दसैंमा टिकट नपाउँदा कर्णालीका यात्रु अलपत्र- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

दसैंमा टिकट नपाउँदा कर्णालीका यात्रु अलपत्र

रुपा गहतराज

नेपालगन्ज — डोल्पाका चन्द्रखर बुढा दुई हप्तादेखि नेपालगन्ज विमानस्थलको होटलमा बसिरहेका छन् । उपचारका लागि काठमाडौं गएका उनी नेपालगन्ज हुँदै डोल्पा जान आएका हुन् । तर‚ अहिलेसम्म टिकट  पाएका छैनन् । दैनिक टिकटका लागि हारगुहार गरे पनि आफूले टिकट पाउन नसकेको उनले बताए ।

‘न त हाम्रा नेता छन् । न हामीले भनेको कसैले मान्छन्‚’ उनले भने, ‘उपचार खर्च र होटल खर्चमै पैसा सकियो; अझै घर जाने ठेगान छैन ।’ बुढा दसैं मान्न घर जाँदैछन्। जहाजको टिकट नपाएपछि उनी विमानस्थल नजिकैको होटलमा बसिरहेका छन् ।

दुई वर्षको छोरोलाई लिएर एक हप्तादेखि होटलमा बसिरहेकी डोल्पाकी अन्जु बुढालाई छोराले घर जाउँ भनेर सताइरहेको छ । उपचारका लागि काठमाडौं गएकी अन्जुको पनि उस्तै अवस्था छ । उनले अझैसम्म घर जाने टिकट पाएकी छैनन् । ‘यति सानो छोरो छ । जति हारगुहार गरे पनि सिट छैन भन्दै फर्काउँछन्‚’ उनले भनिन्, ‘वर्षदिनको चाडबाड दसैंमा घर जान पाएका छैनौँ ।’

विमानस्थल नजिकै होटल सञ्चालन गरिरहेका विष्णुबहादुर रोकायले चाडबाडमा समेत टिकट नपाउँदा कर्णालीवासीले समस्या झेल्नुपरेको बताए । टिकटका लागि कुर्दाकुर्दै यात्रुको होटल खर्चसमेत सकिन लागेको उनले बताए ।

‘पावर भएका व्यक्तिले टिकट पाउँछन् । भनसुन गर्नेको मात्र कुरा सुन्छन्,’ होटल सञ्चालक रोकायले भने, ‘होटललाई फाइदा भयो भनेर मात्र सोच्नुभएन । यात्रुको बिजोग भइसक्यो ।’ रोकायले नियमित उडान नहुँदा धेरै जना अलपत्र परेकाले सरकारले सहज रुपमा उडानको व्यवस्था मिलाउनुपर्ने बताए ।

कर्णालीका मान्छेले चाडबाडमा दु:ख पाएपछि नेपालगन्ज विमानस्थलमै एक–एकवटा जहाज राख्नुपर्ने नियम बनाइएको थियो । तर‚ यो नियम हटाइएपछि एयरलायन्सहरूले मनोमानी गर्दै आएका छन् ।

हुम्लाका दागि टिकट नपाएका दीपक भण्डारी विमानस्थल बाहिरै बसिरहेका छन् । विमानस्थलभित्र प्रवेश गर्न नदिएपछि बाहिर बसेर टिकटका लागि पर्खिरहेको उनले बताए । ‘हामीलाई भित्र पस्न दिँदैनन्; बाहिर टिकट बिक्री गर्दैनन्‚’ उनले भने, ‘हामी १५ दिनदेखि अलपत्र परिरहेका छौं । हिजो काठमाडौंबाट आएका जनप्रतिनिधिलाई आजै उडाइयो ।’

सर्वसाधारणलाई टिकट छैन भन्ने गरेको समिट एयरलायन्सले सोमबार १८ जनालाई हुम्ला उडाएको उनले सुनाए । उनका अनुसार हुम्ला जानका लागि ४० जना यात्रु नेपालगन्जमा अलपत्र अवस्थामा छन् ।

