वैकल्पिक सडक निर्माणमा बेवास्ता- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

वैकल्पिक सडक निर्माणमा बेवास्ता

कान्तिपुर संवाददाता

बुटवल — लुम्बिनी प्रदेश सरकारले ५ वर्षअघि सिद्धबाबाको साटो वैकल्पिक सडक सुरु गरे पनि निर्माणलाई तीव्रता दिन सकेको छैन । बुटवलको धागो कारखाना, चरंगे र पाल्पाको चौकीभन्ज्याङ हुँदै झुम्सा जोड्ने मार्ग निर्माणमा अहिलेसम्म करिब ३८ करोड रुपैयाँ खर्च भइसकेको छ । तर, निर्माण अझै सकिएको छैन ।

प्रदेश सरकारले सिद्धबाबा सडक खण्डको वैकल्पिक मार्ग निर्माण थालेको हो । ७ किलोमिटर सडकको पहिरो छल्न विकल्पमा बनाइएको सडकको पहिलो वर्षमै ट्र्याक खोल्ने र दोस्रो वर्षदेखि ग्राभेल गरेर गाडी गुडाउने योजना थियो । तर, रूपन्देही क्षेत्रमा १३ र पाल्पामा साढे ८ गरी साढे २१ किलोमिटर लम्बाइको सडकको अहिलेसम्म प्रारम्भिक चरणको कामसमेत पूरा हुन सकेको छैन । प्रारम्भिक चरणको काममा ७० प्रतिशत भौतिक प्रगति भएको भौतिक पूर्वाधार विकास मन्त्रालयका प्रवक्ता भीमार्जुन पाण्डेले बताए ।

वैकल्पिक मार्गका लागि प्रदेश सरकारले सुरुको वर्ष अर्थात् आर्थिक वर्ष ०७४/०७५ मा १० करोड बजेट विनियोजन गरेको थियो । यसपछिका हरेक वर्ष बजेट विनियोजन भएको छ । साढे २१ किलोमिटर लम्बाइ र ७ मिटर चौडाइको २ लेनको वैकल्पिक मार्गमा अहिलेसम्म ३८ करोड ७१ लाख रुपैयाँ खर्च भइसकेको छ । रूपन्देही खण्डमा २७ करोड ५२ लाख रुपैयाँ खर्च भएको छ । त्यसमध्ये ५ वटा पुल र कल्भर्ट निर्माणको खर्च १२ करोड ५ लाख रुपैयाँ छ । पाल्पा खण्डमा ११ करोड २९ लाख रुपैयाँ खर्चेको छ । यस खण्डको २ करोड ९७ लाख रुपैयाँ पुल निर्माणको हो । यसबाट साढे ३ किलोमिटर पक्की गर्ने, साढे १० किलोमिटर ग्राभेल गर्ने काम भएको छ । वैकल्पिक मार्गमा साढे ४ किलोमिटर क्षेत्र अझै कच्ची छ ।

उक्त कच्ची सडक सबैभन्दा अप्ठ्यारो र जोखिमपूर्ण भएको रूपन्देही खण्ड हेरिरहेका भौतिक पूर्वाधार विकास कार्यालय रूपन्देहीका प्रमुख इन्जिनियर ललित न्यौपानेले बताए । ‘ठूलो चुरे क्षेत्रको पहाड छिचोल्नु पर्नेछ,’ उनले भने, ‘त्यो पहाड छेड्दा तल बनाएकै सडक पनि खस्ने हो कि भन्ने समस्या छ ।’

प्रकाशित : श्रावण २४, २०७९ ०७:३८
प्रतिक्रिया
पठाउनुहोस्

पारिका विद्यार्थी वारि

कान्तिपुर संवाददाता

बर्दिया — सीमावर्ती भारतको बहराइचस्थित बलैगाउँका अभिषेक कुसवा यहाँको बढैयाताल गाउँपालिकामा रहेको विद्यालयमा पढ्न आउँछन् । उनी स्थानीय बर्दिया एकेडेमी एण्ड पोलिटेक्निक रिसर्च सेन्टरमा कक्षा १० मा अध्ययन गरिरहेका छन् । यहाँका शिक्षक अनुभवी भएकाले पढ्न आएको उनले बताए । बलैगाउँकै उमर खान पढाइ स्तरीय भएकाले एक वर्षदेखि यहीं अध्ययन गरिरहेको बताउँछन् । कुसवा घरबाटै खाना बोकेर विद्यालय आउने गरेका छन् ।

अहिले सीमापारिबाट एक दर्जनभन्दा बढी विद्यार्थी यहाँ आइरहेका छन् । सीमाबाट गाडीको आउजाउमा एसएसबीद्वारा रोक लगाइएको छ । रिसर्च सेन्टरका प्रबन्धक निर्देशक बुद्ध गिरीले एसएसबीले विद्यालयको सवारी साधनबाट विद्यार्थी बोक्न दिने भनेपछि अब केही दिनमा सञ्चालन गर्ने बताए । यहाँ आएर अध्ययन गर्न चाहने धेरै भए पनि सवारी साधन नचल्दा आउजाउ गर्न समस्या भएको उनले सुनाए । अब सीमापारिसम्मै बस आवतजावत गराउने लक्ष्य लिएको उनले बताए । भारतीय सीमा बलैगाउँसम्म स्कुल बस सञ्चालन गरे धेरै विद्यार्थी यहाँका विद्यालयमा अध्ययनका लागि आउने सञ्चालक गिरीले बताए ।

झन्डै ७ बिघा क्षेत्रफलमा रहेको यस रिसर्च सेन्टरमा १ हजार १ सयभन्दा बढी विद्यार्थी अध्ययन गर्छन् । यस वर्ष एसईई परीक्षामा सर्वोत्कृष्ट नतिजा ल्याएर जिल्ला प्रथम भएको विद्यालयका प्रधानाध्यापक भोजराज बरालले बताए । कक्षा ७ मा अध्ययन गर्दै आएका भारतीय विद्यार्थी आयुष कुसवाले नेपालमा राम्रो पढाइ हुने गरेको बताए । ‘उच्च शिक्षाका लागि नेपाली सीमामा विद्यालय भएको भए हामी यहीं पढ्ने थियौं,’ हिन्दीभन्दा अंग्रेजीमा राम्रो दख्खल भएका उनले भने ।

बर्दियाका सरकारी विद्यालयमा यहाँ मजदुरी गर्ने भारतीयका छोराछोरीले समेत अध्ययन गरिरहेको अमरज्योति माध्यमिक विद्यालयका प्रधानाध्यापक कृष्णराज शर्माले बताए । सीमावर्ती क्षेत्र बलैगाउँमा सरकारी र निजी विद्यालय भए पनि उनीहरूको रोजाइ यहाँका सरकारी र निजी विद्यालय भएको उनले जनाए ।

प्रकाशित : श्रावण २४, २०७९ ०७:३७
पूरा पढ्नुहोस्
प्रतिक्रिया
पठाउनुहोस्
x
×