नेपालगन्जमा रामलीलाको रौनक- लुम्बिनी - कान्तिपुर समाचार

नेपालगन्जमा रामलीलाको रौनक

कान्तिपुर संवाददाता

नेपालगन्ज —  कोरोना महामारीका कारण पछिल्ला २ वर्ष रोकिएको ऐतिहासिक रामलीला मञ्चन यस वर्ष नेपालगन्जमा धुमधामका साथ सुरु भएको छ । भारतको मथुरा वृन्दावन धामबाट २१ जना कलाकार झिकाएर रातभरि संगीत, भजन, आरती गाई रामलीला देखाउन थालिएको छ ।

१ सय ५२ वर्षदेखि निरन्तर हुँदै आएको रामलीला मञ्चनको यो वर्षको संस्करण सोमबारदेखि सुरु भएको छ । जुन ११ दिनसम्म मञ्चन हुनेछ ।

जनकपुरमै रामलीला देखाउने कलाकार भए पनि भाषाका कारण भारतबाटै कलाकारको टोली ल्याउने गरिएको छ । १४ लाख रुपैयाँको लगानीमा सुरु गरिएको रामलीला मञ्चनका लागि जनसमुदायबाट नगद संकलन गरेर खर्च व्यवस्थापन गरिंदै आएको छ । रामलीला मञ्चनका लागि आएको भारतीय टोलीले ६ लाख रुपैयाँ पारिश्रमिक लिने गरेको छ ।

नेपालगन्ज–९ स्थित रामलीला मैदानमा भइरहेको रामलीला महोत्सवमा रामचरित्र मानसका आधारमा नारदमोह लीलादेखि रामको राज्याभिषेकसम्मको कथा मञ्चन हुनेछ ।

प्रत्येक दिन राति ८ बजेदेखि रामलीला देखाइँदै आइएको छ । विजयादशमीका अवसरमा मञ्चन हुने नेपालगन्जको ऐतिहासिक तथा सांस्कृतिक महत्त्वको यो लीला मञ्चनलाई यस वर्ष भव्यताका साथ सुरु गरिएको रामलीला सञ्चालक समितिका अध्यक्ष सन्तोषकुमार कनोडियाले बताए । ‘रामलीलाको १ सय ५५ औं जयन्ती समारोहमा वृन्दावन धामका ख्यातिप्राप्त राधारमण शर्मा महाराजद्वारा संगीतमय आधुनिक साजसज्जाका साथ लीलाको प्रदर्शन गराइरहेका छौं,’ उनले भने ।

सन् १९२५ देखि नेपालगन्जको रामलीला मैदान र टण्डन राइस मिलमा मञ्चन हुँदै आएको यो लीला नेपालीका साथै सीमावर्ती भारतीयबीच पनि लोकप्रिय छ । रामलीला हेर्न भारतीय सीमावर्ती बजारबाट पनि दर्शक आउने गरेको रामलीला सञ्चालक समिति सदस्य एवं नेपालगन्ज उद्योग वाणिज्य संघका निवर्तमान अध्यक्ष नन्दलाल वैश्यले सुनाए ।

प्रकाशित : आश्विन १५, २०७९ ०७:४९
प्रतिक्रिया
पठाउनुहोस्

कठौना–कटैया सडक निर्माण सुस्त

रासस

सप्तरी — सप्तरीको हुलाकी सडकको सहायक सडक खण्डको रुपमा निर्माण भइरहेका कठौना– पातो–फत्तेपुर–कटैया सडक निर्माण सुस्त छ । २०७५ जेठ ४ मा भएको सम्झौताअनुसार २०७७ मंसिर १७ सम्म सडक निर्माण सक्नुपर्नेमा हालसम्म ४८ प्रतिशत मात्रै काम सकिएको हुलाकी सडक आयोजना कार्यालयका इटहरीका इन्जिनियर सञ्जयकुमार ठाकुरले जानकारी दिए ।

अहिलेसम्म तेस्रो पटक म्याद थप भइसके तापनि सडक निर्माणले गति लिएको छैन ।

वर्षामा हिलाम्मये र हिउँदमा धूलाम्ये हुने यो सडक हुँदै दैनिक एक दर्जनभन्दा बढी यात्रुबाहक बस गुड्ने गर्छन् । डाक्नेश्वरी नगरपालिका–१ अमरलति चौकका धुव्र चौधरीले भने, ‘स्थानीयमा धुलोबाट श्वासप्रश्वासको रोग देख्न थालेको छ । अहिले सडक निर्माण भएको छैन ।’ ७० करोड ४४ लाख भ्याटसहित रकममा निर्माण भइरहेको सडकको कुल लम्बाइ १८ किलोटिर चौडाइ ११ मिटर छ ।

सात मिटर चौडाइ मात्र कालोपत्र हुने र कठौना बजारमा एक किलोमिटर र पातो बजारमा आठ सय मिटर नाला निर्माण हुने इन्जिनियर ठाकुरले जानकारी दिए । उनले ग्रामीण बस्तीमा थप नालाको आवश्यकता रहेको बताए । फत्तेपुर, कटैया गाउँमा दुई किलोमिटर सडकमा स्थानीयले मुआब्जा मागिरहेको तर कार्यालयमा उक्त सडक खण्डका लागि कुनै किसिमको मुआब्जा व्यवस्था निर्धारण नभएकोले माग पूरा गर्न नसकेको ठाकुरले बताए ।

उक्त सडक हुलाकी सहायक खण्डको रुपमा पूर्व–पश्चिम राजमार्गको कठौना बजारदेखि दक्षिण भारतीय सीमासम्म बन्ने भएको छ । तर, अहिले कठौनादेखि पातो बजारसम्म ग्राभेल मात्र भएको छ । सडक निर्माणको जिम्मा जेभीमा कान्छाराम–वाग्मती—देव एन्ड सायरले पाएका थिए ।

प्रकाशित : आश्विन १५, २०७९ ०७:२८
पूरा पढ्नुहोस्
प्रतिक्रिया
पठाउनुहोस्
×