रोल्पामा जिप दुर्घटना, ६ यात्रु घाइते- लुम्बिनी - कान्तिपुर समाचार

रोल्पामा जिप दुर्घटना, ६ यात्रु घाइते

काशीराम डाँगी

रोल्पा — रोल्पाको भदौरे मन्दिर नजिकै सोमबार बिहान जिप दुर्घटना हुँदा ६ जना यात्रु घाइते भएका छन् । बुटवलबाट रोल्पा सदरमुकाम लिबाङ आउँदै गरेको टाटा सुमो दुर्घटनामा परेको प्रहरीले जनाएको छ । 


बुटवलबाट लिबाङ आइरहेको भे १ ज १७७१ नम्बरको जिप बिहान ४ बजेतिर दुर्घटनामा परेको थियो । रोल्पा नगरपालिका–१ मा पर्ने दुर्घटनास्थल भदौरे मन्दिरमुनिको ओरालो बाटोमा पर्छ ।

गुडिरहेको जिप एक्कासी नियन्त्रणबाहिर जान पुगेकाले पल्टिएको जिल्ला प्रहरी कार्यालयले जनाएको छ । जिपमा सवार ६ जना घाइते भएको र सबैलाई उपचारका लागि अस्पताल पठाइएको प्रहरीले जनाएको छ ।

दुर्घटनापछि जलजला हिमाल यातायात प्रालिको उक्त जिपका चालकलाई प्रहरीले अनुसन्धानका लागि नियन्त्रणमा लिएको छ । रातभर गाडी चलाएका चालक घुम्ती बाटोमा निदाएका कारण जिप दुर्घटना भएको हुन सक्ने प्रहरीको अनुमान छ ।

जिप दुर्घटनामा घाइते भएकामा रोल्पा नगरपालिका–९ होमाकी २६ वर्षीया दीविसा बुढा, त्यसै गाउँका ३१ वर्षीय कमलप्रसाद बुढामगर, रोल्पा नगरपालिका–७ माडीचौरकी २८ वर्षीया भीमली घर्तीमगर तथा पश्चिमी रोल्पाको गंगादेव गाउँपालिका–७ बडाचौरका २४ वर्षीय नरेन पुन छन् । उनीहरूलाई रेउघास्थित रोल्पा अस्पतालमा पुर्‍याएर सामान्य उपचारपछि घर फिर्ता पठाइएको छ ।

यस्तै दुर्घटनामा सख्त घाइते भएका रोल्पा नगरपालिका–३ खुमेलकी ३३ वर्षीया संगीता परियार र ३४ वर्षीय पर्शुराम परियारलाई थप उपचारका लागि बुटवलस्थित लुम्बिनी प्रादेशिक अस्पतालमा पठाइएको छ । घटनाबारे अनुसन्धान गरिरहेको रोल्पाका प्रहरी निरीक्षक प्रकाश भुसालले बताए ।

प्रकाशित : श्रावण २३, २०७९ १६:५४
प्रतिक्रिया
पठाउनुहोस्

कर्णालीको पर्यटनमन्त्री सिफारिस गर्ने जिम्मा माओवादी नेता शाहीलाई

कान्तिपुर संवाददाता

वीरेन्द्रनगर — कर्णाली प्रदेश सरकारको उद्योग, पर्यटन, वन तथा वातावरण मन्त्री चयन गर्नका लागि बसेको नेकपा माओवादी केन्द्र संसदीय दलको बैठक निष्कर्षविहीन भएको छ । माघ २३ गते गैरसांसद समेत ६ महिनासम्म मन्त्री हुन पाउने संवैधानिक व्यवस्थाबमोजिम मन्त्रीमा नियुक्त भएका हुम्लाका छिरिङ डम्डोल (कार्चेन) लामाको कार्यकाल सोमबार सकिएपछि मन्त्रीको टुंगो लगाउन दलको बैठक बसेको थियो । 

उनको कार्यकाल सकिएसँगै अब पर्यटनमन्त्री कसलाई बनाउने भन्नेबारे टुंगो लगाउन बसेको माओवादी केन्द्रको बैठकबिना निष्कर्ष टुंगिएको दलका प्रमुख सचेतक कृष्णा शाहले बताइन् । उनका अनुसार बैठकमा उठेका विवादलाई टुंग्याई मन्त्री छान्ने जिम्मा पूर्वमुख्यमन्त्री एवं माओवादी केन्द्र कर्णाली संसदीय दलका नेता महेन्द्रबहादुर शाहीलाई दिइएको छ ।

‘बैठकमा समानुपातिक सांसदलाई मन्त्री बनाउनुपर्छ भन्ने पनि कुरा उठेको छ,’ उनले भनिन्, ‘पुराना मन्त्रीलाई हेरफेर गरेर नयाँलाई अवसर दिने भन्ने पनि विषय उठेको छ, अब विवाद टुंग्याउने जिम्मा संसदीय दलका नेतालाई दिएका छौँ, चाँडै नै निष्कर्ष निस्कन्छ ।’

मुख्यमन्त्री जीवनबहादुर शाहीले नेपाल कम्युनिस्ट पार्टी (माओवादी केन्द्र)को सिफारिसमा लामालाई २०७८ मन्त्रीमा नियुक्त गरेका थिए । सांसद नरहेको व्यक्ति ६ महिनाका लागि मन्त्री बन्न सक्ने व्यवस्था छ । लामाको कार्यकाल आज (सोमबार) सकिएपछि माओवादी संसदीय दलको बैठकले उनको ठाउँमा अर्का सांसदलाई सिफारिस गर्ने तयारी गरेको दलका सचेतक कृष्णा शाहले बताइन् ।

कर्णाली सरकारको उद्योग, पर्यटन वन तथा वातावरण मन्त्रीमा डोल्पाबाट निर्वाचित नेकपा माओवादी केन्द्रका सांसद वीरबहादुर शाहीको नाम चर्चामा छ । गैर–सांसद पनि ६ महिना मन्त्री बन्न पाउने संवैधानिक व्यवस्थाबमोजिम लामालाई मुख्यमन्त्री जीवनबहादुर शाहीले गत माघ २३ गते पर्यटनमन्त्रीमा नियुक्त गरेका थिए ।

डोल्पाको निर्वाचन क्षेत्र नम्बर २ (ख) बाट निर्वाचित कर्णाली सांसद शाहीले आफ्नो नाम अगाडि आए पनि दलले निर्णय नगरुन्जेल केही भन्न नसकिने बताए । ‘नाम त मेरो अगाडि छ र इच्छुक पनि छु,’ उनले भने, ‘तर पार्टीले के निर्णय गर्छ त्यही हुने हो, अहिले नै मन्त्री हुन्छु भनेर ठोकुवा गर्न सक्दैन ।’

कर्णालीमा कांग्रेस, माओवादी केन्द्र र नेकपा समाजवादीको गठबन्धनको सरकार छ । आठ सदस्यीय मन्त्रिमण्डल रहेको कर्णालीमा महिला र दलितको सहभागिता भने शून्य छ ।

प्रकाशित : श्रावण २३, २०७९ १६:५३
पूरा पढ्नुहोस्
प्रतिक्रिया
पठाउनुहोस्
×