लुम्बिनी प्रदेशका १२ वटै जिल्लामा मतदानको तयारी पूरा

रूपन्देहीबाट झन्डै साढे ६ लाख जना मतदानमा सहभागी हुने भएका छन् । जिल्ला निर्वाचन कार्यालयका अनुसार जिल्लाभर २ सय ८ मतदान स्थल छन् । ती मतदान स्थलमा ७ सय २ केन्द्र तोकिएका छन् । जिल्लामा ५ वटा अस्थायी मतदान केन्द्र छन् । कार्यालयका अनुसार रूपन्देही–१ मा प्रतिनिधिसभातर्फ २१, प्रदेशसभा १ मा ११ र २ मा १४ जना उम्मेदवार छन् ।

रूपन्देही–२ मा प्रतिनिधिसभातर्फ १५, प्रदेशसभा १ मा १२ र २ मा ११ जना उम्मेदवार छन् । त्यस्तै रूपन्देही–३ मा प्रतिनिधिसभातर्फ २२, प्रदेशसभा १ मा ११ र २ मा ११ जना उम्मेदवार छन् । रूपन्देही–४ मा प्रतिनिधिसभातर्फ १३, प्रदेशसभा १ मा ६ र २ मा १२ जना उम्मेदवार छन् । रूपन्देही ५ प्रतिनिधिसभातर्फ १७, प्रदेशसभा १ मा १३ र २ मा १४ जना उम्मेदवार छन् ।

रूपन्देहीका निर्वाचन कार्यालय प्रमुख अयोध्याप्रसाद भण्डारीले जिल्लाका पाँचवटै निर्वाचन क्षेत्रमा मतदान अधिकृत र सहायक मतदान अधिकृतको तालिम सकिएको बताए । जिल्लाका सबै मतदान केन्द्रमा खटिने कर्मचारीले मंसिर १ मा नै निर्वाचन सामग्री बुझी सुरक्षाकर्मीसहित सम्बन्धित केन्द्रमा प्रस्थान गरिसकेको उनले बताए । सबै मतदान केन्द्र र स्थल सुरक्षित रहेको उनले जनाए । जिल्लाका हरेक मतदान केन्द्र र स्थलमा सुरक्षाकर्मी खटाइसकिएको प्रमुख जिल्ला अधिकारी भरतमणि पाण्डेले बताए । ‘१२ वटा अनुगमन टोलीले हरेक निर्वाचन क्षेत्रको अनुगमन गर्नेछन्,’ उनले भने, ‘हामी सुरक्षाका हिसाबले तयारी अवस्थामा छौं, निर्वाचन अवधिभरिका लागि सीमासमेत सिल गरिएको छ ।’

बर्दियाको एक मतदान स्थलमा कर्मचारीदेखि सुरक्षाकर्मी सबै महिला खटिएका छन । गुलरिया नगरपालिका–८ स्थित महाकवि देवकोटा माध्यमिक विद्यालयमा महिलामात्रै कार्यरत रहेको नमुना मतदान केन्द्र र स्थल निर्माण गरिएको हो । यस मतदान स्थलका ‘क’ र ‘ख’का लागि दुई मतदान अधिकृत खटिएका छन् । मतदान अधिकत रेविका अमात्यका अनुसार मतदान केन्द्र र स्थलमा गरी अधिकृतसहित २४ जना कर्मचारी खटिएका छन् । सुरक्षाका लागि १४ जना महिला सुरक्षाकर्मी खटिएका छन् । यो केन्द्र र स्थलमा २ हजार ७२ जना मतदाताले मतदान गर्ने छन् ।

