मूल्यवृद्धिको विरोधमा नेविसंघद्वारा कावासोतीमा चक्काजाम - लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

मूल्यवृद्धिको विरोधमा नेविसंघद्वारा कावासोतीमा चक्काजाम 

नवीन पौडेल

नवलपुर — मूल्यवृद्धिको विरोधमा पूर्वी नवलपरासीको सदरमुकाम कावासोतीमा नेपाल विद्यार्थी संघले विरोध प्रदर्शनसहित आधा घण्टा चक्काजाम गरेको छ । 

सरकारले पेट्रोलियम पदार्थको मूल्यवृद्धि गरेसँगै खाध्यान्न र अन्य क्षेत्रमा पनि चर्को मूल्यवृद्धि भएको भन्दै मूल्य समायोजन गर्न माग गर्दै नेविसंघले आन्दोलन गरेको हो ।

विरोध कार्यक्रममा बोल्दै नेविसंघका निवर्तमान केन्द्रीय सदस्य आरसी भट्टराईले नेविसंघ सत्ता नेतृत्व गर्ने नेपाली कांग्रेसको भ्रातृ संगठन भए पनि जनजीविकाको पक्षमा सधै लडिरहने बताए । सत्तामा बस्दा नेतृत्वले जे गरे पनि टुलुटुलु हेरेर बस्नुभन्दा रचनात्मक सहयोग गर्ने र जनताको पक्षमा नरहेको निर्णयमा विरोधमा उत्रिने उनले बताएका थिए ।

विरोध सभामा सहभागीले मूल्यवृद्धि खारेज गर, जनतालाई क्षति भो, मूल्यवृद्धि अति भो, हाम्री आमा के भन्छिन्, खाने तेल सस्तो ले भन्छिन् लगायतका नारा लेखिएका प्ले कार्ड बोकेका थिए ।

विरोध प्रदशर्नमा जिल्लामा रहेका नेविसंघ इकाईका प्रतिनिधि र जिल्लास्तरका विद्यार्थी नेताहरु सहभागी थिए ।


प्रकाशित : असार ९, २०७९ १६:०५
प्रतिक्रिया
पठाउनुहोस्

अर्थमन्त्रीको राजीनामा माग्दै पूर्वका उद्योगी र मजदुर आन्दोलित

विनोद भण्डारी

विराटनगर — बजेटमार्फत परिवर्तन गरिएका करमा संशोधन र अर्थमन्त्री जनार्दन शर्माको राजनीनामा माग्दै पूर्वका उद्योगी, व्यवसायी र मजदुर बिहीबारदेखि सडक आन्दोलनमा उत्रिएका छन् । 

मोरङ व्यापार संघ, उद्योग संगठन, नेपाल उद्योग परिसंघ प्रदेश १, नेपाल ट्रेड युनियन कांग्रेस मोरङ, नेपाल ट्रेड यूनियन महासंघ (जिफन्ड) प्रदेश १, अखिल नेपाल ट्रेड युनियन महासंघ (अन्टुफ) प्रदेश १ र समाजवादी ट्रेड युनियन प्रदेश १ ले औद्योगिक क्षेत्र गोकुवा चोकदेखि निमुवासम्म प्रदर्शन गरेका हुन् । अर्थमन्त्री शर्माले नीतिगत भ्रष्टाचार गरेर सीमित उद्योगलाई संरक्षण गर्दै जिआई वायर, वनस्पती घीउ, तेल र सेनिटरी प्याड उद्योगलाई बन्द गर्न बाध्य तुल्याउन करमा परिवर्तन गरेको उद्योगी र मजदुरको आरोप छ ।

प्रदर्शनका क्रममा 'अर्थमन्त्री राजीनामा देउ', 'झुटो अर्थमन्त्री चाहिँदैन', 'नीतिगत भ्रष्टाचार बन्द गर', 'सीमित उद्योगलाई पोस्न पाइँदैन, राज्यको डलर लुटाउन पाइँदैन,' 'अर्थमन्त्री सच्ची देउ'लगायतका नारा लगाएका थिए ।

प्रचण्ड गर्मीमा प्रदर्शनपछि आयोजित कोणसभामा उद्योगी व्यवसायीले अर्थमन्त्री शर्माले सीमित उद्योगसँग अकुत हुण्डी खाएर नीतिगत भ्रष्टाचार गर्दै कर परिवर्तन गरेर अन्य उद्योगलाई बन्द गर्न बाध्य तुल्याएको आरोप लगाए । कर परिवर्तनको विरोधमा उद्योगी र मजदुर जेठ अन्तिम साता पनि सडकमा उत्रिएका थिए । तर, अर्थमन्त्री शर्माले जेठ २७ गते आन्दोलनकारीलाई वार्ताका लागि काठमाडौं बोलाएर बजेट बनाउने क्रममा त्रुटि भएको स्वीर्कार्दै जेठ ३० गते बजेट पास हुने र असार १ गते परिवर्तित करलाई संशोधन गर्ने आश्वासन दिएपछि उद्योगीले तत्कालका लागि आन्दोलन स्थगित गरेका थिए । तर, बजेट पारित भएको साता बित्दा पनि शर्माले आश्वासन पूरा नगरेको भन्दै उद्योगी र मजदुर पुन आन्दोलनमा उत्रिएका हुन् ।

कोणसभामा मोरङ व्यापार संघका अध्यक्ष नविन रिजालले अर्थमन्त्रीको नीतिगत भ्रष्टाचारले सीमित उद्योगलाई संरक्षण गरेर अन्य उद्योग बन्द गर्न बाध्य वनाएर हजारौं मजदुरको रोजीरोटी गुम्ने स्थिति सिर्जना गरेको उल्लेख गर्दै परिवर्तित करमा संशोधन र एक दुईवटा उद्योगलाई मात्र पोस्ने अर्थमन्त्रीले राजीनामा नगरेसम्म आन्दोलन जारी रहने बताए । उनका अनुसार शुक्रबार आन्तरिक राजस्व कार्यालय र भन्सार कार्यालय घेराउ गर्ने कार्यक्रम छ ।

प्रकाशित : असार ९, २०७९ १५:५४
पूरा पढ्नुहोस्
प्रतिक्रिया
पठाउनुहोस्
x
×