वडाध्यक्षलाई पालिकाको जिम्मा- लुम्बिनी - कान्तिपुर समाचार

वडाध्यक्षलाई पालिकाको जिम्मा

नवीन पौडेल

परासी — पश्चिम नवलपरासीको पाल्हीनन्दन गाउँपालिकामा उपाध्यक्षलाई बेवास्ता गर्दै वडाध्यक्षलाई कार्यवाहक अध्यक्षको जिम्मेवारी दिइएको छ । आफूविरुद्ध पक्राउ पुर्जी जारी भएपछि ३ सातायता पालिका अध्यक्ष बैजुप्रसाद गुप्ता कार्यालयमा उपस्थित भएका छैनन् ।


उनको अनुपस्थितिमा कार्यपालिका बैठकमा उपस्थित बहुमत सदस्यले वडाध्यक्षलाई कार्यवाहक अध्यक्षको जिम्मेवारी दिएका हुन् । स्थानीय सरकार सञ्चालन ऐन, २०७४ मा भने गाउँपालिका अध्यक्ष लगातार एक सातासम्म कार्यालय उपस्थित नभए उपाध्यक्षलाई कार्यवाहकको जिम्मेवारी दिनुपर्ने उल्लेख छ ।

लागूऔषध मुद्दामा २ भारतीयलाई नियतवश फसाएको आरोपमा अनुसन्धानका लागि गुप्तालाई अदालतले पक्राउ पुर्जी जारी गरेको थियो । त्यसपछि उनी सम्पर्कविहीन छन् । पालिका अध्यक्ष उपस्थित नभएपछि कार्यपालिका बैठकको बहुमतले वडा–१ का अध्यक्ष चुल्हाईप्रसाद यादवलाई कार्यवाहकको जिम्मेवारी दिइएको हो । उक्त निर्णयमा उपाध्यक्ष फातुमा खातुन अन्सारीले फरक मत राखेकी छन् ।

‘उपाध्यक्षलाई कार्यवाहक नदिएर वडाध्यक्षलाई दिइएको छ । यो जालसाजीपूर्ण काम हो । स्थानीय तहमा प्रतिपक्ष नहुने भन्ने संवैधानिक मान्यताविरुद्ध यस्तो काम गरिएको छ,’ उनले भनिन् ।

प्रमुख प्रशासकीय अधिकृत श्री गौतमले कार्यपालिकाले गरेको निर्णय मन्त्रालयमा पठाइएको र मन्त्रालयले भनेअनुसार नै आगामी कार्यसम्पादन गर्ने बताए । ‘कार्यपालिकाको बहुमतले निर्णय गरेको छ । स्थानीय सरकार सञ्चालन ऐनमा पनि स्पष्ट उल्लेख नभएको हुँदा मन्त्रालयमा लेखेर पठाएका हौं,’ उनले भने, ‘आगामी दिनमा मन्त्रालयले पठाउने निर्देशनअनुसार नै काम हुनेछ ।’

प्रकाशित : भाद्र २६, २०७९ ०८:५१
प्रतिक्रिया
पठाउनुहोस्

पश्चिम नवलपरासीमा कांग्रेसबाट ६१ जनाको नाम सिफारिस

नवीन पौडेल

पश्चिम नवलपरासी — पश्चिम नवलपरासीमा कांग्रेसले प्रत्यक्षतर्फ प्रतिनिधिसभा, प्रदेशसभा र समानुपातिक सदस्यतर्फ गरी ६१ जनाको नाम सिफारिस गरेको छ । समानुपातिकतर्फको प्रतिनिधिसभा र प्रदेशसभा सदस्यको संख्या ४० र प्रत्यक्षतर्फको प्रतिनिधिसभा र प्रदेशसभा सदस्यमा २१ जनाको नाम सिफारिस गरिएको जिल्ला सचिव कुलदीप आचार्यले बताए । 

प्रतिनिधिसभा निर्वाचन क्षेत्र नं. १ मा प्रत्यक्षतर्फ ५ जनाको नाम सिफारिस गरिएको छ । जसअनुसार संविधानसभा सदस्य एंव नेपाली कांग्रेस लुम्बिनी प्रदेश महामन्त्री विक्रम खनाल, संविधान सभा सदस्य देवकरण जयसवाल, कुलदीप आचार्य, उषा बास्तोला र उद्योगपति विनोद चौधरीलाई सिफारिस गरेको छ ।

