लुम्बिनीमा सामाजिक सूचना व्यवस्थापन प्रणाली- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

लुम्बिनीमा सामाजिक सूचना व्यवस्थापन प्रणाली

अमृता अनमोल

बुटवल — सामाजिक अवस्था र लैंगिक हिंसाबारे एकीन जानकारी दिन भन्दै लुम्बिनी प्रदेशमा सामाजिक सूचना व्यवस्थापन प्रणाली सुरुवात गरिएको छ । छरिएर रहेका लैंगिक तथ्यांकलाई एकीकृत गरी संघ, प्रदेश र स्थानीय तहका सूचना एकै ठाउँमा संकलन गर्न प्रणालीको सुरुवात गरिएको हो ।

संघीय सरकारको महिला बालबालिका तथा ज्येष्ठ नागरिक मन्त्रालयले बनाएको प्रणालीको बिहीबार लुम्बिनी प्रदेशको महिला बालबालिका तथा ज्येष्ठ नागरिकमन्त्री रमा घर्तीले उद्घाटन गरिन् । उनले सूचना प्रणालीमा लैंगिकता, महिला र सामाजिक विषयका सबै कागजातलाई एकीकृत गरी लैंगिक तथ्यांक पूर्ति गर्ने लक्ष्य लिइएको बताइन् ।

एकीकृत सूचना नहुँदा लैंगिक समानता र हिंसाविरुद्ध काम गर्न समस्या भएको भन्दै उनले अब सरकारी कामकाजका लागि समेत सहज हुने विश्वास व्यक्त गरिन् । ‘सरकारी नीति तथा योजना बनाउन, कार्यक्रम ल्याउन र आवश्यकता परेको समूहमा पुग्न एकीकृत तथ्यांक सहयोगी बन्ने छन्,’ उनले भनिन् ।

लैंगिक हिंसा र घरेलु हिंसाका तथ्यांक सहजै उपलब्ध नहुने र दोहोरिने समस्या धेरै छ । जसमा महिला, बालबालिका, किशोरी, यौनिक तथा लैंगिक अल्पसंख्यक, ज्येष्ठ नागरिकका छुट्टाछुट्टै सूचना र तथ्यांक राखिएको छ । बालगृह, बाल सुधारगृह वृद्धाश्रम, मानव बेचेबिखन तथा ओसारपसार, लैंगिक परिचयपत्र, प्रतिवेदनहरुको विवरण छुट्टाछुट्टै रुपमा पाइने बताइएको छ ।

संघीय सरकारको महिला बालबालिका तथा ज्येष्ठ नागरिक मन्त्रालयका महिला सशक्तीकरण महाशाखा निर्देशक भरतराज शर्माले मन्त्रालयले तथ्यांक संकलन गर्न संघ, प्रदेश र स्थानीय तहका कर्मचारी तथा माइती नेपाल सहितको सहजीकरण समिति बनाएर काम गरेको थियो । हाल लुम्बिनी प्रदेशका रुपन्देही, कपिलवस्तु, बाँके र बर्दियाका १३ स्थानीय तहका सूचना राखेर प्रणाली सुरु गरिएको हो । विस्तारै १ सय ९ वटै स्थानीय तहमा पुर्‍याउने योजना रहेको उनले बताए ।

नेपालमा सन् १९७० मा विकासमा महिला भन्ने अवधारणा आएपछि मात्रै लैंगिकसम्बन्धी तथयांक राख्न थालिएको हो । माइती नेपालका कार्यकारी निर्देशक विश्वराम खड्काले त्यसयताका तथ्यांक विकासक्रमलाई मध्यनजर राखेर सूचना प्रणाली व्यवस्थापन गरेको बताए ।

प्रकाशित : श्रावण १९, २०७९ २०:४४
प्रतिक्रिया
पठाउनुहोस्

क्विन्सल्यान्डमा तीन जनाको गोली हानी हत्या

कान्तिपुर संवाददाता

सिड्नी — अस्ट्रेलियाको क्विन्सल्यान्ड राज्यको एक ग्रामीण इलाकामा गोली हानी तीन जनाको हत्या गरिएको छ । स्थानीय समयअनुसार बिहीबार बिहान ९:०० बजे राज्यको उत्तरपूर्वमा रहेको सानो सहर बोगीमा धेरै जनालाई गोली हानी हत्या गरिएको सूचनापछि प्रहरीलाई घटनास्थलमा बोलाइएको थियो ।

क्विन्सल्यान्ड प्रहरी टम आर्मिटका कार्यकारी सुपरिटेन्डेन्टले स्थानीय सञ्चामाध्यमलाई भने, 'हामी सक्रियतापूर्वक त्यस क्षेत्रमा भएका भनिएका हत्याबारे खोजी तथा अनुसन्धान गरिरहेका छौं । परिस्थिति के थियो र कसरी यी मानिसहरूलाई गोली हानिएको थियो भन्ने विषयमा हाम्रो प्रारम्भिक अनुसन्धान शुरु भएको छ ।'

उनले भने, 'यस अवस्थामा घटनाका लागि को जिम्मेवार छ, हामीलाई थाह छैन हामी किनकि यस अनुसन्धानको प्रारम्भिक चरणमा छौं ।'

घटनामा तीन जनाको मृत्यु भएको पुष्टि गरिएको छ र चौथो व्यक्तिलाई गम्भीर अवस्थामा उपचारका लागि अस्पताल पठाइएको छ । वरपरका इलाकाको सर्वेक्षण गर्दा प्रहरीले त्यस इलाका अहिले सुरक्षित रहेको र घटनाबारे अनुसन्धान चलिरहेको जनाएको छ ।

प्रकाशित : श्रावण १९, २०७९ २०:२३
पूरा पढ्नुहोस्
प्रतिक्रिया
पठाउनुहोस्
×