संस्कृत विश्वविद्यालयको ताला खोल्न अदालतको आदेश- लुम्बिनी - कान्तिपुर समाचार

संस्कृत विश्वविद्यालयको ताला खोल्न अदालतको आदेश

दुर्गालाल केसी

दाङ — दाङको बेलझुण्डीस्थित नेपाल संस्कृत विश्वविद्यालयको केन्द्रीय कार्यालयमा तीन महिनादेखि लागेको ताला खोल्न उच्च अदालत तुलसीपुरले अन्तरिम आदेश जारी गरेको छ ।

उच्च अदालतकी मुख्य न्यायाधीश नीता गौतम दिक्षित र न्यायाधीश बबिता उप्रेतीको संयुक्त इजलासले आइतबार ताला खोल्न र विश्वविद्यालयको दैनिक कार्य सञ्चालन र पठनपाठन अवरुद्ध हुने कार्य नगर्न/नगराउन आदेश दिएको हो ।

अधिवक्ता कुलबहादुर डाँगीले तालाबन्दी गर्ने नेपाल विद्यार्थी संघ नेपाल संस्कृत विश्वविद्यालय संघर्ष समितिलाई विपक्षी बनाई दिएको निषेधाज्ञा परमादेशको रिट निवेदनमा सुनुवाइ गर्दै अन्तरिम आदेश दिइएको हो ।

नेपाल विद्यार्थी संघले विभिन्न १४ बुँदे माग राख्दै वैशाख १९ गतेदेखि विश्वविद्यालयको केन्द्रीय कार्यालय र सेवा आयोगको कार्यालयमा तालाबन्दी गरेको थियो । नेविसंघले आंशिक माग पूरा भएको भन्दै साउन १७ गते सेवा आयोगको ताला खोले पनि १८ गते अनेरास्ववियूले तालाबन्दी गरेको थियो ।

तीन महिनाभित्र दिक्षान्त समारोह गर्नुपर्ने, छात्रवृत्ति २ सय प्रतिशत वृद्धि गर्नुपर्ने, आंशिक प्राध्यापकहरूको व्यस्थापन हुनुपर्ने, सेवा आयोगले चैत १६ मा प्रकाशन गरेको विज्ञापन रद्ध गर्नुपर्नेलगायत माग राखी नेविसंघले तालाबन्दी गरेको थियो ।

आयोगले साउन १७ मा उपप्राध्यापकको विज्ञापन प्रक्रिया स्थगित गरेको सूचना प्रकाशन गरेपछि नेविसंघले ताला खोलेको थियो । प्रतिस्पर्धा रोक्न नहुने भन्दै फेरि अनेरास्ववियूले ताला लगाएको थियो । एकपछि अर्को तालाबन्दीले विश्वविद्यालयका आर्थिक र प्रशासनिक कामहरू ठप्प भएको कूलसचिव माधव अधिकारीले बताए । आन्दोलनरत पक्षसँग पटकपटक वार्ता गरे पनि ताला खोल्न सहमत नभएको उनले बताए ।

प्रकाशित : श्रावण २४, २०७९ ०८:५८
प्रतिक्रिया
पठाउनुहोस्

नुन हराएपछि आरोपप्रत्यारोप

कान्तिपुर संवाददाता

मुगु — जिल्लामा सरकारी ढुवानी अनुदानको १ सय ५९ क्विन्टल नुन हराएपछि साल्ट ट्रेडिङ कर्पोरेसनका प्रमुख र ठेकेदारबीच आरोपप्रत्यारोप चलेको छ । गत आर्थिक वर्ष २०७८/७९ मा गमगढी डिपोका लागि रारा छायानाथ एयर कार्गो एन्ड ढुवानी सेवाले २ हजार ७ सय क्विन्टल नुन ढुवानीको जिम्मा लिएको थियो ।

ठेकेदार रामचन्द्र भामले सबै नुन ढुवानी गरिसकेको दाबी गरेका छन् । उनले आफ्नै भे–१ ख ३६९० नम्बरको ट्रकमार्फत नेपालगन्जस्थित साल्ट ट्रेडिङबाट २७ सय क्विन्टल नुन ढुवानी गरी गमगढीस्थित साल्ट ट्रेडिङलाई बुझाएको प्रमाण आफूसँग भएको बताए । ‘चलानी बुझाई अन्य कागजात माग्दा अर्को पटक दिन्छु भनी डिपोले आलटाल गरिरहन्छ,’ उनले भने, ‘अहिले अन्तिममा आएर १ सय ५९ क्विन्टल नुन आएन भनेर मेरो ३ लाख रुपैयाँ धरौटी रकम रोक्न खोजेका छन् ।’ शाखा प्रमुखले आफूलाई दुःख दिन खोजेको भन्दै सबै प्रमाण लिएर अदालत जाने ठेकेदार भामले बताए ।

गत भदौमा कम्पनीले प्रतिकिलो ९ रुपैयाँका दरले सडक मार्गबाट नुन ढुवानी गर्न ट्रेडिङसँग ढुवानी सम्झौता गरेको थियो । जसका लागि ठेकेदारलाई २४ लाख ३० हजार रुपैयाँमा ढुवानीको जिम्मा दिइएको थियो ।

साल्ट ट्रेडिङका प्रमुख खगेन्द्र कार्कीले भने ठेकेदार भामले सम्झौताबमोजिमको पूरै नुन नल्याएको दाबी गरे । ‘उनले बाँकी १ सय ५९ क्विन्टल नुन नै ल्याएनन्,’ उनले भने, ‘एक्लै मैले नुन बुझ्ने होइन, जिल्ला प्रशासन प्रतिनिधिको रोहबरमा नुन बुझ्ने हो, वितरण पनि हामीले त्यसै गरी गर्ने गरेका छौं ।’

घटनाबारे अनुसन्धान भइरहेको साल्ट ट्रेडिङ कर्पोरेसनको क्षेत्रीय कार्यालयका प्रमुख मनोज चौधरीले बताए । ‘ठेकेदारलाई ३ दिनभित्र सम्झौताअनुसारको २७ सय क्विन्टल नुन गमगढी डिपोलाई बुझाएको भरपाइ पेस गर्न भनेका छौं,’ उनले भने, ‘कर्मचारी वा ठेकेदार जसको गल्ती भए पनि कारबाही गरिनेछ ।’

प्रमुख जिल्ला अधिकारी रोमबहादुर महतले ठेकेदारले १ सय ५९ क्विन्टल नुन नल्याएको बताए । ‘नुन कतै हराएको छैन, ठेकेदारले नल्याएका हुन्,’ उनले भने, ‘म आफैं गोदामै पुगेर १/१ गरी नुन गनेको छु ।’ उनले ठेकेदारले चलानी हाकिमलाई बुझाएर भर्पाइ लैजानुपर्नेमा त्यो प्रक्रिया पनि नपुर्‍याएको देखिएको उनको भनाइ छ । उनले ठेकेदारबाट अपुग नुन बराबरको रकम धरौटीबाट असुल गरिने जानकारी दिए ।

प्रकाशित : श्रावण २४, २०७९ ०८:५७
पूरा पढ्नुहोस्
प्रतिक्रिया
पठाउनुहोस्
x
×