सर्तसहित सरकारमा जान सक्छौं : लालवीर चौधरी- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

सर्तसहित सरकारमा जान सक्छौं : लालवीर चौधरी

कमल पन्थी

बर्दिया — नागरिक उन्मुक्ति पार्टीका केन्द्रीय सल्लाहकार एवं नवनिर्वाचित प्रतिनिधिसभा सदस्य लालवीर चौधरीले सरकारमा जानका लागि सर्तहरू राखेका छन् । उनी स्वतन्त्रबाट प्रतिनिधिसभामा निर्वाचित सांसद हुन् ।


उनले रेशम चौधरीलगायत सात जना राजबन्दीलाई रिहाइ गर्नुपर्ने आफूहरूको पहिलो सर्त रहेको बताए । यसबाहेक पहिचानका मुद्दासहितका सर्तहरू सरकारले पालना गरे मन्त्रीमण्डलमा सहभागी हुन सकिने उनले बताएका छन् । कान्तिपुरसित संक्षिप्त कुरा गर्दै उनले समानुपातिको गणना सकिएपछि बैठक बस्ने र त्यसबारे निर्णय गरिने बताए । उनी रेशमलाल चौधरीका बुबा हुन् । उनले गठबन्धनबाट उम्मेदवार भएका माओवादी केन्द्रका सुरेश पन्थलाई पराजित गरेका थिए ।

नागरिक उन्मुक्ति पार्टीबाट प्रतिनिधिसभामा कैलालीबाट तीन जना प्रतिनिधिसभामा निर्वाचित भएका छन् । बर्दियामा रहेका दुई निर्वाचन क्षेत्रअन्तर्गत प्रदेशसभामा दुई जना सदस्य निर्वाचित भएका छन् ।

प्रकाशित : मंसिर १२, २०७९ १३:३४
प्रतिक्रिया
पठाउनुहोस्

सल्यानमा प्रत्यक्षमा ७ र समानुपातिकमा ८ प्रतिशत मत बदर 

विप्लव महर्जन

सल्यान — एक प्रतिनिधिसभा र दुई प्रदेशसभा रहेको सल्यानमा यही मंसिर ४ गते सम्पन्न भएको निर्वाचनमा प्रत्यक्षतर्फ सात र समानुपातिकमा आठ प्रतिशत मत बदर भएको छ । सम्बन्धित निकायले मतदाता शिक्षालाई प्रभावकारी बनाउन नसक्दा मतदातामा भएको अन्योलताका कारण प्रत्यक्ष र समानुपातिकमा धेरै मत बदर भएको हो । 

कुल खसेको मत अनुसार प्रत्यक्षमा ११ हजार ६ सय १५ र समानुपातिकमा १२ हजार ४ सय ४६ मत बदर भएको मुख्य निर्वाचन कार्यालय सल्यानले जनाएको छ । मुख्य निर्वाचन अधिकृत गिरिराज गौतमका अनुसार प्रत्यक्षतर्फ प्रतिनिधिसभाको लागि खसेको कुल मत ७६ हजार ३ सय ५ मा ७ हजार ३ सय ५९ , प्रदेशसभा अन्तर्गत सल्यान १ मा खसेको ४१ हजार १ सय ७६ मतमा २ हजार ३ सय ४८ र २ मा ४१ हजार ९ सय ६७ मत खसेकोमा १ हजार ८ सय ९८ मत बदर भएका छन् ।

यसैगरी समानुपातिकमा प्रतिनिधिसभाको लागि ८४ हजार ७ सय ८९ मत खसेकोमा ६ हजार २ सय १५ र प्रदेशसभामा ८२ हजार ९ सय ९८ मत खसेकोमा ६ हजार २ सय ३१ मत बदर भएको छ ।

मतदाता शिक्षा प्रभावकारी बनाउन सरोकारवाला सबैको जिम्मेवारी रहेपनि प्रभावकारी नभएकै कारण खसेको मत बढी बदर भएको निर्वाचन कार्यालय सल्यानका प्रमुख निमराज भटराईले बताए । प्रत्यक्षमा थोरै चिह्न र समानुपातिकमा धेरै चिह्न भएकाले मतदाता अलमलमा परेका कारण समानुपातिकमा बढी मत बदर भएको उनले जानकारी दिए । उनका अनुसार निर्वाचनमा कार्यालयले स्वयंसेवक भर्ना गरेर जिल्लाका सबै पालिकामा मतदाता शिक्षा दिए पनि एकै मतदाताले एक चिह्नमा मात्र नभइ धेरैमा छाप लगाएको पाइएको हो ।

सल्यानमा १ लाख ५७ हजार ७ सय १ मतदाता रहेकोमा जिल्लाभरिका २ सय ५ मतदान केन्द्रबाट कुल मतदाताको ८४ हजारले तथा ५३.२७ प्रतिशतले मतदान गरेका थिए ।


प्रकाशित : मंसिर १२, २०७९ १३:२१
पूरा पढ्नुहोस्
प्रतिक्रिया
पठाउनुहोस्
×