जिल्लामा ३ हजार २ सय ५० सुरक्षाकर्मी र झन्डै ३ हजार कर्मचारी खटिएका छन् । जिल्लामा अप्रिय घटना नहोस् भन्दै सुरक्षाको व्यवस्था कडा पारिएको प्रमुख जिल्ला अधिकारी बन्धुप्रसाद बास्तोलाले बताए । जिल्लामा कुल ३ लाख १५ हजार २ सय ८४ मतदाता छन् । जिल्लामा १ सय ५४ मतदान स्थल र ३ सय ७६ मतदान केन्द्र छन् ।

बाँकेमा १ सय ८ अति संवेदनशील र ३० संवेदनशील मतदान स्थल छन् । यहाँ ३ लाख ३२ हजार २ सय ३१ मतदाता छन् । जिल्लामा प्रतिनिधिसभातर्फ तीन र प्रदेशसभातर्फ ६ क्षेत्र छन् । निर्वाचनका लागि यहाँ १ हजार ९ सय ५९ म्यादी प्रहरी परिचालन गरिएको छ । बर्दियामा १ हजार ५ सय ३४ जना र दाङमा १ हजार ९ सय २० जना म्यादी प्रहरी परिचालन गरिएको छ । निर्वाचन केन्द्र र मतदान स्थलको संवेदनशीलताका आधारमा जिल्लागत रूपमा म्यादी प्रहरीको संख्या निर्धारण गरिएको हो । कपिलवस्तुका २ सय ३४ मतदान स्थलमध्ये ९९ वटालाई सामान्यको सूचीमा राखिएको छ । यहाँका २८ मतदान स्थल अति संवेदनशील र १ सय ७ संवेदनशील छन् । ३ लाख ७८ हजार २ सय ३२ मतदाता रहेको जिल्लामा प्रतिनिधिसभातर्फ ३ र प्रदेशसभातर्फ ६ सिटका लागि १ सय ४६ जना उम्मेदवार छन् ।

निर्वाचनका बेला सीमा क्षेत्रमा हुन सक्ने अवान्छित र आपराधिक क्रियाकलाप रोक्न कपिलवस्तुमा संयुक्त गस्ती सुरु गरिएको छ । तराईका जिल्लामा शान्ति सुरक्षामा संवेदनशील सूचीमा रहेको यहाँ सतर्कता अपनाउँदै गस्ती थालिएको हो । सशस्त्र, म्यादी र नेपाल प्रहरी तथा भारतीय सीमा सुरक्षा बल (एसएसबी)ले संयुक्त गस्ती टोलीले यहाँ गस्ती गरिरहेको छ । बिहीबारदेखि सुरु गरिएको गस्ती मतगणनाको अन्तिम नतिजा नआउँदासम्म झन्डै १० दिनसम्म नियमित गरिने सशस्त्रको डंगरी बीओपीका इन्स्पेक्टर सन्तोष अधिकारीले बताए ।

संयुक्त गस्ती यशोधरा गाउँपालिकाको मर्यादपुर नाकाबाट सुरु गरिएको हो । मर्यादपुरबाट ६ किमि पश्चिम र ६ किमि पूर्वका सीमा स्तम्भसम्म गस्ती गरिएको छ । गस्तीमा नेपाल–भारतका २५ जना सुरक्षाकर्मी संलग्न छन् ।

भारतको सिद्धार्थनगर र बलरामपुर जिल्लासँग कपिलवस्तुको ९३ किमि सीमा जोडिएको छ । भारतको सिद्धार्थनगर र बलरामपुर जिल्लामा खटिएका एसएसबीको दोस्रो र ५० औं बटालियनका कमाण्डरसँग सशस्त्रको २८ नम्बर गणले समन्वय गरेर गस्ती थालेको हो । जिल्लाभरि नै सीमाका विभिन्न ठाउँमा सुरक्षार्थ खटिएका सशस्त्र र एसएसबीका बीओपीले समन्वय गरेर आ–आफ्नो इलाकामा सीमा गस्ती गर्ने तालिका मिलाइएको सशस्त्रका २८ नं. गणका उपरिक्षक सूर्यबहादुर सेन वलीले बताए ।