पारिका विद्यार्थी वारि- लुम्बिनी - कान्तिपुर समाचार

पारिका विद्यार्थी वारि

कान्तिपुर संवाददाता

बर्दिया — सीमावर्ती भारतको बहराइचस्थित बलैगाउँका अभिषेक कुसवा यहाँको बढैयाताल गाउँपालिकामा रहेको विद्यालयमा पढ्न आउँछन् । उनी स्थानीय बर्दिया एकेडेमी एण्ड पोलिटेक्निक रिसर्च सेन्टरमा कक्षा १० मा अध्ययन गरिरहेका छन् । यहाँका शिक्षक अनुभवी भएकाले पढ्न आएको उनले बताए । बलैगाउँकै उमर खान पढाइ स्तरीय भएकाले एक वर्षदेखि यहीं अध्ययन गरिरहेको बताउँछन् । कुसवा घरबाटै खाना बोकेर विद्यालय आउने गरेका छन् ।

अहिले सीमापारिबाट एक दर्जनभन्दा बढी विद्यार्थी यहाँ आइरहेका छन् । सीमाबाट गाडीको आउजाउमा एसएसबीद्वारा रोक लगाइएको छ । रिसर्च सेन्टरका प्रबन्धक निर्देशक बुद्ध गिरीले एसएसबीले विद्यालयको सवारी साधनबाट विद्यार्थी बोक्न दिने भनेपछि अब केही दिनमा सञ्चालन गर्ने बताए । यहाँ आएर अध्ययन गर्न चाहने धेरै भए पनि सवारी साधन नचल्दा आउजाउ गर्न समस्या भएको उनले सुनाए । अब सीमापारिसम्मै बस आवतजावत गराउने लक्ष्य लिएको उनले बताए । भारतीय सीमा बलैगाउँसम्म स्कुल बस सञ्चालन गरे धेरै विद्यार्थी यहाँका विद्यालयमा अध्ययनका लागि आउने सञ्चालक गिरीले बताए ।

झन्डै ७ बिघा क्षेत्रफलमा रहेको यस रिसर्च सेन्टरमा १ हजार १ सयभन्दा बढी विद्यार्थी अध्ययन गर्छन् । यस वर्ष एसईई परीक्षामा सर्वोत्कृष्ट नतिजा ल्याएर जिल्ला प्रथम भएको विद्यालयका प्रधानाध्यापक भोजराज बरालले बताए । कक्षा ७ मा अध्ययन गर्दै आएका भारतीय विद्यार्थी आयुष कुसवाले नेपालमा राम्रो पढाइ हुने गरेको बताए । ‘उच्च शिक्षाका लागि नेपाली सीमामा विद्यालय भएको भए हामी यहीं पढ्ने थियौं,’ हिन्दीभन्दा अंग्रेजीमा राम्रो दख्खल भएका उनले भने ।

बर्दियाका सरकारी विद्यालयमा यहाँ मजदुरी गर्ने भारतीयका छोराछोरीले समेत अध्ययन गरिरहेको अमरज्योति माध्यमिक विद्यालयका प्रधानाध्यापक कृष्णराज शर्माले बताए । सीमावर्ती क्षेत्र बलैगाउँमा सरकारी र निजी विद्यालय भए पनि उनीहरूको रोजाइ यहाँका सरकारी र निजी विद्यालय भएको उनले जनाए ।

प्रकाशित : श्रावण २४, २०७९ ०७:३७
प्रतिक्रिया
पठाउनुहोस्

रेसुंगाले छात्रवृत्तिस्वरूप ४ हजार दिने

कान्तिपुर संवाददाता

गुल्मी — गरिब तथा जेहेन्दार विद्यार्थीलाई प्रोत्साहन गर्न रेसुंगा नगरपालिकाले ‘अध्ययन प्रोत्साहन छात्रवृत्ति’ कार्यक्रम सुरु गरेको छ । कार्यक्रमअन्तर्गत पालिकाले एसईईमा ३.२० वा त्यसभन्दा धेरै जीपीए ल्याएर उत्तीर्ण हुने विद्यार्थीलाई छात्रवृत्ति उपलब्ध गराउने भएको हो ।

पालिकाभित्रका विद्यालयमा कक्षा ११ र १२ अध्ययन गर्नेलाई मासिक ४ हजार रुपैयाँ उपलब्ध गराउने निर्णय गरेको हो । ‘शैक्षिक पलायन, बसाइँसराइजस्ता प्रमुख समस्या रोक्न र नगरभित्रको शैक्षिक गुणस्तरलाई सुधार्ने उद्देश्यले नगरभित्रका शैक्षिक संस्थाहरूलाई शैक्षिक रूपमा चलायमान बनाउनका निम्ति विशेष शैक्षिक अभियान सुरु गरेका छौं,’ नगरप्रमुख खिलध्वज पन्थीले भने, ‘कार्यक्रमले नगरको शैक्षिक क्षेत्रमा सकारात्मक प्रभाव पार्नुका साथै समग्र गुल्मीको शैक्षिक क्षेत्रलाई उच्च स्थानमा पुर्‍याउन मद्दत गर्नेमा आशावादी छौं ।’

पालिकाका शिक्षा शाखा प्रमुख विष्णुप्रसाद ज्ञवालीका अनुसार एसईईमा ३.२० जीपीए ल्याएका विद्यार्थीलाई उपलब्ध गराइने छात्रवृत्तिमा दुईथरी विद्यार्थी सहभागी हुने छन् । पहिलो, जुनसुकै जिल्लाको बासिन्दा भए पनि रेसुंगाभित्रका शैक्षिक संस्थामा पढेर एसईई दिई अब उच्च मावि पनिपालिकाभित्रकै शैक्षिक संस्थामा पढ्नुपर्ने छ । दोस्रो, रेसुंगा नगरपालिका स्थायी ठेगाना भई देशका जुनसुकै विद्यालयबाट एसईई दिए पनि अब रेसुंगाभित्रकै शैक्षिक संस्थामा पढ्नु पर्ने छ । रेसुंगाभित्रकै शैक्षिक संस्थामा अध्ययन गरी गत एसईई परीक्षामा ३.२० जीपीए ल्याउने विद्यार्थी १ सय ४६ जना छन् ।

प्रकाशित : श्रावण २४, २०७९ ०७:३७
पूरा पढ्नुहोस्
प्रतिक्रिया
पठाउनुहोस्
x
×