धानमा क्षति भोगेका किसानलाई राहत- लुम्बिनी - कान्तिपुर समाचार

धानमा क्षति भोगेका किसानलाई राहत

सन्जु पौडेल

लुम्बिनी — रूपन्देहीको तिलोत्तमा नगरपालिका–१२ का किसान कृष्णप्रसाद पौडेलले गत वर्ष १० बिघा खेतमा रोपाइँ गरे । तर, पानीले ३ बिघाको धान नष्ट भयो । उनलाई नगरपालिकाले वडाको सिफारिस र अनुगमनपछि राहत रकम दिएको छ । अढाई बिघाको क्षतिपूर्ति दाबी गरेर पहिलो किस्ताको राहत रकम बुझेको उनले बताए ।

‘मेरो भागमा ४० हजारभन्दा बढी राहत स्वरूपको रकम पाइने भनिएको छ,’ उनले भने, ‘पहिलो किस्ता बराबर ८ हजार ४ सय ८८ रुपैयाँ बुझें ।’

१ कठ्ठा ५ धुर जमिन भएकी मथुरा पन्थले राहत रकमबापत २ हजार १० रुपैयाँ पाएकी छन् । उनले लगाएको धान पूरै पानीले ढालिदिएपछि चामल किन्न बाध्य भएको उनले सुनाइन् । ‘४ मुरी धान उत्पादन हुन्थ्यो,’ उनले भनिन्, ‘गरिबलाई प्रकृतिले ठग्यो, पालिकाले केही उद्धार गरेजस्तो महसुस भयो ।’ आफूहरूको मर्का बुझेर स्थानीय तहले गरेको काम खुसीयोग्य लागेको उनले सुनाइन् । उनीहरूजस्तै तिलोत्तमाका अन्य २ सय ६८ किसानले पनि मंगलबार गत वर्षको धानबाली क्षतिबापतको रकम बुझेपछि हर्षित भएका थिए । बेमौसमी वर्षाले धानबालीमा क्षति पुगेपछि चिन्तित बनेका किसानलाई नगरपालिकाले सहयोग गरेको हो । पालिकाले संघीय सरकारसँग आग्रह गरी जिल्ला प्रशासन कार्यालयमार्फत ८ लाख ९६ हजार रुपैयाँ प्राप्त गरी किसानलाई हस्तान्तरण गरेको पालिकाका कृषि शाखा अधिकृत रामप्रसाद खनालले बताए । उनले मिहिनेत गरेर लगाएको बाली पानीले मासेपछि किसान पीडित बनेकामा पालिका मलम बन्न खोजेको बताए ।

पीडित किसानले आफ्नो क्षतिका आधारमा २ हजार १० देखि ८ हजार ४ सय ८८ रुपैयाँसम्म क्षतिपूर्ति रकम पाएका छन् । गत भदौ १० गते बसेको जिल्ला विपद् व्यवस्थापन समितिको बैठकको निर्णय अनुसार सूचीकृत पीडित किसानलाई क्षतिपूर्ति रकम वितरण गरिएको हो । किसानका समस्या समाधान गर्न नगरपालिका प्रतिबद्ध रहेको तिलोत्तमा नगर प्रमुख रामकृष्ण खाँणले बताए । ‘किसानको लगानी र श्रमको लेखाजोखा गर्न सकिंदैन,’ उनले भने, ‘केही भए पनि राहत मिलोस् भनेर कदम चालेका हौं ।’ संघीय सरकारलाई आग्रह गरी प्राप्त भएको बजेटअन्तर्गत पीडित किसानलाई पहिलो किस्ताबापतको राहत रकम वितरण गरिएको र बाँकी रकमका लागि पनि पहल गरिरहेको उनले बताए ।

