किसानका समस्या सम्बोधन गर्न १२ बुँदे माग- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

किसानका समस्या सम्बोधन गर्न १२ बुँदे माग

सन्जु पौडेल

तिलोत्तमा — उद्योग व्यापार संगठन, रुपन्देही र संगठनअन्तर्गत कृषि उपसमितिले किसानका समस्या सम्बोधन गर्न १२ बुँदे माग राख्दै ज्ञापनपत्र बुझाएको छ । बिहीबार जिल्ला प्रशासन कार्यालय रुपन्देही, सिद्धार्थनगर नगरपालिका र कृषि ज्ञान रुपन्देहीमा ज्ञापनपत्र बुझाइएको संगठनका अध्यक्ष अनीलकुमार ज्ञवालीले बताए । 

उपसमितिले रुपन्देहीका प्रमुख जिल्ला अधिकारी ऋषिराम तिवारी, सिद्धार्थनगर नगरपालिकाका प्रमुख इश्तियाक अहमद खान र कृषि ज्ञान केन्द्र रुपन्देहीका प्रमुख सन्देश धिताललाई ज्ञापनपत्र बुझाएको हो ।

रासायनिक मल यथाशीघ्र छिटो उपलब्ध गराउने व्यवस्था गर्नुपर्ने; नसकेको अवस्थामा किसानहरूलाई भारतीय बजारबाट सहजतापूर्वक नेपालमा मल ल्याउन दिनुपर्ने; वास्तविक किसानको पहिचान गरी किसान कार्ड उपलब्ध गराउनुपर्ने र अनुदान दिनुपर्ने; किसानको आवश्यकताअनुसार बिउ, मल, औषधि र प्रविधि, उपकरण सहुलियत दरमा उपलब्ध गराउनुपर्ने; सिंचाइका लागि आवश्यक पम्पसेट वा विद्युत्‌बाट चल्ने सबमर्सिवल मोटर तथा अन्य विद्युतीय औजारहरू उपलब्ध गराउनका लागि विद्युत्‌मा विशेष छुट दिनुपर्ने तथा भन्सार गरेर मल खरिद गरी ल्याउने व्यवस्था गर्नुपर्ने ज्ञापनपत्रमार्फत माग गरिएको कृषि उपसमितिका संयोजक रामप्रसाद भण्डारीले बताए ।

त्यस्तै बिउ, मल, औषधि र सिंचाइमा किसान कार्डको आधारमा नगद नलिई जिन्सीमा नै अनुदान दिनुपर्ने, कृषि मजदूरहरूको ज्याला निर्धारण गर्नुपर्ने; किसानद्वारा उत्पादित वस्तुको मूल्य निर्धारण र बजारीकरणको व्यवस्था गर्नुपर्ने; उत्पादित वस्तुको लागतमा अनुदान दिने व्यवस्था गर्नुपर्ने; बेमौसमी तरकारी वा फलफूल उत्पादनका लागि आवश्यक व्यवस्था गर्नुपर्ने; किसानलाई आवश्यकताअनुसार समयसमयमा तालिम दिनुपर्ने; अनुदान लिएका किसान वास्तविक किसान हो/होइन भनेर कृषि अनुगमनलाई निरन्तरता दिनुपर्ने; कुन कुन ठाउँमा कुन कुन खेती, तरकारी, फलफूल उत्पादन गर्न सकिन्छ भनेर विज्ञहरूबाट समयसमयमा किसानहरूलाई सल्लाहसुझाव दिनुपर्ने माग रहेको भण्डारीले जनाए । संगठनअन्तर्गत कृषि उपसमितिमा ५ सय कृषकको आबद्धता रहेको छ ।

प्रकाशित : असार ९, २०७९ १९:३०
प्रतिक्रिया
पठाउनुहोस्

प्रधानसेनापति शर्मा सिरियामा

कान्तिपुर संवाददाता

काठमाडौँ — संयुक्त राष्ट्र संघ (यूएन) अन्तर्गत शान्ति सैनिकहरूले निर्वाह गरेको जिम्मेवारीको अवलोकन गर्न गएका प्रधानसेनापति प्रभुराम शर्मा सिरिया पुगेका छन् ।

उनले बुधबारबाट यूएनको ‘डिसइन्गेजमेन्ट अबजर्भर फोर्स मिसन’ सिरियाको अवलोकन थालेका हुन् । उनले बिहीबार उक्त मिसनअन्तर्गतको सुरक्षा पोस्टहरूको भ्रमण गरे ।

भ्रमणको क्रममा टोलीले माउन्ट हर्मन कम्प्लेक्सस्थित फोर्स हेडक्वाटर ईन्फेन्ट्री सपोर्ट युनिट दसौं डफ्फाको भ्रमण गरेको नेपाली सेनाले जनाएको छ । उक्त ईलाकाको वस्तुस्थितिलगायत विविध पक्षबारे समेत शर्माले जानकारी दिएका थिए । सोही अवसरमा शर्माले उक्त युनिटमा उल्लेखनीय कार्य गर्ने चार नेपाली शान्ति सैनिकहरूलाई ‘प्रधान सेनापति प्रशंसा निशान’ प्रदान गरे ।

शर्माले फोर्स हेडक्वाटरको इन्फेन्ट्री सपोर्ट युनिटका सकलदर्जालाई सम्बोधन गर्दै भौगोलिक, सामरिक तथा सुरक्षात्मक दृष्टिकोणले समेत अति महत्त्वपूर्ण स्थानको रुपमा रहेको माउन्ट हर्मन ईलाकामा तैनाथ रहेर शान्ति स्थापनार्थ योगदान दिई नेपाल, नेपाली सेना र यूएनको विश्वसनीयता बढाएकोमा धन्यवाद दिए । शर्मा लेवनान हुँदै सिरिया गएका हुन् । उनी त्यसपछि असार १३ मा अमेरिकाको ५ दिने औपचारिक भ्रमणमा जाने छन् ।

प्रकाशित : असार ९, २०७९ १९:२३
पूरा पढ्नुहोस्
प्रतिक्रिया
पठाउनुहोस्
×