दाङमा निर्वाचन अधिकृतको कार्यालय स्थापना
दाङ — मंसिर ४ मा हुन गइरहेको प्रतिनिधिसभा र प्रदेशसभा निर्वाचनका लागि बिहीबार जिल्लामा मुख्य निर्वाचन अधिकृतको कार्यालय स्थापना गरिएको छ । दाङका ३ वटै निर्वाचन क्षेत्रमा मुख्य निर्वाचन अधिकृतको कार्यालय स्थापना गरिएको हो ।
निर्वाचन क्षेत्र नं. १ मा मानबहादुर विष्ट, क्षेत्र नं. २ मा कृपासुर कार्की र क्षेत्र नं. ३ मा डोलनाथ न्यौपाने मुख्य निर्वाचन अधिकृत छन् ।
घोराहीमा कार्यालय स्थापना गर्दै क्षेत्र नम्बर २ का मुख्य निर्वाचन अधिकृत कृपासुर कार्कीले निर्वाचनलाई स्वच्छ र शान्तिपूर्ण तरिकाले सम्पन्न गर्न सबैको सहयोग जरूरी रहेको बताए । कार्यक्रममा प्रमुख जिल्ला अधिकारी हिरालाल रेग्मीले निर्वाचन सुरक्षा योजना तयार गरेर काम गरिरहेको बताए ।
कार्यक्रममा जिल्ला प्रहरी प्रमुख एसपी वीरबहादुर वली, राजनीति दलका प्रतिनिधि र पत्रकारको उपस्थिति थियो ।
निर्वाचन आयोगले यही असोज २३ गते प्रत्यक्ष निर्वाचनको उम्मेदवारी दर्ताको समय तोकेको छ ।
