रोल्पामा प्रहरी हवल्दार कुटिए- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

रोल्पामा प्रहरी हवल्दार कुटिए

काशीराम डाँगी

रोल्पा — बिदामा घर आउँदै गरेका प्रहरी हवल्दार रोल्पामा कुटिएका छन् । रोल्पा नगरपालिका-६ नन्दीखोला घर भएका प्रहरी हवल्दार रामकुमार बाँठामगरमाथि मंगलबार बेलुका ८/९ जनाको समूहले कुटपिट गरेको प्रहरीले जनाएको छ ।

प्युठानमा कार्यरत प्रहरी हवल्दार बाँठा घर बिदामा जाँदै थिए । उनलाई स्थानीय नेता खिमबिक्रम डाँगीलगायतको समूहले आक्रमण गरेको उनका भिनाजु इन्जिनियर सुरेश घर्तीमगरले बताए । 'घर पुग्नुअघि उनीमाथि अचानक आक्रमण भएको हो । घाइते उनलाई रोल्पा अस्पतालमा पुर्‍याएर उपचार गरिएको छ । प्रहरीले उजुरी दर्ता गर्न आनाकानी गरेको छ,' सुरेशले भने।

आक्रमण के कारणले भएको हो भन्ने बारेमा अनुसन्धान भइरहेको प्रहरीले जनाएको छ । आक्रमण पछि प्रहरीले नै घाइतेको उद्धार गरेर अस्पताल पुर्‍याएको थियो । प्रहरीले आक्रमणमा संलग्न सबैको पहिचान खुलेको जनाएको छ । घटनाबारे दारबोटस्थित प्रहरी चौकीका सुरक्षाकर्मी बेखबर हुनु राम्रो नभएको निष्कर्षमा जिल्ला प्रहरी कार्यालयले अनुसन्धान बढाएको छ।

तर पीडितले राजनीतिक दबाबकै कारण प्रहरी पक्षले सुनुवाइ नगरेको दाबी गरेको छ। पीडित प्रहरी हवल्दार बाँठाले आफूमाथि बाटोमा कुरेर आक्रमण भएको बताए । 'मेरो कसैसँग दुश्मनी छैन, तर मोटरसाइकलमा आएकाबाट आक्रमण भयो,' उनले भने । आक्रमण गर्ने सबैलाई आफूले चिन्ने र गाउँकै भएको उनले बताए ।

रोल्पा प्रहरी प्रमुख प्रहरी नायब उपरीक्षक विनोद घिमिरेले दुबै पक्षको सम्पर्कमा रहेको बताए ।

प्रकाशित : श्रावण ४, २०७९ २२:५०
प्रतिक्रिया
पठाउनुहोस्

उमेशले जिते रजत पदक

कान्तिपुर संवाददाता

काठमाडौँ — नेपाली शारीरिक सुगठन खेलाडी उमेश राईले बुधबार रजत पदक जितेका छन् । उनले माल्दिभ्समा भएको ५४ औं एसियाली शरीरिक सुगठन तथा फिजिक स्पोर्टस च्याम्पियनसिपअन्तर्गत ८० केजी तौलमा रजत जितेका हुन् ।

आठ खेलाडी प्रतिस्पर्धी उक्त तौलमा भारतका आश्विन सेठ्ठीले स्वर्ण र थाइल्यान्डका पतैवात अलकावातले कांस्य पदक जितेका थिए ।

यसअघि फिटनेस फिजिकतर्फ १७० सेन्टिमिटरसम्म नेपालका राजु राईले कांस्य पदक जितेका थिए । नेपालका तीन खेलाडीले भाग लिएको च्याम्पियनसिपमा महिलातर्फ एथलेटिक फिजिकमा सुजिता मानन्धरले छैटौं स्थान हात पारेको टोली व्यवस्थापक दिनेश राजभण्डारीले जानकारी गराएका छन् ।

खेलाडीको मनोबल उच्च पार्न नेपाल शारीरिक सुगठन तथा फिजिकल फिटनेस संघका अध्यक्ष राजेशबाबु श्रेष्ठले रजत जित्ने खेलाडीलाई १ लाख र कांस्य जित्ने खेलाडीलाई ७५ हजार नगदबाट सम्मान गर्ने घोषणा गरेको व्यवस्थापक राजभण्डारीले बताए ।

यसै क्रममा नेपालले २०२३ मा गर्ने ५५ औं एसियन शारीरिक सुगठन प्रतियोगिताका लागि नेपालबाट अध्यक्ष राजेशबाबु श्रेष्ठ र एसियन फेडेरेसनबाट दातुक पाउल चुवाले सम्झौता–पत्रमा हस्ताक्षर गरे ।

प्रकाशित : श्रावण ४, २०७९ २२:३५
पूरा पढ्नुहोस्
प्रतिक्रिया
पठाउनुहोस्
×