पाल्पामा भासियो राजमार्ग- लुम्बिनी - कान्तिपुर समाचार

पाल्पामा भासियो राजमार्ग

सडकको कुनातर्फ डेढ मिटर मात्र बाँकी, हिउँदमा मर्मत हुन्छ : सडक डिभिजन
माधव अर्याल

पाल्पा — सिद्धार्थ राजमार्गअन्तर्गत चौबीसमाइल, झुम्सा र भूतखोलामा अघिल्लो वर्ष भासिएको सडक मर्मत नहुँदै पुनः हिउँदेखोलानजिक यस वर्ष भासिएको छ । केही दिनदेखि तिनाउ गाउँपालिका–५ हिउँदेखोलानजिक ५० मिटर सडक भासिएको हो । भासिएको सडकमा गेग्रानले पुरेर सवारी सञ्चालन गरिएको सडक डिभिजनले जनाएको छ । एक सातायता राजमार्गको तल्लो भागमा सामान्य चर्किएको थियो । निरन्तरको वर्षापछि सडकको अधिकांश भाग नै जोखिममा पर्ने गरी चिरा परेको छ ।

सडकको कुनातर्फ डेढ मिटर मात्र बाँकी रहेर भासिएको सडक डिभिजन कार्यालयका इन्जिनियर महेश्वर लम्सालले जानकारी दिए । उनका अनुसार भासिएको सडकमा गेग्रान माटो भरेर सवारी सञ्चालन गरिएको छ । पानी पर्ने क्रम नरोकिए थप सडक भासिएर आवागमन नै बन्द हुने अवस्था आउन सक्ने उनले बताए । ‘भासिएको केही समय सवारी साधन रोकिए पनि पुनः पुरेर सञ्चालन गरिएको छ,’ उनले भने, ‘अधिक वर्षा भयो भने जोखिम कायमै छ ।’

निरन्तर पानी परेमा पुनः सडक भासिन सक्ने भएकाले राजमार्गमा यात्रा गर्दा सूचना लिएर मात्र यात्रा गर्न सडक डिभिजनले आग्रह गरेको छ । हिउँदेखोलाको माथिल्लो भागमा चुनढुंगा खानी संचालनमा छ । पछिल्लो समयमा अत्यधिक भार बोकेका सवारी साधन संचालन हुने गर्छन् । यस क्षेत्रमा सात वर्षअघि पनि सडक भासिएको थियो । सिद्धार्थ राजमार्गको तानसेन–बुटवल सडकअन्तर्गत विभिन्न स्थानमा भासिने र पहिरो खस्ने समस्याले जोखिमपूर्ण यात्रा गर्नुपर्ने बाध्यता रहेको बस चालक केशव कुँवरले बताए । वर्षायाममा तानसेनदेखि बुटवलसम्मको यात्रा जहिलेसुकै जोखिमपूर्ण हुने उनको अनुभव छ । यसका लागि सडक डिभिजनले भने सडक सुरक्षामा ध्यान नदिएको चालक कुँवरको गुनासो छ । सडक डिभिजनले भने यस विषयलाई गम्भीरतापूर्वक लिएर काम अघि बढाउने जनाएको छ । ‘हामीले भासिएका स्थानका लागि स्टिमेट गर्ने र हिउँद लागेपछि मात्र मर्मतको काम गर्नेछौं,’ सडक डिभिजनका सूचना अधिकारी लम्सालले भने, ‘यसका लागि विभागमा कुरा भइसकेको छ ।’

राजमार्गको पाल्पा खण्डअन्तर्गत गौडेपुलदेखि चिडियाखोलासम्मका विभिन्न स्थानमा तल्लो भागबाट राजमार्ग भासिन सुरु भएको पाँच वर्ष बढी भइसकेको गुल्मीका जीप चालक कृष्णप्रसाद कँडेलले बताए । ‘राजमार्ग भन्नु मात्र हो जतासुकै जोखिम छ,’ उनले भने, ‘यसका लागि सडक डिभिजनको ध्यान पुग्नुपर्छ ।’ पहाडी हुँदै हिमाली जिल्ला जोड्न सिद्धार्थ राजमार्ग छोटो दूरी पर्छ । सुनौलीबाट पाल्पा, पोखरा हुँदै मुस्ताङसम्मका सवारी साधन यही राजमार्ग भएर गुड्ने गर्छन् । राजमार्गको पाल्पा खण्डको पीपलडाँडा, सिद्धबाबा क्षेत्रको हेडबक्स, पैठेडाँडा, झुम्सा क्षेत्रका भूतखोला, लामेदमार, पानीमिल, सिसुवा, हिउँदेखोला, गिट्टीखानी, २४ माइल, कालीमाटी, गौडेपुललगायत क्षेत्रमा यसअघि नै सडक भासिएको छ । यहाँ २० किलोमिटर क्षेत्र बढी जोखिम छ ।

अघिल्लो वर्षदेखि झुम्सा र पानीमिलको बीच भागमा भासिन सुरु गरेको थियो । अघिल्लो हिउँदमा पहिरोसमेत पन्छाइएन । भासिएका सडककै कारण दैनिकजसो सवारी साधन जाम हुन्छ । कतिपय स्थानमा सडक एकतर्फी छ । मोटरसाइकल चालक केशव जीसीका अनुसार रोकथाम र डाइभर्सनसमेत नबनाएर समस्या थपिएको छ ।

प्रकाशित : श्रावण २४, २०७९ ०८:५१
प्रतिक्रिया
पठाउनुहोस्

दार्चुलामा कोरोना संक्रमित बढ्दै

मनोज बडू

दार्चुला — भारतसितको सीमावर्ती दार्चुलामा कोरोना संक्रमण बढ्न थालेको छ । एक साताको अवधिमा जिल्लामा ९ जना कोरोनाका संक्रमित फेला परेको स्वास्थ्य कार्यालयले जनाएको छ ।

