लुम्बिनी पूर्ण खोप सुनिश्चित प्रदेश घोषणा- लुम्बिनी - कान्तिपुर समाचार

लुम्बिनी पूर्ण खोप सुनिश्चित प्रदेश घोषणा

लुम्बिनी प्रदेशका ९० हजार २ वर्ष मूनिका बालबालिकामध्ये ६६ हजार ४ सय ६४ जनाले पूर्ण खोप लगाए
अमृता अनमोल

बुटवल — लुम्बिनी पूर्ण खोप सुनिश्चित प्रदेश बनेको छ । ९० प्रतिशतभन्दा धेरै बालबालिकाले पूर्ण खोप लगाएपछि लुम्बिनी प्रदेशलाई पूर्ण खोप सुनिशिचत घोषणा गरिएको हो ।

शुक्रबार विशेष कार्यक्रम गरी प्रदेशलाई पूर्ण खोप सुनिश्चितता गरिएको हो ।

स्थायी राजधानी दाङको देउखुरीको राप्ती गाउँपालिकामा आयोजित कार्यक्रममा प्रदेश प्रमुख अमिक शेरचनले पूर्ण खोप सुनिश्चिता घोषणा गरेका हुन् । घोषणासभामा बोल्दै उनले अब सरकारले छुटेका बालबालिकालाई तल्काल पूर्ण खोपको दायरामा ल्याउन र दिगोपनामा काम गर्न सुझाव दिए ।

स्वास्थ्यमन्त्री इन्द्रजीत थारुले बालबालिकालाई सरुवा रोगको संक्रमणबाट बचाएर स्वस्थ र निरोगी बनाउन रातदिन अभियानमा खटेर पूर्ण खोप घोषणा गर्न सफल भएको बताए । पूर्ण खोप पाउनु बालअधिकार र खोप दिनु राज्यको दायित्व भएको बताउँदै उनले लुम्बिनी प्रदेशले आफ्नो दायित्व पूरा गरेको उनले जनाए ।

राष्ट्रिय खोप तालिका अनुसार १५ महिनाभन्दा तलका बालबालिकालाई १३ वटा सरुवा रोगबाट बचाउन विभिन्न खोपहरु लगाउने गरिन्छ । नियमअनुसार ९० प्रतिशतभन्दा धेरै बालबालिकाले खोप लगाएपछि पूर्ण खोप घोषणा गरिन्छ । लुम्बिनी प्रदेशमा करिब ९० हजार २ वर्ष मूनिका बालबालिका छन् । त्यसमध्ये ६६ हजार ४ सय ६४ जनाले पूर्ण खोप लगाएका छन् । ६४ हजारले नियमित खोप केन्द्रबाट खोप लगाएका हुन् भने २ हजार ४ सय ६४ जना बालबालिकालाई विशेष अभियानमार्फत घरदैलो गरेर पूर्ण खोप लगाइएको थियो ।

प्रदेशमा २ हजार ८ सय २२ वटा खोप केन्द्र छन् । स्वास्थ्य मन्त्रालयका सचिव डा. विकास देवकोटाले छुटेका सबै बालबालिकाहरु विशेष अभियानमार्फत वैशाखभित्र खोपको दायरामा ल्याउने बताए । प्रदेशले यसअघि १२ वटै जिल्लालाई पूर्ण खोप घोषणा गरेको थियो । २०७० सालमा देशमै पहिलो पटक पाल्पा र नवलपरासी पश्चिम पूर्ण खोप सुनिश्चित भएका थिए ।

गत वर्ष बर्दिया, कपिलवस्तु र रुकुमपूर्व पूर्ण खोप जिल्ला बनेपछि यस वर्ष प्रदेश घोषणा गरिएको हो । स्वास्थ्य निर्देशक डा. विनोदकुमार गिरीले विपन्न, श्रमिक र विकटका बालबालिकालाई पूर्ण खोपको दायरामा ल्याउन स्वास्थ्य स्वयंसेविका, स्वास्थ्यकर्मी र अभियानकर्ताहरुले विशेष भूमिकाका कारण पूर्ण खोप सुनिश्चितता गर्न सफल भएको बताए । यसअघि गण्डकी प्रदेश पूर्ण खोप सुनिश्चित भएको छ ।