नेपालगन्ज विमानस्थलबाट कर्णालीका विभिन्न जिल्लामा समिट, तारा र सीता एयरले जहाज पठाउने गरेका छन् । समिट र सीताका चार-चारवटा र ताराका तीनवटा विमान छन् ।

अरू बेला नेपालगन्जमै बस्ने यी एयरका जहाज यतिबेला पर्यटक बोक्न पोखरातिर छन् । अहिले हप्तामा दुईवटा विमान आएर उडान गरिरहेका छन् । पोखरा–जोमसोङतिर पर्यटक बोक्नु नै उनीहरूको प्राथमिकताको विषय बनेको छ । समिटका चारवटामध्ये एउटा जहाज नेपालगन्जमै बसिरहेको छ । अहिले समिटले कर्णालीमा हप्तामा दैनिक ५ वटा उडान गरिरहेको छ ।सीता एयरका चारवटै विमान यहा छैनन् । सीताको तीनवटा विमान बिग्रिएको छ । एउटा चालु अवस्थामा भए पनि नेपालगन्जमा छैन ।

नेपालगन्ज विमानस्थलका प्रमुख सुरेश खनालले भएका तीनवटै जहाजको नेपालगन्जमा बेस नहुँदा यात्रुले चाडबाडमा सास्ती बेहोर्नुपरेको बताए ।

कर्णालीमा पर्यटक जाने सिजनमा नेपालगन्जमा थुप्रिने जहाज दसैंको बेलामा अन्यत्र गएपछि कर्णालीका मानिस आक्रोशित छन् । टिकट नपाएर अलपत्र भएका यात्रुहरूले विमानस्थलमा प्रवेश गरी सोमबार काउन्टर चेक गर्न नदिएपछि प्रहरीले उनीहरूलाई विमानस्थलमा प्रवेश गर्नसमेत दिएको छैन ।

प्रकाशित : आश्विन १७, २०७९ १४:४९
प्रतिक्रिया
पठाउनुहोस्

यसरी बनाउनुस् थारु परिकारहरू

बुनु थारु

काठमाडौँ — थारु समुदायले चाडपर्वमा विभिन्न विशेष प्रकारका खानेकुराहरू बनाउने गर्छन् । ढिक्री, खरिया, बरियालगायत परिकारहरू प्रायः चाडपर्वमा टुट्दैन । चाडपर्वमा मात्र नभई अरु कुनै माहोलमा पनि थारु परिकारहरू यसरी बनाएर खान सकिन्छ । 

ढिक्री

आवश्यक सामग्री :

  • चामलको पिठो
  • पानी

यो सजिलो र स्वास्थ्यवर्द्धक खाजा हो । ढिक्री बनाउका लागि चामलको पिठो आवश्यक पर्दछ । चामलको पिठो अलि खस्रो र नयाँ धानको चामलको भए अझ स्वादिष्ट हुन्छ । पिठोलाई मज्जाले मुछ्ने र यसलाई आफ्नो मनपर्ने आकार दिने । लामो वा गोलो आकारमा बनाउन सकिन्छ । ढिक्रीलाई १५ देखि २० मिनेट उसिनेपछि यो खानका लागि तयार हुन्छ । यो तरकारी र अचारसँग खान मिठो हुन्छ ।

खँरिया

आवश्यक सामग्री :

  • मासको दाल
  • चामलको पिठो
  • गहुँको पीठो
  • लसुन र अदुवाको पेस्ट
  • जिरा र धनियाँको धुलो
  • खुर्सानीको पेस्ट
  • बेसार
  • कर्कलोको पात
  • आवश्यकता अनुसार नुन
  • सनफ्लावर तेल

