ग्राहकलाई स्वदेशमै रोक्न व्यापारी पुगे नाकामा 

नेपालगन्ज — दसैंको मुखमा रुपैडिहा किनमेल गर्न जानेको भीड बढिरहेको बेला नेपालगन्जका व्यापारीले नाकामा पुगेर नेपाली ग्राहकहरूलाई स्वदेशमै सामान खरिद गर्न आग्रह गरेका छन् । 

व्यापारीहरूले शनिबार नाकामा पुगेर ‘स्वदेशमै सामान खरिद गरौं’ भन्ने पर्चा वितरण गरे। नेपालगन्ज उद्योग वाणिज्य संघको अगुवाइमा व्यापारीको टोली जमुनाहा नाकामा पुगेर स्वदेशमै खरिद गर्न आग्रह गरेका हुन् ।

बैंकको चर्को ब्याजदर वृद्धि र कारोबारको २०/२५ प्रतिशतमात्र लगानी गर्ने नेपाल राष्ट्र बैंकको पछिल्लो नीतिको संघले विरोध गरिरहेको छ। संघले शुक्रबार राष्ट्र बैंक अगाडि धर्ना दिएको थियो ।

नेपालगन्ज उद्योग वाणिज्य संघका अध्यक्ष अब्दुल वाहिद मन्सुरीले सीमावारि नै बजार बढाउन स्वदेशमै किनमेल गर्न अनुरोध गरे । उनले स्वदेशमै किनमेल गर्दा राष्ट्रिय अर्थतन्त्र बलियो बनाउन टेवा पुग्ने विश्वास व्यक्त गरे ।

संघका महासचिव चिरञ्जीवी ओलीले सस्तोको नाममा रुपैडिहा पुगेका नेपाली ग्राहक ठगिँदै आएको जिकिर गरे ।