निर्देशिका अनुसार प्रदेशले गरेको काम र तथ्यांकको अनुगमन गरी पूर्ण खोप सुनिश्चितताका लागि संघीय सरकारले प्रमाणिकरण गर्नुपर्छ । शुक्रबार संघीय स्वास्थ्य विभागका बाल स्वास्थ्य तथा खोप शाखा प्रमुख सागर दाहालले प्रमाणिकरण प्रमाणपत्र दिएका थिए ।

घोषणासभामा पूर्ण खोपमा सहयोग गर्ने साझेदार निकाय, १२ वटै जिल्ला समन्वय समिति, स्वास्थ्य कार्यालय, स्थानीय तहलगायतलाई प्रशंसापत्रसहित सम्मान गरिएको थियो ।

प्रकाशित : भाद्र ३१, २०७९ १८:५८
प्रतिक्रिया
पठाउनुहोस्

लुम्बिनीमा महिला सामाजिक उद्यमी उत्सव

४ हजार ५ सय साना किसान तथा उद्यमी महिला सहभागी
अमृता अनमोल

बुटवल — महिला सशक्तीकरणका लागि उद्यम भन्ने नारासहित लुम्बिनीमा आयोजना गरिएको महिला सामाजिक उद्यमी उत्सव सम्पन्न भएको छ । आर्थिक उपार्जन र आत्मनिर्भरताले मात्रै दिगो महिला सशक्तीकरण हुने निष्कर्ष निकाल्दै बिहीबार सुरु भएको महिला उत्सव सम्पन्न भएको हो ।

उत्सवमा देशभरबाट छनोट भएका करिब ४ हजार ५ सय साना किसान तथा उद्यमी महिला सहभागी थिए । सामाजिक उद्यमी महिला सञ्जाल र हेफर इन्टरनेसनलले उत्सव आयोजना गरेका हुन् ।

सामाजिक उद्यमी महिला सञ्जालमा ३ लाख १४ हजार साना किसान महिला आबद्ध छन् । उनीहरूले २ सय ५५ वटा सामाजिक उद्यमी महिला सहकारी संस्था सञ्चालन गरेका छन् । त्यसबाट उत्कृष्ट महिला छनोट गरेर उत्सवमा सहभागी गराइएको सञ्जालकी अध्यक्ष पार्वती न्यौपानेले बताइन् । महिलाहरूलाई समूह र सहकारीमा आबद्ध गर्दै आर्थिक तथा सामाजिक सशक्तीकरण गर्ने लक्ष्यसहित सञ्जालले काम गरेको छ ।

उत्सवमा उत्कृष्ट ४ सहकारीलाई पुरस्कृत गरिएको छ । उत्सवमा बोल्दै लुम्बिनी प्रदेशका प्रमुख अमिककुमार शेरचनले ग्रामीण क्षेत्रका महिलाहरूको आर्थिक तथा सामाजिक सशक्तीकरण र क्षमता विकासबाट आफू प्रभावित भएको बताए । आवश्यकताको पहिचान र समस्यामा सहजीकरण गर्न सक्ने हो भने बेरोजगार भएका र घरको चुलोचौकोमा भुलेका धेरै महिला उत्पादनमा जोडिन सक्ने, उद्यमी बन्ने र जीविका फेर्न सक्ने उनले जनाए ।

कार्यक्रममा संघीय सांसद गोकर्ण विष्ट, प्रदेश सांसदहरू, लुम्बिनी प्रदेशका विभिन्न स्थानीय तहका प्रमुखलगायतले उद्यमी महिलाहरूको उत्पादन, बजारीकरण र उद्यम सञ्चालनमा सघाउने प्रतिबद्धता जनाएका थिए ।

प्रकाशित : भाद्र ३०, २०७९ १९:१३
पूरा पढ्नुहोस्
प्रतिक्रिया
पठाउनुहोस्
×