पत्नीको हत्या आरोपमा पक्राउ

२७ वर्षीया सरु भट्टराई भुसालको हत्या गरेको आरोपमा शुक्रबार दिउँसो उनका पति कमल पक्राउ परेका हुन् । घर नजिकैको साही टोला भन्ने ठाउँमा घाँस दाउरा काट्न गएको बेला कमलले श्रीमतिको हत्या गरेको प्रहरीको अनुसन्धानबाट खुलेको निमित्त प्रहरी नायव उपरीक्षक अर्जुन पौडेलले बताए ।

प्रहरीका अनुसार खर्‍यानमा घाँस, दाउरा काट्न भन्दै श्रीमान–श्रीमति घरबाट हिँडेका थिए । कमलले कम्मरमा बाँधेको रुमालले सरुको घाँटी च्यापेर हत्या गरेर खोल्सामा स्याउलाले ढाकेर छाडेको प्रहरीको अनुसन्धानमा खुलेको छ ।

कमल अहिले इलाका प्रहरी कार्यालय खनको नियन्त्रणमा छन् । कमल र सरुले दुई वर्षअघि विवाह गरेका थिए । उनीहरूको एक वर्षको एक छोरा छन् । घटनाको कारणबारे थप अनुसन्धान भइरहेको प्रहरी नायव उपरीक्षक पौडेलले बताए ।