निर्माणमा ४६ लाख लागत लागेको डिसीले सुनाए ।

स्वास्थ्यजन्य फोहोरमैला व्यवस्थापन केन्द्र सञ्चालनको जिम्मा १० वर्षका लागि 'स्वच्छ नेपाल हाम्रो अभियान' नामक संस्थालाई दिइएको छ । स्वास्थ्यजन्य फोहोरमैला व्यवस्थापन केन्द्र सञ्चालनमा आएपछि अस्पतालबाट निस्कने स्वास्थ्यजन्य फोहोर अब यही व्यवस्थापन हुनेछ ।

प्रकाशित : मंसिर १२, २०७९ २१:३५
प्रतिक्रिया
पठाउनुहोस्

जियोले बनाउँदैछ टिकटकजस्तै ‘प्लाटफर्म’ एप

एजेन्सी

काठमाडौँ — हालै जारी गरिएको प्रेस विज्ञप्ति अनुसार रोलिङ स्टोन्स इन्डिया, क्रिएटिभल्यान्ड एसिया र जिओले ‘प्लाटफर्म’ नामक एप निर्माणमा सहकार्य गरेका छन् । यसको बेटा भर्सन परीक्षणका क्रममा रहेको बताइन्छ ।

भारतको जियो प्लाटफर्म्स लिमिटेडले टिकटकजस्तै छोटा भिडियोहरू बनाउन र सेयर गर्न मिल्ने एप बनाउने भएको छ । भारतमा टिकटक प्रतिबन्ध छ । त्यसकारण जियोले इन्स्टाग्राम र फेसबुक रिल्स, गुगलको युट्युब सर्ट, सेयरच्याटजस्ता एप तथा फिचरको प्रतिश्पर्धीका रूपमा ‘प्लाटफर्म’ नामक छोटा भिडियोसम्बन्धी एप बनाउन लागेको भारतीय सञ्चार माध्यमले जनाएका छन् ।

विज्ञप्तीअनुसार यो एप स्टार इन्टरटेनर्स (चल्तीका मनोरञ्जनकर्ता) का लागि बनाइएको हो । यसमा फलोअरहरू क्रमश: बढ्दै जाने र मोनिटाइजेसनको सुविधा पनि उपलब्ध हुने भनिएको छ । यसमा उपलब्ध हुने नौलो फिचर चाहिँ ‘बुक नाउ’ बटन हो । उक्त बटनमार्फत् फलोअरहरूले कन्टेन्ट क्रिएटरसँग अन्तरक्रिया गर्न सक्नेछन् ।प्लाटफर्म एप क्रिएटर, गायक, कलाकार, संगीतकर्मी, नर्तक, हास्य कलाकार, फेशन डिजाइनर र इन्फ्लुएन्सर (प्रभावशाली व्यक्ति) बन्न चाहने जो कोहीका लागि उपयुक्त हुने भनिएको छ ।

सुरुका १ सयजना सदस्य भने निमन्त्रणाका आधारमा मात्रै एपमा जोडिन सक्ने जिओले जनाएको छ । ती सयजनाले अन्यलाई आमन्त्रण गर्दै एपमा सदस्य संख्या बढाइनेछ । यसमा कन्टेन्ट क्रिएटरका लागि सिल्भर, नीलो र रातो टिक मार्कको तीनथरी भेरिफिकेसन प्रणाली हुने बताइएको छ । आउँदो जनवरीमा एप सार्वजनिक गरिने जिओले जनाएको छ ।

प्रकाशित : मंसिर १२, २०७९ २१:२२
पूरा पढ्नुहोस्
प्रतिक्रिया
पठाउनुहोस्
×