राहत रकम वितरणका लागि निम्न वर्ग, मध्यम वर्ग र उच्च वर्ग गरी तीन भागमा विभाजन गरी सोका आधारमा राहत रकम वितरण गरिएको कृषि अधिकृत दोमलाल भुसालले बताए । १० कट्ठासम्म खेत भएका किसानलाई निम्न, ११ देखि ५० कट्ठासम्म खेती गरेकालाई मध्यम र सोभन्दा माथि धान खेती गरेका किसानलाई उच्च वर्ग भनी विभाजन गरिएको थियो । निम्न वर्गका किसानलाई क्षतिको ६५ प्रतिशत, मध्यम वर्गका किसानलाई ३० प्रतिशत र उच्च वर्गका किसानलाई क्षतिको २० प्रतिशतसम्म राहत रकम प्रदान गरिने कृषि अधिकृत भुसालले बताए । राहत रकमका लागि २ सय ७० किसानले फर्म भरेको र ती सबै किसानलाई राहत रकम प्रदान गरिएको कृषि अधिकृत भुसालले बताए ।

प्रकाशित : आश्विन ५, २०७९ १०:००
प्रतिक्रिया
पठाउनुहोस्

चुनावी खर्च विवरण नबुझाएका रुपन्देहीका १५ पालिका प्रमुखलाई जरिवाना

सन्जु पौडेल

तिलोत्तमा — समयसीमाभित्र चुनावी खर्च विवरण नबुझाएकोका बुटवल उपमहानगरपालिका प्रमुख खेलराज पाण्डेयसहित जिल्लाका १५ पालिका प्रमुखले जरिवाना तिर्नुपर्ने भएको छ । 

निर्वाचन आयोगले समयसीमाभित्र चुनावी खर्च विवरण नबुझाएको भन्दै बुटवल उपमहानगरपालिका मेयर खेलराज पाण्डेयलाई ५ लाख ५० हजार, सैनामैना नगरपालिका मेयर फणेन्द्र शर्मा, सिद्धार्थनगर नगरपालिका इश्तियाक अहमद खां, देवदह नगरपालिका मेयर धुव्रप्रसाद खरेल, लुम्बिनी सांस्कृतिक नगरपालिका सजरुद्दिन मुसलमानलाई ४ लाख ५० हजार रूपैयाँ जरिवाना तोकेको छ ।

त्यस्तै, ओमसतिया गाउँपालिका, कंचन गाउँपालिका, कोटहीमाई गाउँपालिका, गैडहवा गाउँपालिका, मर्चवारी गाउँपालिका, मायादेवी गाउँपालिका, रोहिणी गाउँपालिका, शुद्धोधन गाउँपालिका, सम्मरीमाई गाउँपालिका, सियारी गाउँपालिकाका अध्यक्षलाई ३ लाख ५० हजार रुपैयाँ जरिवाना तोकिएको छ ।

रुपन्देहीका ५ नगरपालिकामध्ये तिलोत्तमा नगरपालिका प्रमुख रामकृष्ण खाँणले मात्रै समयसीमा भित्रमा निर्वाचन खर्च विवरण बुझाएका थिए । खाँणका निकट प्रतिद्वन्द्वी मोहन चापागाईंलाई पनि आयोगले समयमै निर्वाचन खर्च विवरण नबुझाएको भन्दै ४ लाख ५० हजार रुपैयाँ जरिवाना तोकेको छ । ६ महिनाभित्र जरिवाना तिर्नुपर्ने छ र सो समयभित्र जरिवाना नतिरे उनीहरुको पद जाने निर्वाचन आयोगले जनाएको छ ।

निर्वाचन आयोग ऐन दफा २६ को उपदफा १ अनुसार उनीहरूसहित १ लाख २३ हजार ६ सय २४ उम्मेदवारलाई कारबाही गर्ने निर्णय आयोगको छ। निर्वाचन परिणाम सार्वजनिक भएको ३० दिनभित्र खर्च विवरण बुझाउनुपर्ने प्रावधान छ । त्यस अवधिभित्र विवरण नबुझाउनेहरूलाई आयोगले कारबाही गरेको निर्वाचन आयोगले जनाएको छ । समयसीमा भित्रमा ८ हजार ६ सय ६६ जनाले तोकिएको समयावधिपछि निर्वाचन खर्चको विवरण बुझाएका थिए ।


प्रकाशित : आश्विन ४, २०७९ १६:२१
पूरा पढ्नुहोस्
प्रतिक्रिया
पठाउनुहोस्
×