यो परिकार विशेष गरेर चाडपर्वमा पकाइन्छ । यो बनाउनका लागि आफूलाई आवश्यकताअनुसार मासको दाल लिनुपर्दछ । मासको दाल रातभर भिजाउने नभए कम्तीमा ८ घण्टा भिजाउनुपर्दछ । भिजेको दाललाई राम्ररी बोक्रा फालेर पखाल्ने । दाललाई सिलौटामा वा मिक्चरमा पिस्ने । दाललाई एकदमै मसिनो गरेर पिस्नु हुँदैन हल्का लेदो बन्ने गरी मात्र पिस्नुपर्छ । त्यसपछि चामलको पिठो एक भाग र गहुँको पिठो भाग, जिरा र धनिँयाको धुलो, अदुवा–लसुनको पेस्ट, खुर्सानीको पेस्ट, बेसार, आवश्यकताअनुसार नुन हालेर सबैलाई मोल्नुपर्छ ।

त्यसपछि कर्कलोको पातमा बनाएको पेस्टलाई पातलो गरी दल्नुपर्छ । त्यसपछि पातलाई घुमाउँदै रोल गर्दै लाने । त्यो रोललाई कम्तीमा १५ देखि २० मिनेट उसिन्नुपर्दछ ।त्यो बनाएको रोललाई मसिनो आकारमा काट्ने र तेलमा फ्राइ गर्नुपर्छ । हल्का रातो भएपछि यो खानलाई तयार हुन्छ ।

अन्डिक बरिया

आवश्यक सामग्री :

  • अन्डीको पिठो
  • आवश्यकताअनुसार चिनी
  • तार्नका लागि तेल

अन्डीको पिठोमा आवश्यकताअनुसार चिनी हालेर मुछ्ने । पिठो मज्जाले मुछ्ने तर धेरैबेर मुछ्नु हुँदैन । त्यसपछि हातैले सानो–सानो आकारमा रोटी बनाउने । रोटी तेलमा तार्न थालेपछि मज्जाले फुल्छ । हल्का रातो भएपछि प्लेटमा निकाल्ने र यो खानलाई तयार हुन्छ ।

घोंघी

आवश्यक सामग्री :

  • आवश्यकताअनुसार घोंघी
  • चामलको कनिका र पिठो
  • तेल
  • बेसार र नुन
  • लसुन अदुवाको पेस्ट
  • काटिएको प्याज र टमाटर
  • जिरा र धनिँयाको धुलो

घोंघी खोला किनारमा पाइने गर्दछ । काठमाडौंमा पनि विशेष गरेर माछा पसलमा यो बेच्न राखिएको हुन्छ । घोंघीलाई पकाउनुभन्दा पहिले यसलाई कुनै ठूलो भाँडामा राखेर चामलको कनिका वा पिठोमाथिबाट छर्नुपर्दछ । यसलाई कम्तीमा १० घण्टा यत्तिकै छाडिदिने । हतार छैन रातभर यत्तिकै छोडिदिनुपर्दछ । यसले पिठो खाएर माटो ओकल्छ । पकाउनुभन्दा पहिले घोंघीलाई राम्ररी पखाल्नुपर्छ । यसमा लेउ पनि हुने भएकाले सफासित पखाल्नुपर्छ ।

त्यसपछि घोंघीको चुच्चो भागलाई काट्नुपर्दछ ताकि घोंघीभित्र मजाले मरमसला पस्न पाओस् र भित्रको मासु तान्न सजिलो होस् । काटिसकेपछि अब पकाउन थाल्ने । आवश्यकताअनुसार तेल हाल्ने र जिरा पड्काउने । त्यसपछि प्याज हाल्दै बाँकी रहेका मसला भुटेर टमाटर हाल्ने । मसला पाकिसकेपछि आधा कप पानी हाल्ने । पानी मज्जाले उम्लिएपछि घोंघी हाल्ने ।

घोंघी मज्जाले पाकेपछि त्यसमा थोरै चामलको पिठो हाल्ने जसले गर्दा मज्जाको ग्रेभी बन्छ । आधा घण्टा जति पकाएपछि माथिबाट हरियो धनिँया हाल्ने र यो खानका लागि तयार हुन्छ ।

प्रकाशित : आश्विन १७, २०७९ १४:१८
पूरा पढ्नुहोस्
प्रतिक्रिया
पठाउनुहोस्
×