बढैयाताल गाउँपालिकाद्वारा उच्च अदातलको आदेश अटेर- लुम्बिनी - कान्तिपुर समाचार

बढैयाताल गाउँपालिकाद्वारा उच्च अदातलको आदेश अटेर

उद्यम सहयोगीले पाएनन् १४ महिनाको तलब
ठाकुरसिंह थारु

नेपालगन्ज — बढैयाताल गाउँपालिकाले उच्च अदालत नेपालगन्ज इजलासले उद्यम सहयोगी चौथो तहको कर्मचारीको पारिश्रमिक तथा करार नवीकरण गर्न दिएको आदेशको अटेर गरेको छ ।

०७७ पुस १ गते भ्याकेन्सीमा छनोट भई उद्यम सहयोगी चौथो तहमा कार्यरत पुष्पा शर्माले एक वर्षदेखि पारिश्रमिक नदिएको र करार सम्झौता नभएको भन्दै उच्च अदालतमा रिट दर्ता गरेकी थिइन् ।

उच्च अदालतका न्यायाधीश केशवराज जोशी र टंकप्रसाद गुरुङको संयुक्त इजलासले २०७९ असार गर्ने आदेश दिएको थियो । तर, बढैयाताल गाउँपालिकाका प्रमुख प्रशासकीय अधिकृत धर्मराज न्यौपानेले नियतवश १४ महिनाको पारिश्रमिक नदिई करार सम्झौतासमेत नवीकरण गर्न आलटाल गर्दै आएका छन् । पीडित शर्माले पटकपटक पारिश्रमिक माग गर्दा अनेक बाहना बनाएर प्रमुख प्रशाकीय अधिकृतले दु:ख दिने गरेको गुनासो गरिन् ।

‘मैले बढैयाताल गाउँपालिकाको कार्यालयबाट उद्यम विकास सहयोगी चौथो तहमा लिएको सबै परीक्षामा सफल भई ०७७ पुस ९ गतेदेखि ०७८ सम्मको करार सम्झौता गरी जिम्मेवारी निर्वाह गर्दै आएकी छु । हाल संघीय मामिला तथा सामान्य प्रशासन मन्त्रालयले ०७९ साउन ४ गतेसम्म करार सम्झौता थपेको छ,’ पीडित शर्माले भनिन्,‘मन्त्रालयको आदेशसमेतलाई पालिकाले अटेर गरेको छ । त्यसविरुद्ध उच्च अदालतचतमा रिट गरेपछि पारिश्रमिक उपलब्ध गराउन र करार सम्झौतालाई निरन्तरता दिने आदेश लत्याइएको छ ।’

उच्च अदालत नेपालगन्जको आदेशमा भनिएको छ, ‘करार सम्झौता गरेका कर्मचारीको कार्य सन्तोषजनक रुपमा नगरेको लागेमा अध्यक्षले आवश्यक छानबिन गरी वा गर्न लगाई सफाइको मौका दिई कार्यालयले जुनसुकै बखत हटाउन सकिने छ भन्ने उल्लेख भएको देखिन्छ । तर, यी निवेदिकालाई लगाइएको आरोपको सम्बन्धमा प्रारम्भिक रुपमा कुनै प्रकारको सुनुवाइको मौका दिएको नदेखिएकाले सिर्फ करार सम्झौताअनुसार नियमित कामकाज गरिरहेकी निवेदिका करार सम्झौता नगर्ने भन्ने प्रमुख प्रशासकीयको टिप्पणी आदेश प्रथम दृष्टिमा नै अधिकार क्षेत्रविहीन गैरकानुनी, पूर्वाग्राही, बदनियतपूर्ण देखिन आएकाले करार सम्झौता थप नगर्न गरिएको कार्य उत्प्रेषणको आदेशले बदर छ । कामकाज गरेको अवधिको तलबभत्ता समेत भुक्तानी दिनू ।’

बढैयाताल गाउँपालिकाका प्रमुख प्रशासकीय अधिकृत धर्मराज न्यौपानले भने करार सम्झौताका लागि कागजात नपुगेको भन्दै आलटाल गर्दै आएका छन् । उनले प्रक्रिया नपुगेको र कार्यसम्पादन सन्तोषजनक नरहेका कारण करार सम्झौता नगरिएको दाबी गरेका छन् । तर, उच्च अदालतले भने प्रमुख प्रशासकीय अधिकृतले दाबी गरेको तर्कलाई न्यायसंगत नभएको भन्दै बदर गरिदिएको छ ।

नागरिक समाज बढैयाताल गाउँपालिकाका अध्यक्ष बालकृष्ण लामिछानेले अदालतको आदेश अटेर गर्ने अधिकारीहरूलाई कारबाहीको माग गरे । उनले अदालतको आदेश कुनै पनि हालतमा कार्यान्वयन हुनुपर्ने सबैको दायित्व रहेको सुझाए ।

प्रकाशित : भाद्र १, २०७९ १२:१६
प्रतिक्रिया
पठाउनुहोस्

कराँते च्याम्पियनसिपमा बागलुङका दुई खेलाडी सहभागी हुने

प्रकाश बराल

बागलुङ — शुक्रबारदेखि थाइल्यान्डमा हुने ओपन कराँते डोजो च्याम्पिएनसिप २०२२ मा भाग लिन बागलुङका दुई खेलाडी प्रस्थान गरेका छन् । बागलुङको बडिगाड डोजोका खेलाडीहरू नवीन थापा र बिज्जल पाइजाले खेलमा सहभागिता जनाउने भएका हुन् । बुधबार उनीहरूलाई एक कार्यक्रमका बिच बिदाइ समेत गरिएको छ । 

बडिगाड गाउँपालिका ५ का अध्यक्ष विष्णुप्रसाद आचार्य र प्रशिक्षक राजनकुमार पाइजाले उनीहरूलाई बिदाइ गरे । पहिलो पटक ग्रामीण स्तरबाट अन्तर्राष्ट्रिय खेलमा सहभागी पठाउन पाएकोमा खेलाडीले खुसी व्यक्त गरेका छन् । उनीहरूले उच्च मनोबलका साथ खेल्ने पनि बताए ।

प्रशिक्षक राजनकुमार पाइजाले खेलाडीको तयारी राम्रो भएकाले उत्कृष्ट प्रदर्शन गर्न सक्ने विश्वास व्यक्त गरे । ‘आफ्नो क्षेत्रको प्रतिनिधित्व गर्दै विदेशमा खेल्न जान पाउनु सौभाग्य हो‚’ पाइजाले भने, ‘हार-जीत स्वभाविक होला तर देशकै प्रतिनिधित्व गर्ने अवसर ठूलो हो ।’

बागलुङमा अहिले २ सय ७० भन्दा बढी ब्ल्याक बेल्ट पाएका युवा खेलाडीहरू कराँतेमा सक्रिय छन् । विराटनगरमा भएको आठौं खेलकुद प्रतियोगितामा पाइजा नेपाल च्याम्पियन भएका थिए ।

प्रकाशित : भाद्र १, २०७९ १२:०१
पूरा पढ्नुहोस्
प्रतिक्रिया
पठाउनुहोस्
x
×