केन्द्रले बजेट पठाओस्, भारतबाटै मल ल्याउँछौं : प्रदेशमन्त्री रायमाझी

उनले मल खरिदका लागि प्रदेश सरकारलाई कुनै अधिकार नरहेको बताइन् । ‘केन्द्रले मल आफैं खरिद गर्छ । हामीले प्रदेशमै मल किन्न बजेट पठाइदिन अनुरोध गर्दा सुनुवाइ हुँदैन,’ शुक्रबार कृषि ज्ञान केन्द्र बाँकेको नवनिर्मित भवन उद्घाटनपछि आयोजित कार्यक्रममा उनले भनिन्,‘खेतीको सिजनमा किसानले मल पाउँदैनन् । हामीले चाहेर पनि मल उपलब्ध गराउन सकेका छैनौं ।’

मन्त्री रायमाझीले मल अभावको समस्या समाधान गर्न केन्द्र सरकारसँग आग्रह गर्दै आएको तर सुनुवाइ नभएको बताइन् । ‘जति आग्रह गरे पनि सुनवाइ हुन सकेको छैन,’ उनले भनिन् ।

मल अभावकै कारण किसानहरूले मल बिना नै रोपाइँ गर्नु परेको र उनीहरूले सास्ती खेप्नु परेको मन्त्री रायमाझीको भनाइ थियो । तर केन्द्र सरकारले मल किन्ने बजेट प्रदेशलाई पठाए आफूहरूले जहाँबाट पनि जसरी पनि खरिद गरेर किसानलाई वितरण गर्नसक्ने उनले बताएकी थिइन् । उनले भनिन्, ‘केन्द्रले बजेट पठाओस् हामी भारत गएर हुन्छ कि कहाँबाट हुन्छ किनेर किसानलाई उपलब्ध गराउँछौ ।’

कृषि ज्ञान केन्द्र बाँकेको नवनिर्मित भवनको करिब ५ वर्षमा निर्माण सम्पन्न भएपछि उद्घाटनका लागि उनी नेपालगन्ज आएकी थिइन् ।