नेपालगन्जमा भानुभक्त आचार्यको सालिक अनावरण- लुम्बिनी - कान्तिपुर समाचार

नेपालगन्जमा भानुभक्त आचार्यको सालिक अनावरण

रुपा गहतराज

नेपालगन्ज — नेपालगन्ज उपमहानगरपालिका वडा नम्बर २ न्युरोडमा निर्माण गरिएको आदिकवि भानुभक्त आचार्यको अर्ध कदको सालिक शनिबार अनावरण गरिएको छ । स्थानीय भानु चोकमा नेपाल प्रज्ञा प्रतिष्ठानका कुलपति गंगाप्रसाद उप्रेतीले एक कार्यक्रमबीच सालिक अनावरण गरेका हुन् ।

लायन्स क्लब अफ नेपालगन्ज सिनर्जीले साढे १२ लाख रुपैयाँको लागतमा उक्त सालिक निर्माण गरेको हो । सालिका निर्माणका लागि नेपालगन्ज २ का तत्कालीन वडाअध्यक्ष सुनिलसिंह हमाल, संरक्षण समितिका अध्यक्ष कृष्णप्रसाद श्रेष्ठ लगायत दाताले पनि आर्थिक सहयोग गरेका छन् ।

सालिक निर्माणका लागि नेपालगन्ज उपमहानगरपालिका वडा नम्बर २ निवासी समाजसेवी स्व दामोदर आचार्यले व्यक्तिगत रुपमा सबैभन्दा बढी १ लाख ११ हजार १ सय ११ रुपैयाँ प्रदान गरेका थिए ।

लायन्स क्लब अफ नेपालगन्ज सिनर्जीका अध्यक्ष शिवप्रसाद दाहालको सभापतित्वमा सम्पन्न उक्त कार्यक्रममा लुम्बिनी प्रदेशका वन, वातावरण तथा भू–संरक्षण मन्त्री सुरेन्द्र हमाल, नेपालगन्ज उपमहानगरपालिका नगर प्रमुख प्रशान्त विष्ट, बाँकेका प्रमुख जिल्ला अधिकारी सूर्यबहादुर खत्री, नेपाल प्रज्ञा प्रतिष्ठानका सदस्य सदस्य हरिप्रसाद तिमिल्सिना, लायन्स क्लब अफ नेपाल डिस्ट्रिक ३२५ बी २ का पूर्वगभर्नर सेम शाक्य, सालिक संरक्षण समितिका अध्यक्ष कृष्णप्रसाद श्रेष्ठ लगायतको उपस्थिति थियो ।

लायन्स क्लब अफ नेपालगन्ज सिनर्जीका अध्यक्ष शिवप्रसाद दाहालले शनिबार नै पद हस्तान्तरण गरेका हुन् ।

प्रकाशित : असार १८, २०७९ १७:१५
प्रतिक्रिया
पठाउनुहोस्

सरकारलाई ओलीको प्रश्न- हरेक साल किसानलाई चाहिने बेला मल आपूर्ति हुँदैन, यस्तो किन ?

कान्तिपुर संवाददाता

काठमाडौँ — पूर्वप्रधानमन्त्री तथा प्रमुख प्रतिपक्षी नेकपा (एमाले)का अध्यक्ष केपी शर्मा ओलीले हरेक वर्ष खेती गर्ने बेला किसानलाई मल किन आपूर्ति हुँदैन भनेर प्रश्न गरेका छन् । उनले यस वर्ष पनि सरकारले किसानका लागि मल ल्याउने व्यवस्था नगरेको बताए । 

अखिल नेपाल किसान महासंघले शनिबार एमाले पार्टी केन्द्रीय कार्यालय च्यासलमा आयोजना गरेको कार्यक्रमलाई सम्बोधन गर्दै ओलीले सरकारले मलको प्रबन्ध नगरेपछि किसानले कसरी पाउँछन् भनेर असन्तुष्टि व्यक्त गरे ।

संसद्‌मा गरेको प्रतिबद्धता प्रधानमन्त्री शेरबहादुर देउवाले पूरा गर्न नसकेको पनि उनको भनाइ थियो । 'हामीले सरकार छोडेपछिको मात्रै हिसाब गर्दा मात्रै चामल कसरी आयात भयो ? कृषि प्रदान देश, ६० प्रतिशत जनता कृषिमा संलग्न छ । यस्तो अवस्थामा कृषि प्रदान देशमा, यस्तो उर्वर देशमा, जहाँ यति हिमाल, पहाड, उर्वर फाँट छन् । जहाँको जनसंख्या ३ करोडभन्दा कम छ । त्यस्तो देशमा किन हामी खाद्यान्नमा पनि आत्मनिर्भर हुन नसकेर ४९ अर्बका आयात गर्छौं, चामलमात्रै,' उनले प्रश्न गरे, 'हरेक साल किसानलाई चाहिने बेलामा मल आपूर्ति हुँदैन, किन यस्तो हुन्छ ? यतिबेला मल चाहिन्छ भन्ने सबैलाई थाहा छ । त्यही कुरा ६ महिना अगाडिदेखि प्रयास गरे हुन्थ्यो नि ! अस्ति प्रधानमन्त्री शेरबहादुर देउवाजीले संसद्‌मा उभिएर भन्नुभयो–किसानलाई मलको आपूर्तिको व्यवस्था तत्काल गरिनेछ र किसानले मल पाउनेछन् । वाणी मिठो थियो । कुरा राम्रो थियो । तर, ल्याउने प्रबन्ध कहीँ पनि गरिएको छैन, केही पनि गरिएको छैन भने मल कहाँबाट आउँछ ? अर्थात् अलमल्याउने काम भएको छ । अलमल्याउने कामबाट, छक्याउने कामबाट कृषि क्षेत्रको उत्थान हुन सक्दैन ।’

किसानका लागि मलको अभाव हुन नदिन सरकारले बेलैमा आवश्यक व्यवस्था गर्न नसकेको ओलीको भनाइ थियो ।

प्रकाशित : असार १८, २०७९ १७:११
पूरा पढ्नुहोस्
प्रतिक्रिया
पठाउनुहोस्
x
×