सिकलसेल अस्पताल निर्माण सुरु

एनेमियापीडित बिरामीको उपचारका लागि घरखेत बिक्री गर्नुपर्ने बाध्यता हटाउन र सहज रूपले उपचार गर्न केन्द्रको स्थापना गर्न थालिएको हो । एनेमिया पीडितहरूको उपचार हाल नेपालगन्जस्थित भेरी अस्पतालमा हुने गरेको छ । तर, उनीहरूले सहज रूपमा सेवा पाउन सकेका छैनन् । दाङको थारु स्वास्थ्यकर्मी संघको अगुवाइमा ६ जिल्लाका अगुवाहरूलाई एकजुट पारेर अभियान सुरु गरिएको हो । केन्द्र स्थापनाका लागि नेपालगन्जसँग जोडिएको जानकी गाउँपालिका–३ मा जग्गा खरिद गरी केन्द्रको बिहीबार शिलान्यास गरिएको छ ।

स्वास्थ्य अनुसन्धान परिषद्सँग त्रिभुवन विश्वविद्यालय ट्रफ अनुसन्धान प्रयोगशालाले पछिल्लोपल्ट गरेको अनुसन्धानमा समयमै सावधानी नअपनाए मुलुकले ठूलो क्षति बेहोर्नु पर्ने चेतावनी दिएको छ । उसले पश्चिम नेपालका अविवाहित थारु समुदायका महिलाको डीएनए परीक्षण गर्दा १८ प्रतिशत व्यक्तिमा सिकलसेल हेटेरोजाइगोस ट्रेट पाइएको जनाएको छ । उक्त अनुसन्धानले ०६८ को थारु समुदायको जनसंख्यालाई आधार मान्दै ३ लाख बढी व्यक्तिमा सिकलसेल रोगको गुण पाइएको जनाएको हो । त्यस्तै, समयमै डीएनए परीक्षण गरी जेनेटिक परामर्शको व्यवस्था नगर्ने हो भने मुलुकले ठूलो क्षति बेहोर्नु पर्ने उसले चेतावनी दिएको छ ।