बुटवलको होटलमा महिला र पुरुष मृत फेला- लुम्बिनी - कान्तिपुर समाचार

बुटवलको होटलमा महिला र पुरुष मृत फेला

अमृता अनमोल

बटवल — बुटवलको एक होटलमा महिला र पुरुष मृत फेला परेका छन् । तिनाउ पारी फूलबारी चोकमा रहेको कारिकोट होटलको कोठामा उनीहरु मृत फेला परेका हुन् ।

धादिङ घर भएका अन्दाजी ३५/३६ वर्ष उमेरका सीताराम भुजेल र थर–ठेगाना स्पष्ट नखुलेकी अन्दाजी २५ वर्षीया युवती मृत फेला परेको प्रहरीले जनाएको छ । धादिङको कुमपुर–५ ठेगाना भएका युवक र ती युवती आइतबार राति त्यस होटलमा बस्न आएका थिए ।

इलाका प्रहरी कार्यालय बुटवलका प्रहरी निरीक्षक सन्तोष घिमिरेका अनुसार युवतीको नाम पुष्पा र घर दाङ भनिए पनि थर र घरको पूरा ठेगाना खुल्न सकेको छैन । उनी डेढ महिनादेखि हराएको र पति विदेशतिर रहेको भन्ने खुलेको छ ।

युवती पलङमा उत्तानो परेको अवस्थामा र युवक कोठाको पंखामा झुन्डिएको अवस्थामा मृत फेला परेका थिए । तन्ना र टावेलमा रगत पोतिएकाले युवतीको हत्या गरी आफूले आत्महत्या गरेको हुन सक्ने प्रारम्भिक अनुसन्धानले देखाएको प्रहरी निरीक्षक घिमिरेले बताए । यद्यपि घटनाको थप अनुसन्धान भइरहेको उनले बताए ।

उनीहरुको शव पोष्टमार्टमका लागि लुम्बिनी प्रादेशिक अस्पतालमा पठाइएको छ ।

प्रकाशित : श्रावण ३१, २०७९ १०:१६
प्रतिक्रिया
पठाउनुहोस्

दुर्घटनाग्रस्त मोटरसाइकलसँगै युवक मृत फेला

अमृता अनमोल

बुटवल —  पूर्व-पश्चिम राजमार्गअन्तर्गत बुटवल–१२ नयाँगाउँको सडक छेउमा दुर्घटनाग्रस्त मोटरसाइकलसँगै एक युवा मृत अवस्थामा फेला परेका छन् ।

बुटवल–११ कालिकानगरका २८ वर्षीय सञ्जय खत्री लु ३६ प ४७४२ नम्बरको दुर्घटनाग्रस्त मोटरसाइकलसँगै मृत अवस्थामा भेटिएका हुन् ।

मंगलबार बिहान मृत अवस्थामा भेटिएका खत्रीको शवलाई थप अनुसन्धान तथा पोस्टमार्टमका लागि लुम्बिनी प्रादेशिक अस्पतालमा ल्याइएको लुम्बिनी प्रादेशिक ट्राफिक प्रहरी कार्यालय बुटवलले जनाएको छ ।

प्रकाशित : श्रावण ३१, २०७९ ०९:०३
पूरा पढ्नुहोस्
प्रतिक्रिया
पठाउनुहोस्
x
×