निर्वाचन क्षेत्र नम्बर १ को प्रदेश सभा (क) प्रत्यक्षमा विश्वप्रेम पाठकको एकल सिफारिस गरिएको छ । प्रदेश सभा (ख) बाट मुकुल कुमार आचार्यको नाम एकल सिफारिस गरिएको छ ।

त्यसैगरी प्रतिनिधिसभा निर्वाचन क्षेत्र नं. २ को प्रत्यक्षतर्फ ४ जनाको नाम सिफारिस गरिएको छ । जसअनुसार प्रतिनिधिसभा सदस्य एंव केन्द्रीय सदस्य देवेन्द्रराज कंडेल, भीमबहादुर थापा, नरेन्द्र गुप्ता र दुर्गा कोइरालाको नाम सिफारिस गरिएको छ । सोही निर्वाचन क्षेत्रको प्रदेश सभा (क) को प्रत्यक्षतर्फ यामलाल पाण्डे, यामप्रसाद भुसाल, सोमबहादुर रायमाझी र मोहनप्रसाद शर्माको नाम सिफारिस गरिएको छ ।

प्रदेश सभा (ख) प्रत्यक्षतर्फ प्रदेश सभा सदस्य बैजनाथ कलवार, विक्रम यादव, वीरेन्द्र अग्रहरी, नगेन्द्र अग्रहरी र सीता ज्ञवाली, विनोदकुमार पाण्डेको नाम सिफारिस गरिएको छ । त्यसैगरी प्रतिनिधिसभा समानुपातिक सदस्यतर्फ लालबहादुर गुरुङ, गिरीषबहादुर थारु, ज्ञानीमाया लामा र अम्बिका चौधरी सिफारिस भएका छन् । त्यस्तै प्रतिनिधिसभाको समानुपातिक सदस्यतर्फ सिफारिस हुनेमा पार्टी जिल्ला सभापति अर्जुन पोखरेल, रामचन्द्र मौर्य र मञ्जु खत्री पनि रहेका छन् ।

प्रदेशसभा समानुपातिक सदस्यतर्फ शुकबहादुरु गुरुङ, दीपप्रकाश लोहनी, तपचन्द्र विश्वकर्मा, कर्णबहादुर विक, प्रेमकामु मगर, पशुपति चौधरी, सूर्यमान चौधरी थारु कमला पराजुली, धनमति सापकोटा, बिजुला श्रेष्ठ, रमिता चौधरी, लक्ष्मी तिवारी र विन्दा कहारलाई सिफारिस गरिएको छ ।

प्रदेशसभाकै समानुपातिक सदस्यतर्फ हस्मुदिन शेख, राधिका पाण्डे, बिमला उपाध्याय, रमादेवी चौधरी, देवी पोखरेल, उत्तमा राय, रामबहादुर क्षेत्री, गीता पौडेल, गोपी पुन, रुद्रनाथ राय थारु, सीता गुरुङ, ज्योति ढकाल पराजुली, शिवशंकरप्रसाद राय, कृष्णनारायण श्रेष्ठ, सुनिता सुवेदी श्रेष्ठ, टिचन गुरुङ, आरधना भट्ट, अयोध्याप्रसाद यादव, राधेश्याम पाठक र अनिता दवाडी तिवारी र रम्भा कुवरलाई सिफारिस गरिएको छ ।

जिल्लामा देवेन्द्रराज कँडेल र विक्रम खनालबीचको गुटको चर्को द्वन्द्वको कारण एक अर्काले दोषारोपण गर्दै आएका छन् । क्षेत्र नम्बर २ का सभापति माधव पाण्डेले कँडेलको एकल सिफारिस गरिएको बताए पनि जिल्ला समितिले भने यसलाई मान्यता दिएको छैन् ।

प्रकाशित : भाद्र २०, २०७९ २०:०४
पूरा पढ्नुहोस्
प्रतिक्रिया
पठाउनुहोस्
×