स्वास्थ्य कार्यालय दार्चुलाका अनुसार जिल्ला अस्पतालमा ५ जना, मालिकार्जुनको भगवती स्वास्थ्य चौकीमा २ र गोकुलेश्वरमा २ जना कोरोना संक्रमित फेला परेका छन् । स्वास्थ्य कार्यालयका सूचना अधिकारी खगेन्द्र कार्कीका अनुसार ९ संक्रमितमध्ये एक जना ४६ वर्षीय महिला जिल्ला अस्पतालको आइसोलेसनमा उपचाररत छन् । उनले कोरोनाको लक्षण देखिएका सबैलाई स्वास्थ्य संस्थाहरूमा परीक्षण भइरहेको बताए । यही साताबाट जिल्लाको भारतसित सीमा जोडिएको सदरमुकामस्थित पुलघाट नाकामा जिल्ला भित्रिने मानिसहरूको नियमित स्वास्थ्य चेकजाँच भइरहेको छ ।

जिल्लाका महाकाली नगरपालिका, शैल्यशिखर नगरपालिका र मालिकार्जुन गाउँपालिकामा कोरोनाका सक्रिय संक्रमित छन् । साउन १५ र १६ गते जिल्ला अस्पतालमा गरिएको परीक्षणमा महाकाली नगरपालिकामा एक महिलासहित ५ जनामा कोरोना देखिएको स्वास्थ्य कार्यालयका सूचना अधिकारी कार्कीले जानकारी दिए । भारतबाट सोझै जिल्ला भित्रिने हुनाले जिल्लाको कोरोना संक्रमणको जोखिम धेरै रहेको स्वास्थ्यकर्मीहरूले बताएका छन् ।

जिल्ला अस्पताल र गोकुलेश्वर अस्पतालमा कोरोना परीक्षण गरिएको छ । स्वास्थ्य संस्थामा आउने कोरोनाका लक्षण देखिएका बिरामीलाई परीक्षण गर्न सबै स्वास्थ्य संस्थाहरूमा किट उपलब्ध रहेको स्वास्थ्य कार्यालयले जनाएको छ । जुनसुकै व्यक्तिलाई कोरोनाको लक्षण देखिएको स्वयम् आफैं आएर स्वास्थ्य संस्थामा परीक्षण गर्न स्वास्थ्यकर्मीहरूले अनुरोध गरेका छन् । भारतमा कोरोना संक्रमण बढ्दो क्रममा रहेको हुनाले गाउँ फर्कने सबैले कोरोना परीक्षण गरेर मात्र गाउँ पस्ने स्वास्थ्य चौकी दत्तुका स्वास्थ्यकर्मी मोहनसिंह महराले बताए । भारतको कोरोना उच्च संक्रमण भएको ठाउँबाट आउने मानिसहरू सिधै गाउँ पस्न थालेका हुनाले सीमामा निगरानी बढाउनुपर्ने उनको भनाई छ ।

स्वास्थ्यका मापदण्ड अपनाउन प्रशासनको आग्रह

कोरोनाको संक्रमण बढ्न सुरु भएपछि जिल्ला प्रशासन कार्यालयले स्वास्थ्यका मापदण्ड अनिवार्य रूपमा अपनाउन आग्रह गरेको छ । बिहीबार सूचना जारी गर्दै सहायक प्रमुख जिल्ला अधिकारी हेमन्ती साउदले सीमा क्षेत्र, बढी जमघट हुने क्षेत्रमा सतर्कता अपनाउन नागरिकलाइ अनुरोध गरेकी हुन् । प्रशासनले जारी गरेको सूचनामा अनिवार्य रूपमा मास्कको प्रयोग गर्न र सरोकारवाला निकायलाई स्वास्थ्यका मापदण्ड अपनाउन भनिएको छ । भीडभाडमा नजान, घर बाहिर निस्कँदा अनिवार्य मास्कको प्रयोग गर्न, कोरोनासँग मिल्दोजुल्दो लक्षण देखिएमा परीक्षण गर्न आग्रह गरिएको छ । कोरोनाविरुद्धको खोप लगाउन बाँकी रहेको भएमा नजिकको स्वास्थ्य संस्थामा गएर खोप लगाउनसमेत प्रशासनले आग्रह गरेको सूचनामा उल्लेख छ ।

सूचनामा सेवाग्राहीहरूको भीडभाड हुने सरकारी कार्यालय, बैंक तथा वित्तीय संस्था र अन्य निकायहरू सेवा प्रदायक तथा सेवाग्राहीहरूले मास्कको प्रयोगलाई अनिवार्य गर्न भनिएको छ । सेवा प्रदायक कार्यालयहरूले सेवा प्रवेशद्वारमा सेनिटाइजरको व्यवस्था मिलाउन पनि आग्रह गरिएको छ ।

यस्तै, जिल्लाभित्र सञ्चालन गरिने गोष्ठी, सेमिनार, बैठकजस्ता भीडभाड हुने कार्यक्रमहरूमा मास्कको प्रयोगलाई अनिवार्य र सेनिटाइजरको व्यवस्था मिलाउन प्रशासनद्वारा जारी गरिएको सूचनामा भनिएको छ । विद्यालय, क्याम्पस, धार्मिक स्थल, भीडभाड हुने व्यावसायिक तथा मनोरन्जन स्थलहरूमा पनि मास्कको प्रयोग गर्न भनिएको छ ।

प्रकाशित : श्रावण २४, २०७९ ०८:५०
पूरा पढ्नुहोस्
प्रतिक्रिया
पठाउनुहोस्
×