बैंकले ब्याज बढाएको भन्दै व्यवसायीहरू आन्दोलित- लुम्बिनी - कान्तिपुर समाचार

बैंकले ब्याज बढाएको भन्दै व्यवसायीहरू आन्दोलित

दुर्गालाल केसी

दाङ — बैंकहरूले चर्को रुपमा ब्याज बढाएको भन्दै दाङका व्यापारीहरू सडकमा उत्रिएका छन् । दाङ जिल्ला उद्योग वाणिज्य संघको आह्वानमा जिल्लाका सबै उद्योग वाणिज्य संघका पदाधिकारी तथा सदस्यहरू घोराहीमा भेला भएर आइतबार प्रदर्शन गरेका छन् ।

बैंकहरूले ८ प्रतिशतबाट एकैपटक १६ प्रतिशतसम्म ब्याज पुर्‍याएपछि त्यसविरुद्ध सडकमा उत्रिनुपरेको दाङ जिल्ला उद्योग वाणिज्य संघका अध्यक्ष टंकसिंह बुढाथोकीले बताए ।

कोरोना महामारीका कारण मारमा परेको व्यापार क्षेत्र महंगी र बैंकको चर्को ब्याजले तहसनहस हुन थालेपछि आन्दोलमा उत्रनुपरेको तुलसीपुर उद्योग वाणिज्य संघका अध्यक्ष रामप्रसाद चालिसेले बताए ।

चर्को ब्याजका कारण उद्योग, कलकारखाना, व्यापार, व्यवसाय सबै चौपट हुने अवस्थामा पुगेको व्यवसायीहरूको गुनासो छ । यस क्रममा व्यवसायीहरूले प्लेकार्ड र ब्यानरसहित घोराही बजार परिक्रमा गरी जिल्ला प्रशासन कार्यालयमा पुगेर सहायक प्रमुख जिल्ला अधिकारी सावित्रा पुन थापामार्फत् राष्ट्र बैंक र नेपाल सरकारलाई ज्ञापनपत्रसमेत बुझएका छन् ।

प्रकाशित : आश्विन ९, २०७९ १७:२१
प्रतिक्रिया
पठाउनुहोस्

महाकालीमा पानीको सतह बढ्यो, शारदा ब्यारेजमा सवारी आवागमन बन्द

भवानी भट्ट

कञ्चनपुर — लगातारको वर्षासँगै महाकाली नदीमा पानीको बहाव बढेको छ । पानीको बहाव बढेपछि शारदा ब्यारेजको पुलमा चारपाँग्रे सवारीसाधन आवागमनमा रोक लगाइएको छ ।

महाकालीमा आइतबार बिहानैदेखि पानीको बहाव बढिरहेको र साँझसम्म पनि बढ्ने क्रम जारी रहेको बताइएको छ ।

जिल्ला प्रहरी कार्यालयका अनुसार आइतबार साँझ शारदा ब्यारेजमा पानीको बहाव १ लाख ८१ हजार ४८० क्युसेक मापन गरिएको छ । दिउँसो भने पानीको बहाव १ लाख १० हजार क्युसेक थियो ।

पहाडी जिल्लामा निरन्तर वर्षा भइरहेकाले बाढी अझै बढ्ने अनुमान गरिनुका साथै नदी तटीय क्षेत्रमा सतर्कताका लागि सूचना जारी गरिएको छ।

महाकालीमा पानीको बहाव १ लाख क्युसे नाघ्ने बितिक्कै चारपाँग्रे सवारीसाधन आवागमनमा रोक लगाइने गरिन्छ । झण्डै सय वर्ष पुरानो पुल जीर्ण भएका कारण जोखिम हुने भन्दै ठूला सवारीसाधन आवागमनमा रोक लगाइने गरिएको छ । गत साता पनि बाढीका कारण दुई दिनसम्म ठूला सवारीसाधन आवागमनमा रोक लगाइएको थियो ।

प्रकाशित : आश्विन ९, २०७९ १७:११
पूरा पढ्नुहोस्
प्रतिक्रिया
पठाउनुहोस्
×