कर्णालीको बाढीले ८ सयभन्दा बढी परिवार विस्थापित

बाढीले कर्णालीको जलसतह पार गर्दै राजापुर नगरपालिका र गेरुवा गाउँपालिकाको–८ सय घर डुबानमा पारेको छ । डुबानमा परेकालाई सुरक्षित स्थानमा स्थानान्तरण गरिएको राजापुर नगरपालिकाका प्रमुख दिपेश चौधरीले बताए । उनीहरुलाई सुरक्षित स्थलमा राखेर खाने व्यवस्था मिलाइएको उनले बताए । सुरक्षित स्थानमा बाढी पस्ने अवस्था नरहेको उनले जनाए । जलस्तर १२ दशमलव ४ नाघिसकेकोले यस क्षेत्र थप उच्च जोखिममा परेको छ ।

राजापुर तटीय क्षेत्रमा बाढी पस्न लागेको छ । राजापुरको दौलतपुरमा केही घरमा बाढी पसेको स्थानीयले बताएका छन् । बाढी पस्न लागेको भन्दै तटीय क्षेत्रका बासिन्दा त्रसित भएका छन् ।

आइतबार भीषण वर्षा भएकाले कर्णालीमा जलस्तर बढ्दै गएको हो । प्रमुख जिल्ला अधिकारी बन्धुप्रसाद बाँस्तोलाले तटीय क्षेत्रका बासिन्दालाई सुरक्षित स्थल जान आग्रह गरेको बताए । त्यस क्षेत्रमा सशस्त्र प्रहरी बल र नेपाल प्रहरीलाई सुरक्षित स्थल जाने मानिसलाई सहयोग पुर्‍याउन परिचालन गरिएको उनले जनाए । 'जलस्तर बढी रहेकोले सुरक्षाकर्मी मोटरबोटसहित जोखिम क्षेत्रमा परिचालित भएका छन्,' उनले भने, 'बाढीले कति घर डुबानमा परे राति भएकोले वास्तविक तथ्यांक आउन समय लाग्ने छ ।'

पहाडी र तराई क्षेत्रमा वर्षात नरोकिएकोले तटीय क्षेत्रका बासिन्दालाई उच्च सतर्कतामा रहन स्थानीय प्रशासनले आग्रह गरेको छ । प्रहरी उपरीक्षक वीरेन्द्रबहादुर शाहीले पालिकाका जनप्रतिनिधि, बडघरको सहयोगमा तटीय क्षेत्रका बासिन्दालाई सुरक्षित स्थान पुर्‍याउन लागिएको बताए ।

कर्णालीको बाढी कैलालीको टिकापुर क्षेत्रमा पसेको प्रहरीले जनाएको छ । गत वर्ष कात्तिक २ गते कर्णाली नदीमा बाढी आउँदा मानवीय क्षति नभएपनि २ हजार ५ सय बढी हेक्टरमा धानबालीमा क्षति पुगेको थियो । बाढीले पाँच सय बढी घर डुबानमा पारेको थियो । हजार जनाभन्दा बढीले अन्यत्र आश्रय लिएका थिए ।